《台灣人e5先覺─黃彰輝傳》 |
 |
 |
|
 轉寄 |
黃彰輝tī東京帝國大學（東大）
作者 張瑞雄 2009.03.29
日本所有ê學校，lóng是4月初1開學。Tùi án-ne黃彰輝提早tī 1934年3月，就到東京，到附近ê東大基督教青年會報到入來tòa。所以伊到帝國大學註冊ê時chūn，伊塡ê地址為『基督教青年會學寮』。
大學生ê生活
日本所有ê學校，lóng是4月初1開學。Tùi án-ne黃彰輝提早tī 1934年3月，就到東京，到附近ê東大基督教青年會報到入來tòa。所以伊到帝國大學註冊ê時chūn，伊塡ê地址為『基督教青年會學寮』。
東京大學YMCA學寮ê位置，是tùi東大校門ê『紅門』正pêng，出入人文學院ê門出去正oat行3分鐘，行過chit-má ê東大農學院，過去對面，tī本鄉地區ê追分街á頂。出入文學院校上課算是真理想方便ê所在。
東京帝大算是日本國內siōng古、siōng大，而且siōng好ê大學。大學標榜伊學術上ê優越 kap輝煌ê校舍、設備。其實內底根本就m̄是chi̍t-ê有人際關係ê園地。1934年入學ê 8到9位（其實tī系ê日記頂登錄有21人，21人可能是全學系ê人數）哲學系ê學生，tī『新生紹介訓練』kap面談了後，kap仝期仝班lóng無接觸，mā真少作伙，一直到畢業為止。根本m̄知in tī啥所在，除了會記得一位ê名字以外，黃彰輝lóng無記憶。
學生tī真大ê校園內穿仝款ê制服，戴四角方帽ê大眾內，真有迷失ê感覺。伊講：『佳哉伊得tòa tī有團契性質，mā尊重個人思想、行動ê基督教青年會宿舍內。』（《回憶錄》p.60）
YMCA宿舍總共有50個房間，thang tòa 40 ê人。每chi̍t-ê人lóng有家己ê房間，in大約分做6個『村』，每一村lóng分配無仝年級ê學生，成做chi̍t-ê『小組』。In共同遵守兩pái ê早起禮拜，mā迴覽、分享筆記ê消息ia̍h-sī感想。禮拜日mā開主日學，總共教導100個少年kap兒童，由每一『村』負責一大班學童。
全寮ê大學生lóng同齊食飯，食飯ê時chūn，是chi̍t-ê siōng好ê機會討論ia̍h-sī互相交往關懷，建立chi̍t-ê相愛、有厝ê氣味ê大家庭。
Tī寮內有chi̍t-ê大浴間á，是日本式ê燒水槽kap周圍洗lù ê空間，日本話叫做『風呂』（發音做Furo），同時總共thang接納近20 ê人。Tī-hia m̄ kan-tāⁿ是享受燒熱ê水，koh-khah可貴..ê，就是ta̍k-ke thang脫光光來談論國家、國際ê任何話題，無掩khàm ê談論。因為當時日本己經佔領滿洲koh設立屬於日本ê保護國ê滿洲國。日本國內己經是進入軍政時期，tī每chi̍t-ê學術kap活動ê所在lóng充滿『特務』、『情報』官員，去掠『自由思想』、『造反組織』等等ê分子。黃彰輝逐工lóng真享受chit種ê無穿杉ê開會，寮員ē-sái kā心底ê思想kap話語lóng吐..出..來，同齊分享豐富ê知識、消息kap深思。
寮內大約逐禮拜lóng有講員tùi外邊請來，向全寮ê學生講聖經，tiāⁿ-tiāⁿ lóng有講員講了真精彩，隨後ê討論mā真熱烈，黃彰輝特別記得有一位『少年』ê牧師，叫淺野順一，查約伯記查得真有趣味。黃彰輝kap淺野tī 1966年以後，有機會tī青山學院神學部相會，伊tī hit-ê學院做教授，有機會看tio̍h熟識ê人歡喜開講。
東大YMCA當時是全日本ê學生運動中心，親像扮演電腦中樞ê角色。Tī基督教ê學術kap社會運動ê研究kap學以致用ê探討頂頭，是行tī全國ê頭前ê。就是因為以學問（學術）kap聖經為siōng重要ê『無教會』學者，tī大學教授ia̍h-sī學習，有時mā吸引校外ê學子進到公開ê場所聽講，東大YMCA就提供án-ne ê會所。當黃彰輝tī學寮ê時chūn，mā tú好是經濟系教授，帝國主義研究ê專家矢內原忠雄，受軍國主義爪牙人員注意ê時chūn，伊用無驚hiâⁿ ê精神講帝國主義tī台灣、朝鮮、滿洲所施行ê政策，kap所做ê行為。因為真chē伊所提供ê資料，就是提起日本按怎來包庇貪污ê資本家去搾取殖民地ê財產、資源。（矢內原忠雄tī 1929年10月出版了《帝國主義下ê台灣》一冊，tī 1934年（黃彰輝入學東大hit年），伊koh出版了《滿州問題》。日本政府隨kā台灣、滿州兩冊『停止印刷』。黃彰輝畢業ê 1937年，tī《中央公論》雜誌上刊登＜國家ê理想＞一文，受了全文削除ê禁令，仝年12月4日，總算受驅逐放棄東大教授ê職位。）
黃彰輝tī東大YMCA學寮ê時期內底，東大YMCA學寮tī大學內底辦基督教ê演講，mā得tio̍h日本學界真有實力koh受歡迎ê賀川豐彥來演講，伊是引chhōa日本基督教社會運動kap全國勞工者權益運動ê人，tī黃彰輝leh讀冊ê時chūn，伊bat去過東大ê大演講廳演講，ē-sái接納700-800人ê座位ê講堂，連khiā ê所在lóng滿滿。賀川hō͘黃彰輝ê社會意識kap激起基督教良心siong chē koh真大ê刺激。伊志願加入服務貧民ê行列，逐禮拜有一工去貧民窟內去分食物kap衫。伊講伊第一pái看到chiah-ni̍h-chē、chiah-ni̍h慘ê人tī日本ê首都，koh tī離開皇宮無遠ê所在求生存。
Tī教哲學ê老師內底，有一位出眾ê教授波多野精一，是黃彰輝真尊敬ê學者，mā是老師。波多野是一位真有趣味ê哲學家，聽課ê學生、社會知識人mā真chē。
黃彰輝tiāⁿ-tiāⁿ聽別人講，賀川ê神學淺薄，波多野ê哲學是大眾化、世俗化..ê。其實無一定是án-ne，chit二位lóng是有深奧ê哲理，有趣味生動ê講述能力，ē-sái吸引人加入宗教kap哲理ê新園地。
黃彰輝hō͘當時ê日本基督教徒ê評語，是『tī信仰（神學）頂頭真保守，m̄-koh tī社會活動頂頭是真開放..ê（自由派）。』各種大學生ùi無仝ê所在ê鄉鎮kap教會來，m̄-koh是tī東京，特別tī東大參加宗教ê活動，差不多lóng是無『kap教會取得連繫』ê教會生活。
『無教會主義』ê聖經研究班，就tī出眾ê教授厝nih，逐禮拜日舉行，mā tiāⁿ-tiāⁿ借教室舉行『學術性』ê『聖經班』。In至少tī東大內扮演『教會』ê角色，koh是水準真高（若無tī神學探討上，mā tī聖經ê講解上）ê『禮拜』。
像矢內原忠雄教授，雖然是經濟政治學家，伊mā學習了希伯來文、希臘文，koh領導聖經ê講解。Siōng hō͘人tio̍h驚ê，就是大學（學府）se̍k-sāi宗教為學術學習ê對象。所以當時， koh無政、教分離ê主張，對東大ê基督教徒ê活動，算真有利，m̄-koh mā變成『帝國主義神道』得利主張，『神道』是國家ê哲理，m̄是宗教ê歪論。
東大YMCA依照伊ê沿革，設有：一、寄宿舍部；二、聖經研究部；三、研究部（學術）；四、圖冊部；五、音樂部；六、體育部；七、主日學校部等，總共七部（註一）。照當時仝寮ê寮友三輪和敏，in逐禮拜大概lóng有百gōa名ê主日學學生來學習，伊kap黃彰輝lóng是hit間學校ê教員。伊特別hō͘我當時黃彰輝kap伊tī學生所hip ê相片。
下圖：進入東大本鄉門，向『前田大會堂』院內ê風景。(三輪和敏提供)
下圖:黃彰輝(khiā-tī正pêng)kap同學tī『前田大會堂』前hip-siòng。(三輪和敏提供)
下圖:黃彰輝tòa寮時代ê東大YMCA學生寮舍ê正面外觀。(東大YMCA寮提供)
下圖：東大YMCA ê寮內村友留影，二排坐tī中央ê是黃彰輝。(三輪和敏提供)
下圖：tī三輪先生所提供ê相片內底，mā有一張是ta̍k-ke tī餐室所hip，大概是飯前ê鏡頭，黃彰輝tī後面，近tī中央ê所在坐teh。
下圖:逐年到聖誕節ê時，東大YMCA學寮內舉辦聖誕慶祝節目。Tī 1934年12月15日(禮拜六)聖誕節目內底，有『同志ê hiah-ê人』為題ê兩幕戲劇，黃彰輝演主角，演戲soah了後hip ê記念相片，相片內底後排倒pêng第三，面上抹白粉ê就是伊。
註一：tùi東大基督教青年會1930年代ê簡介採錄..落..來..ê。
大學生學術園地 東大YMCA mā出季刊，叫做會報（The Kaiho）。Tī會報內刊登東大YMCA、東京kap全日本YMCA ê活動通知kap報告，國內外基督教會ê消息，季內受邀請講師ê專題講演內容…等等。有時，寮內ê同學有論講、文章，mā ē-sái刊載tī會報頂頭。1999年筆者採訪東大YMCA寮時，做幹事ê是德久俊彥先生。伊是1953年東大經濟系畢業，伊hō͘我第17號1935年12月10日出刊ê季刊，內底有一篇黃彰輝所寫ê論講，題目叫做『不安ê倫理性』，真可惜ê是kan-tāⁿ有頂半段，就是因為下半段遺失，所以無法度紹介hō͘讀者讀。
（以下是hit篇ê譯文：）
親像採金者，m̄管是荒涼ê曠野，四界挖lóng無，為tio̍h無採收，一連串ê吐大氣，但是bē有絕望，無iah-siān kap疲勞，忍耐繼續落..去，哲學ê探求者，因為有知識ê熱心，連續來超越失敗ê廢墟，迫近去chhōe出bih-tī存在背後ê意義。若m̄是因為愛，誰ē-tàng達到真理？失敗就是向前進ê呼召。
對不安了解膚淺ê人，有雙重掩khàm。其中之有不安，另gōa mā有不安ê含意。Kan-tāⁿ tī不安狀態下ê人，chiah有安心ê應允，無不安ê安心，kan-tāⁿ是自欺ê逃避niā-tiā。
M̄知人罪沈重ē人，豈ē-tàng kap in ê真誠探討『不安』？永遠相下，不安kan-tāⁿ像落葉ê聲音，kap海上ê風浪niā-tiā。『hiah-ê幸福ê人』ah！阮到chia告別好..a。
歷史上，從來m̄ bat有過親像現代，hō͘人感覺不安ê時代。Tī所有ê領域內底，lóng充滿不安，tāi-ke lóng大聲hoah『危機』。不安社會、不安思想、不安神學、不安哲學、不安文學等新語，lóng 親像有魔術性吸引力。比起中世紀ê烏暗時代，阮ē-sái稱做現代不安時代！但是，客觀ê世界起了變動，mā無一定會產生『不安』出..來。soah因為主體者ê人本身就是不安，tùi án-ne面臨危機。
當然bē少學者往往kā不安當做kan-ta是生物學上、心理學上ê意義來解釋，ē-sái講是獨斷ê做法。阮所面對ê問題，m̄是關於存在上ê不安，tùi án-ne是siōng根本ê『世人ê不安』ê意義。阮所講ê不安，就是世上存在意義上ê不安，只要人tī世間存在ê一工，伊就親像影仝款。He是看bē-tio̍h、擺脫bē-liáu ê宿命性ê不安。Tī永恆內底ê『chit時』中，一直leh『如現』逼伊做判斷。因此，不安就是世人tiāⁿ-tiāⁿ存在ê屬性。
我ê目的就是先kā驚hiâⁿ不安作以上ê限定，koh來tùi人存在ê屬性，來看不安ê根本意義是啥。頂頭講..ê親像海德格(Heideggar)對不安ê根本看法。伊對不安ê根本把握m̄是hiông-hiông來ē，是經過宗教思想家tùi種種無仝ê觀點觀察以後，各自kā伊獨有特殊ê意義限定。當然，m̄是忽視海德格是kā chit-ê題目提升到哲學頂ê思考koh kā伊解明ê siōng大功勞者，反tò-tńg soah是因為伊tùi原來kan-tāⁿ受Pathos領域消極研討ê題材，koh hō͘哲學本Logos類型ê哲學看做攪擾者ê概念，轉移來做哲學ê中心論題，chit種ê成果就是siōng大貢獻。Tùi chit點看起來，阮應該tio̍h se̍k-sāi哲學是腳踏實地，無應該是『為學問而學問』ê閑事。
觀看過去ê思想家如何去理解不安ê意義，對阮是有幫助ē。所以我kā以下奧古斯丁，巴斯加(Pascal)，kap海德格對不安所作ê解釋，做為參考。
奧古斯丁：神所創造墮落ê人，處tī絕對無法度tùi神獨立ê境遇，beh自由soah bē-tàng得tio̍h ê悲劇性境地；koh『自高自大者，必受審判』；由此thang証明人ê不安根源所在。本來是朝向神受創造ê人，tī kha-chiah-phiaⁿ 向衪ê hit-chun就kap神處tī『否定』關係。破損ê人tī現存性上己驚有不安。神kap人tī辯証ssiong對立，正是不安。he一下á就是對神ê答申，同時mā就是有tùi神ê邊á墮落可能ê起點。這ē-tháng驚惶ê不安，就是神投hō͘世人ê『不』，mā就是hia-pai ê背逆者奔向逃避ê危機。『神tī其中，伊soah tī神之外，án-ne ê人，án-chóaⁿ ē-tàng期望安泰neh？若m̄是tī祢（神）內底得tio̍h安泰，我ê心怎ē-tàng得到平安ah？』驅使奧古斯丁行上he無盡頭歷程ē，就是這不安，koh引領伊回歸tī神，mā就是這不安。
巴斯加比喻人ná tī無限大kap無限小ê深淵之間徘徊無停，tī旅途上有可能ē-tàng探究到人不安ê根底。對伊來講，不安mā就是追求神熱情ê同時，mā是允准肉身沈醉kap遊蕩可能ê源頭。
講到現代ê實存哲學家海德格，阮mā ē-sái看tio̍h伊深入分析不安。Tī伊ê哲學內底，親像ta̍k-ke所知影ê仝款，不安就是伊ê中心概念。當然阮無願意tī-chia深入伊ê體系，我kan-tāⁿ想指點海德格無贊同頭前兩者ê所在，但是無kap伊仝調，藉tio̍h消極表明我ê確信。對海德格來講，不安表示現存ê開示性，因為『存在tī chia ê人』是拍開koh hō͘放tiāu，所以是不安。既然án-ne，不安就是現存ê不安，mā是對家己本身ê不安，所以，不安是指現存ê先驅性，mā就是講，現存m̄-nā是既存在，mā tiāⁿ-tiāⁿ包含可能ê存在，所以是不安。不安就是對家己ê可能性（結局是家己ê死）ê不安。Tī-chia需要提起ê就是，tī海德格ê思想內底，不安時常lóng是限tī自身ê不安來處理議論。伊tī現存議論ê出發起點，就tī個人。我以下ê說明大槪ē-tàng koh-khah來證明chit點。伊稱呼kap一般別人普遍ê人是單純ê人，chit種人koh m̄是由本來ê自己墮落ē，非我，非伊，thang講m̄是一切ê人koh是一切ê人，非本來ê自己。阮通常是普通ê chi̍t-ê人。所以不安就顯示其開示性，kā家己ê可能存在性開示，kā非本來ê自己引chhōa tńg來本來ê自己。阮必須se̍k-sāi不安，m̄ kan-tāⁿ用tī消極ê觀念niā-tiā，mā有積極性ê意義。一定bē-tàng bē記得海德格所講ê不安，kan-tāⁿ指家己ê不安。因為伊tùi出發點就己經kā現存在規定下。
世上ê現存，是對家己關心者所持有ê負擔各自性kap根本規定ê性質。Tī-chia有雙層ê兩面，一個是覺存kap超越，另gōa一個是現存kap形象，chiah-ê lóng m̄是各種無仝者，反倒tńg是持有各種無仝ê視角ê提顯，其實是仝chi̍t-ê構體。所以總體bē-tàng缺一，koh 從一必然轉移到別體（像）。
就以上ê海德格ê陳述，ē-sái分析出，雖然伊一直主張現存，tī其存在性上指ê是『借存』，到底伊mā kan-tāⁿ是khiā-tī個人ê言論，隨在伊展延到擁有ê社會觀，mā bē-sái消除伊個人主義ê色彩。無，我ē-sái試提出以下兩個疑問：一，不安kan-tāⁿ m̄過是一個人我ê不安？二，若退一步同意不安是家己ê，親像án-ne ê不安，ē-sái認為真正不安？本來ê家己，ia̍h-sī非本來ê家己，既然是家己，雖然兩者之間有無仝mā無可能有矛盾。敢m̄是kan-tāⁿ有tī超越非連續ê所在，不安chiah ē-tàng真正thang認為不安？換一句話來講，tī量ê差異內底，iáu bē-sái定出真正ê不安，koh tī質ê相異內底，chiah ē-tàng有覺存理解下ê不安，thang講。
阮ē-sái koh再進一步驗證不安ê根底，koh驗出伊ê意義。先tùi日常ê tāi-chì講起。平常時當阮使用不安這語句ê時chūn，lóng tiāⁿ-tiāⁿ講是針對siáⁿ-mi̍h tāi-chì感到不安，ia̍h-sī對siáⁿ-mi̍h tāi-chì不安，kan-tāⁿ講不安是無意義ē。就算m̄知為siáⁿ-mi̍h不安，mā無允准講he只是心情不安。Chit種ê不安，kan-tāⁿ是不安ê對象tà-bông無明，絕對bē表示其心。所以不安bē-sái無對象koh孤一個存在，是tī相對ê時chun chiah會有。這就是不安bē-sái kan-tāⁿ以個人成立ê理由niâ-niâ。阮暫時kā伊稱做不安ê相對性。但是，阮bē-sái kā不安kap恐怖混同。前者用tī對人ê關係，後者用tī對物ê關係。因為地震、洪水、野獸等引起ê m̄是不安soah是恐怖。不安是因為人所以有，這m̄是講兩者之間無關連。自然現象所惹引ê恐怖是媒介，thang kā恐怖轉變成不安。個人ê地震恐怖，傳hō͘有知識ê人，恐怖就會變成不安。雖然ài有互相對立ê情形，kan-tāⁿ tī人對人ê關係ê時，chiah ē-sái叫ê不安。所以阮ē-sái án-ne講：kan-tāⁿ tī我kap你相對時，不安chiah會出現。換過來講，不安是建立tī人倫間地盤上，chiah有可能產生。離開我kap你ê地盤ê不安，kan-tāⁿ m̄過是抽象ê。當然，配角無一定是會確示伊ê存在。偷拿人物件ê人，m̄是因為he物件所以不安，mā m̄是為家己不安，是因為看..起..來是遮tio̍h別人所以感覺不安。Tī-chia ē-sái考慮tùi個人主義ê一方，kah-ná ē-sái來提出有力ê反對，he就是關係死ê個人性。人時常負擔tio̍h死為伊存在ê可能，知覺伊像
『不安ê倫理性』ê原文版本： 先驅於伊ê面前。死是終局性質..ê，絕對bē-tàng逃避..ê，家己bē-sái bē承受ê運命。阮ia̍h-sī thang暫時bē記得死，但是he到底mā kan-tāⁿ是暫時ē，因為死是ta̍k-ke有一工必定要tam受ê杯。『人是beh單獨行向死chit條路』，巴斯加án-ne講。死就是kā chi̍t-ê人所有ê一切搶..去了後，iáu留..落..來ê親像唯一bē-sái攻破ê堡壘。死就親像是不安內底ê不安，nā是無死，就雖然有〔boring〕iah-siān，mā無不安。Tùi客觀ê自然ê觀點來看，死是特定chi̍t-ê人ê死。Kā死看成自然ê現象ê話，伊就kap其他ê自然現象無啥無仝。Tī自然現象內底有變化，但是hia koh無本來ê意義ê死。Tùi自然現象ê觀點所看ê死，是抽象ê死，m̄是具體ê死。Tùi客觀立場看所有物件ê移動變化所感嘆，kap主體ê面對死所以戰爭之間帶有質ê無仝。自然ê死，對具體存在ê人來講，bē-tàng有先驅ê通達thang預知，客觀觀測ê死，kan-tāⁿ是現象ê變化並bē引起不安。
nā是我ê死m̄是自然ê，soah thang認為人生不安中ê不安， án-ne he感知者ê我到底是啥物？家己仝一體ê我內底thang有無仝，但是絕無矛盾存在ē， án-ne tī-chia hō͘阮考察死所以會來自覺：不安中ê不安ê情形是怎樣ê。
我ê存在kap別人相關ê時，我ê死kiám m̄就成做不安？有gín-á ê母親，比無gín-á ê母親，是m̄是koh-khah死chhoah？我所以是我，有óa靠別人，離開伊soah bē-tàng為我ê時chūn，死就顯示不安內底ê不安。死mā是tī我kap你ê相對性內底chiah會成做現實ê不安。tī伊ê根底帶有非我，非你ê絕對別人kā我縛tiâu-teh。介tio̍h死，阮kap絕對者相對，這koh証明死是罪ê控告。因為叛逆ê罪狀所以受審判，所以死就是不安ê根底。所以死ê不安是絕對別人ê『Nein（德語ê不）』時，以受裁判者身份tī相對關係內底ê不安。所以死就m̄是一己ê，一方面tio̍h-ài面對相óa他人ê運命，另外一方面ài面對絕對者，所以是不安中ê不安lah。相óa承擔ê同伴，to̍h是前者是就不安ê倫理性。絕對者to̍h是後者是就不安ê宗教性來講..ê。前者ê根源，就thang講全依賴tī後者。
根據1934年7月ê『會報』17號ê報導，黃彰輝是tī 3月23日，經過東大YMCA青年會ê詮衡會核准入會，mā入宿舍。Kap伊仝月份入舍ê iáu有5位。
Kap黃彰輝仝時期tòa宿tī東大YMCA ê人，tī 1998年，筆者採訪ê時chūn，iáu健在ê kan-tāⁿ有2位，一位是神戶大學ê名譽教授，mā做過基督教學院院長，己經提過ê三輪kap敏先生，另外一位是後來做醫師ê增田隆郎先生。筆者無機會kap增田醫師相會，但是，伊寫幾項對黃彰輝ê感想 kap記憶：一、黃彰輝kap讀教育科ê三輪kap敏tī學課上khah相óa，有一kóa課程是科系相重複..ê；二、會記得黃彰輝提起將來生涯ê目標是beh進到神學ê研究，所以tiāⁿ-tiāⁿ tī餐廳kap吉野衡（法學院）、大塚豐（文學院）、吉利kap（醫學院）議論『我相信』（Karl Barth， Credo）（註一）、『Kierkegaard』（齊克果）（註二）等等ê論題，談論ê真熱烈；三、增田隆郎氏本身講是tùi『救世軍』一兵卒ê背景到東大讀冊，伊認為神學ê議論不如『單純ê信心』hiah-ni̍h重要，所以kap hiah-ê好議論ê一陣保持距離。伊講：『chit-má想起來，感覺見笑。』四、真可惜，吉野kap大塚兩氏過身無jōa久，若是in iáu tī-le，in一定會hō͘ lín真好koh正確ê『思想上ê評估』。
註一：Karl Barth， Credo 是1935年出版..ê。德國ê希特勒tī 1934年就任總統，1935年，Karl Barth就hō͘希特勒趕出Bohn大學教授ê職位。 註二：丹麥出身ê哲學、神學家、tio̍h作家。
下圖:東大學生時代ê黃彰輝。(三輪和敏提供)
下圖:黃彰輝結束台灣高等學校，去東京tī東京帝國大學文學院前hip-siòng。(三輪和敏提供)
下圖：富有歷史聲譽ê東大文學院附近，通稱『赤(紅)門』ê校門.(張瑞雄攝)
下圖：東大ê本鄉門，設tī最近文科lī-chhiaⁿ離東大YMCA學寮行路kan-tāⁿ 5分鐘ê地點。(張瑞雄攝)
下圖:東大YMCA幹部、寮內東大學生kap來賓tī一pái『基督教大演講會』了後hip-siòng。（約1935年）黃彰輝是第3排正pêng第五ê學生服ê人(東大YMCA提供)。
下圖:東大YMCA寮內逐禮拜一請牧師到寮á內來主理全寮ê聖經研究會，chit張相片是會後hip-siòng當作留做紀念。黃彰輝是後排正pêng第二ê。（約1934年,東大YMCA提供）
下圖：東大YMCA學寮寮友ê野外郊遊情景,黃彰輝是前排tò-pêng第二ê,1934年.(三輪和敏提供)
下圖：東大YMCA附設主日學老師黃彰輝kap學生出外旅遊時hip-siòng,大約是1935年.(三輪和敏提供)
東大基督教青年會學寮早拜
1．1934年度早拜主理記錄 1934年4月25日（拜三） 主理：黃彰輝 聖歌： 264 聖經： 約翰二冊第一章 聖歌： 450 出席者： 5名 （雜感） 耶穌基督三十年ê爭戰，hō͘精神上破產koh beh死ê人類一點點光明。伊tī十字頂所流出尊貴ê血，一直灌輸hō͘虛弱ê阮，hō͘阮有對愛ê感激，koh hō͘阮有氣力。Tī感受綿綿ê約翰ê心肝內『種植』，噴出愛ê水泉，喙舌內充滿愛ê謳歌ê是誰？但是，現今阮所看到..ê是án-chóaⁿ ê世相！强者拚命去chhōe弱者ê肉食，kā信義、愛心抛棄落地，目睭互相ê守leh，teh等待好機會ê來臨。Tī án-ne ê時勢內底，真chē既成ê宗教雖然無順應時勢，mā變成消極kap防守，kan-tā外表ê tāi-chì，以宗教做安寜家己甚至做修身之術來取代伊。基督教會教派中，mā有呈現án-ne傾向ê人？若有，就真意外，不該。我相信基督教ê本來ê宗旨究竟是積極性質，koh有創意ē。我想，基督徒ê血是時常充滿建設性ê破壞精神。Lī-chhiaⁿ我相信（基督徒行動）是理智（IDEA）ê前進，所以路上ê障礙是一定ài斬然ê除掉。主耶穌雖然承受釘tī十字架頂，伊mā無放棄除掉社會ê障礙kap靈魂ê污染ê事工！到底我ê心魂是真容易liâu入去tuh-ku，tiāⁿ-tiāⁿ hō͘時勢ê惡魔phah敗，受環境ê影響差一點á就失去理性！我真欣慕親像tī曠野內深思默想四十工ê主仝款，得到koh-khah chē省思ê時間！自從來這寮舍以來，我tùi心肝底真感謝有án-ne ê早禱會，我來chia ê目的m̄-nā是為自身ê修養去求kap神交往niā-tiā。我認為這是為tio̍h he teh-beh來hit時ê預備，mā是為tio̍h爆發去點火，受火熱情感ê冷靜機會！我真相信chit三個月（早禱）ê機會是像我主tī曠野深思、默想、準備ê期間仝款。
（下圖是1934年4月25日早禱會主理以後，黃彰輝親筆寫..落..來ê雜感文章，頂文是筆者ê翻譯文。）
1934年5月12日（拜六） 主 理：黃彰輝 讚美歌： ２ 聖 經： 啟示錄13章 讚美歌： 513 出席者： 4名
1934年5月21日（拜一） 主 理：黃彰輝 讚美歌： 54 聖 經： 啟示錄20章 讚美歌： 528 出席者： 角田兄、吉利兄、稻井兄、黃彰輝
(感想) 『我beh kā我ê靈piàⁿ hō͘每chi̍t-ê人。…lín ê少年人ài看見遠景（異象）。』（行傳二17）昨hng是五旬節聖日，聖靈降臨mā必須來到阮頂面。就是tī這一工，因為hō͘無膽ê風吹所以四散ê耶穌ê phōaⁿ，khiā立覺醒tī in ê使命。想起hiah-ê無知koh無膽ê一陣過去所為ê時chūn，阮就真好想親像今á日ê信徒beh án-chóaⁿ去做，chiah ē-táng帶動碰壁ê社會，就是阮每chi̍t-ê人看出家己ê異象ê時chūn，chiah ē-tàng tùi靜ê信徒跳躍成做動ê信徒。原始教會ê信徒lóng是火種，in lóng是ē-tàng移送點火ê力量，無，是無移送點火bē-tàng ê火種。he『燃燒ê火』是in siōng強ê所在kap力量，mā就形成基督教ê原點，mā就是該宗教成做宗教ê原因。翻倒tńg看今á日ê既成ê基督教ê時chūn，我ē-sái án-chóaⁿ去比喻來說明？
khiā起堂皇ê殿堂內底講愛ê教會iah-koh存在，in tī內底安穩ê讀tio̍h幽雅ê聖經，teh唱音美ê讚美歌，he kah-ná是裝飾非常美麗ê電火。伊ê作用是發光，維持留存，就kan-tāⁿ是án-ne niā-tiā？雖然是發光，伊是hō͘玻璃kā包圍，所以雖然hō͘周圍hoán光，bē-sái燒tio̍h周圍ê物體。He kan-tāⁿ thang講是利便、有利ê存在niā-tiā。宗教之所以是宗教，就tī chit點？若是無m̄-tio̍h ê話，世上就充滿比宗教koh-khah有學術kap體系、倫理道德ê學說，四界lóng是，那何必持守宗教？
我認為以前m̄ bat有像今á日hiah-ni̍h chē ê無神主義者，我感覺tī追尋其理由以前，我痛感阮應該探討hiah-ê靜ê、摡念化ê宗教ê必要。今á日ê社會tī所有ê場面lóng呈現伊ê矛盾（碰壁）。M̄-koh，近代人soah追求宗教以外ê拯救施濟。Chit種ê心情是teh說明啥？就tī責備近代人ê世俗化以前，我想阮應該責備宗教ê概念化。若ē-sái用我家己ê用語ê話，我是講: 『he有火種ê宗教，hō͘電火ê宗教取代，所以活活ê宗教轉變成做概念論ê宗教』。Tī五旬節ê chit-ê時chūn，阮應該追尋觀望什麼款ê異象neh？he異象應該是『tùi概念ê愛，轉變成做實行ê愛』ê hit種異象。 (頂文是1934年5月21日黃彰輝tī晚禱會所準備講章ê翻譯文，後面ê圖是伊親筆寫..落..來ê講道文章。)
1934年5月29日（拜二） 主 理：黃彰輝 讚美歌： 228 聖 經： 約翰 第五章 讚美歌： 529 出席者： 吉村兄、加藤兄、稻井兄、吉野兄、角田兄、黃
1934年6月7日（拜四） 主 理：黃彰輝 讚美歌： 559 聖 經： 約翰13章 讚美歌： 325 出席者： 吉利兄、稻井兄、加藤兄、黃彰輝
(下圖是1934年5月21日黃彰輝親筆寫..落..來ê晚禱會講道文章。)
1934年9月10日開始1934年度秋季早禱： 1934年9月11日 主 理：黃彰輝 讚美歌： 322 聖 經： 使徒行傳5章 祈 禱： 讚美歌： 513 出 席： 稻井兄、角田兄、增田兄、吉利兄、黃
1934年10月11日（拜四） 主 理：黃彰輝 聖 經： 詩篇11篇 祈 禱： 聖 歌： 451 出 席： 角田、吉利、增田、黃
1934年11月26日 主 理：黃彰輝 聖 歌： ２ 詩 篇： 40篇 祈 禱： 聖 歌： 513 默 禱： 出 席： 吉利兄、角田兄、黃
(教會kap個人)
tùi大戰（第一pái）以來，m̄-nā是tī哲學界、神學界ia̍h-sī其他所有ê領域，lóng有了強力反省ê需求。凡是無好..ê，lóng受大力ê請tùi塔頂..落..來。強調世人存在m̄獨立hit一面ê個人主義，tī達到伊ê至高點，mā同時顯示出伊siōng惡chit缺陷ê歸結去ap-pik人類。Bē記得伊本來ê使命，無chhái工跟隨同化tī世俗文化ê基督教，bē-sái逃避伊ê運命算是應該ê。教會處tī無力狀況ê威脅之下，是m̄是因為伊有意ia̍h-sī無意間，bán..落..來he bē-sái食ê禁果ê結果！自由主義教會就是生產無教會主義ê母親。Kā宗教理解成做以個人主義ê原本，koh tī個人內底去chhōe神，án-ne做就是否定人ê存在，mā-thang講是失去了耶穌ê福音。
無你我就bē-tàng認知，離開我，你kan-tāⁿ是空虛ê名niā-tiā。『人是tī責任內存在ē』就tī chit種關係內底產生愛。Tī仝性質內無法度有愛，親像tī電子間無愛ê存在仝款，kan-tāⁿ tī異質之間chiah開始有愛ê存在。
教會kan-tāⁿ看伊ê外觀，伊是社會ê一種。雖然看起來是社會ê教會，其實是反抗所謂ê社會所成立..ê，對kah-ná是分離soah kap伊結合ê社會，通過耶穌，神所hō͘伊啟示ê團體就是教會。tī耶穌所設立ê教會內底koh無因為伊ê存在去排斥。無，兩者tī地上是仝一個體。
Hō͘抽象化ê個人只要是hō͘抽象化，就kan-ta是chi̍t-ê觀念niā-tiā，我想就是因為以抽象化當作實際存在，所以教會就受tio̍h誤解，koh變做無力。若有人離開教會，猶原是稱作信徒，hit人就無適合稱做耶穌ê門徒，應該稱做近代思想ê信奉者，我敢講chit-má ê教會己經離開本來教會ê面目真遠。我m̄驚告白講今á日ê教會對我無一thang施。但是我koh bē-sái離開教會，因為離開教會同時ê意思是講喪失我家己。這是教會若無一定存在，我個人mā無一定存在。但是教會kap我做伙存在，否定是依存他方者ê否定所成立。排斥教會就同時是排斥家己。家己ê矛盾mā就是教會ê矛盾。仝款，家己ê升高kap躍進，mā就是教會ê升高kap躍進。Kā吊橋ê一pêng ê鋼組放鬆，koh叫另外一pêng講beh koh-khah khiú-ân，án-ne做是無合理。
教會kap個人！兩者適合一..ê。當然這m̄是同意講反復無定。一定tio̍h ài把握耶穌ê啟示！ài對人存在有徹底ê省察！ài圖謀未來教會ê形相！這是我所受與ê課題。我án-ne提言m̄是向別人意圖批評，是對家己ê省思。
（頂文是筆者ê翻譯文，下圖是1934年11月26日黃彰輝主理以後，親筆寫..落..來ê自我省思。） 
1934年11月30日（拜五） 主 理：黃彰輝 聖歌 240 詩篇 47篇 祈禱 聖歌 510 默禱 出席者：吉利兄、角田兄、黃
1934年12月6日（拜四） 主 理：黃彰輝 讚美歌 50 詩篇 52-53篇 祈禱 讚美歌 450 出席： 角田、吉利、黃
下圖:東大YMCA學寮1934、1935年度早拜記錄簿表面(東大YMCA提供).
下圖:寮內村友立約參加繼續早拜koh簽名ê一頁(東大YMCA提供): 
2．1935年度學寮早拜主理記錄 1935年4月9日（拜二） 主 理：黃彰輝 讚美歌： 506 聖 經： 以賽亞 一章 出席者： 吉野、竹本、石堂、黃
愛是咱ê『道』Logos， 祈禱是咱ê武器， 咱恐驚誰阿， 懇求chit本簿子ē-tàng成做咱ê魂（靈程）ê記錄。
1935年4月12日（金） 主 理：黃彰輝 讚美歌： 534 聖 經： 以賽亞 第三章 祈 禱： 讚美歌： 322
最近我讀鎚田研一間tio̍h ê『賀川豐彥』一冊到深夜，透過偉大ê聖者來看家己ê軟弱，省察出對罪ê無感覺，我kan-tāⁿ感覺應該痛心懺悔。Tī絕對性質ê死面前，一切lóng變成相對。請看hoa̍h-kòe死線ê賀川豐彥！tī伊面前，所有ê事物看..起..來lóng kan-tāⁿ是chi̍t-ê可能ê構想niā-tiā。Kah-ná伊對所有tāi-chì，除非用絕對ê愛來貫穿萬事以外，bē-tàng停止。相信伊bē無願意kap主張『單單依賴信仰』ê狂信家爭論。當人kan-tāⁿ強調『道』ê理論，是以精神為本質，koh kā冒tio̍h名譽『成肉體』ê體kap精神隔斷，án-ne做就是造成獨斷ê唯心論宗教。我感覺領教tio̍h唯心論ê宗教便是kah-ná是koh kah-ná m̄是ē，親像受閹（Iam，去勢）所以逃避時代ē，m̄是基督教。
（頂文是tùi 1935年4月12日晚禱會記錄，筆者所做ê翻譯文，下圖是主理以後，黃彰輝親筆寫..落..來ê講章。）
1935年4月18日 主 理：黃彰輝 讚美歌： 2 聖 經： 以賽亞 8章 讚美歌： 299 默 禱：
1935年4月21日（好天）（日）舉行野外禮拜，早起6:30 tùi宿舍出發，到植物園舉行合同禮拜，後食早頓（飯團） 1935年5月1日（拜三） 主 理：黃彰輝 讚美歌： 506 聖 經： 以賽亞 18章 祈 禱： 讚美歌： 508
1935年5月6日（拜一） 主 理：黃彰輝 讚美歌： 506 聖 經： 以賽亞 22章 讚美歌： 505 默 禱：
1935年5月10日（拜五） 主 理：黃彰輝 讚美歌： 118 聖 經： 以賽亞 26章 祈 禱： 讚美歌： 228 默 禱：
(短講): 語言是表現咱存在ê器具。Án-ne，語言是連結『我kap你』ê行為ê瞬間，得tio̍h伊ê主體性。但是，有時語言顛倒發揮魔術ê本性，就表顯出客體性ê存在kap咱對立。語言就ná-ne，時常帶tio̍h雙重性格，像人本質ê規範，人癲癲倒倒體驗tio̍h愛kap自由，kah-ná既然是人，就bat直接體會..過仝款，輕可ê使用愛kap自由ê語言。M̄-koh，問啥是愛？kap啥是自由？就無容易得到滿足ê答案。若是基督教ê根本意義就是愛，án-ne我想，面臨危機ê基督教，就ài以主體去se̍k-sāi愛。另外，自由tī全面受威脅ê今á日，講若人有自由，án-ne，到底往siáⁿ-mih所在去，chiah ē-tàng chhōe tio̍h新光下ê自由？
（下圖是1935年5月初十晚拜做了主理以後，黃彰輝親筆寫..落..來ê短講，頂文是筆者ê翻譯。）
1935年5月15日 主 理：黃彰輝 讚美歌： 294 聖 經： 以賽亞 30章 祈 禱： 讚美歌： 311 默 禱：
1935年5月20日 主 理：黃彰輝 讚美歌： 322 聖 經： 以賽亞 34章 祈 禱： 讚美歌： 320 主禱主：
1935年5月24日（拜五） 主 理：黃彰輝 讚美歌： 322 聖 經： 以賽亞 38章 祈 禱： 讚美歌： 208 默 禱：
1935年5月30日（拜四） 主 理：黃彰輝 讚美歌： 506 聖 經： 以賽亞 41章 祈 禱： 讚美歌： 505 默 禱：
1935年6月初4（拜二） 主 理：黃彰輝 讚美歌： 510 聖 經： 以賽亞 45章 祈 禱： 讚美歌： 450 默 禱：
1935年6月初8（拜六） 主 理：黃彰輝 讚美歌： 509 聖 經： 以賽亞 49章 祈 禱： 讚美歌： 525 默 禱：
1935年6月13日（拜四） 主 理：黃彰輝 讚美歌： 529 聖 經： 以賽亞 53章 祈 禱： 讚美歌： 450 默 禱：
1935年6月18日（拜二） 主 理：黃彰輝 讚美歌： 253 聖 經： 以賽亞 57章 祈 禱： 讚美歌： 322
1935年7月初3（拜三） 主 理：黃彰輝 讚美歌： 450 聖 經： 詩篇 51篇 祈 禱： 讚美歌： 322 默 禱：
1935年7月初5（拜五） 主 理：狩川 浩 讚美歌： 10 聖 經： 耶利米 4章 祈 禱： 讚美歌： 568 默 禱：
（主理者特別記述以下ê言詞，值得提出：） 前歸工，石堂健二君回鄉，現今村民只chhun三名。（就是狩川浩、竹本清kap黃彰輝）希望chit本日誌無留tī任何一人手內，請注意hō͘伊ē-tàng順利ê輪轉到各村民手內，讀kap書寫。
黃彰輝tī東大YMCA宿舍ê早禱禮拜ê記錄，tī chia結束，因為9月ê第二ê學期開始，小妹黃淑英、林瑞雲表弟（大舅ê長子）、黃雅姿堂妹（二叔ê長女），lóng到東京讀冊，伊搬去『中野』由父親黃俟命牧師出資所買ê厝，tī-hia tòa，度過tī東京帝大就學chhun..落..來年半ê時間。
下圖是1935-36年，tī東京中野ê厝頭前所hip ê相片（當時tú好是落大雪了後）。後排tò-pêng是林瑞雲，正pêng是黃彰輝，前排tò-pêng是黃淑姿，正pêng是黃淑英。
黃彰輝tī東大學習ê科目
1934年（昭和9年）度： 支那哲學、文學：儒教倫理概講－－－ 2時間1單位－宇野哲人 哲學 ：哲學概論－－－－－ 2時間1單位－桑木嚴翼 哲學演習(Kant)－－ 2時間1單位－桑木嚴翼 西洋哲學史概講1－ 2時間1單位－伊藤吉之助 哲學演習(Aristotls)2時間1單位-伊藤吉之助 英米ê哲學（註一）－－2時間1單位－大島正德 倫理學 ：倫理學概論－－－－ 2時間1單位－和辻哲郎 宗教學、宗教史：宗教學概論－－－－ 2時間1單位－石橋智信 社會學 ：社會學概論－－－－ 2時間1單位－戶田 教育學 ：教育史概論－－－－ 2時間1單位－秦山 外華語 ：英吉利語（註二）－－－3時間－－－－佐佐木
1935年（昭和10年）度： 支那哲學、文學：上代支那哲學史－－ 2時間1單位－宇野哲人 哲學 ：西洋哲學史概講2－ 2時間1單位－伊藤吉之助 Aristotls.ê人間學-2時間1單位-伊藤吉之助 哲學演習(Aristotls.)2時間1單位-伊藤吉之助 倫理學ê根本問題－－2時間1單位－池上鎌三 時間ê問題－－－－－2時間1單位－金子武藏 印度哲學、梵文學：印度哲學史概論－ 2時間1單位－宇井伯壽 倫理學 ：倫理學演習(Hegel)-2時間1單位－和辻哲郎 神學ê人間學ê倫理-2時間1單位-吉滿義彥 外華語 ：英吉利語（註二）－－3時間－－－－井手
1936年（昭和11年）度： 哲學 ：人間學、問題－－ 2時間1單位－金子武藏 哲學演習（註三）－－2時間1單位－伊藤吉之助 倫理 ：日本倫理思想史概講-2時間1單位-和辻哲郎 倫理學演習（註三）－2時間1單位-和辻哲郎 論文、題目 ：『アウグスチヌスにtīける記憶の研究』 “Augusuchinusu ni okeru Kioku no Kenkyu” （奧古斯丁Augustine關於記憶ê研究）
根據黃彰輝ê自傳，當時ê東京帝大，至少哲學科是由學生家己作kui-ê三年課程ê計劃。一年度有三個學期，chi̍t-ê學期大約取 4個單位，必修ê科目少，但是mā因為án-ne，學生有真chē tī課外讀冊研究ê時間kap必要。所上ê課目，大概lóng是『概論、概講』。教授lóng無分專門ê題目，根據學生ê需要，替學生考量koh講述。
根據東京大學ê資料，桑木嚴翼（1874－1946）tī東大文學部哲學科擔任第一講座，是當時siōng老ê教授，m̄-koh，因為伊tī 1935年已經61歲， tī hit年退休。Mā是黃彰輝入學ê hit年，所以伊一定是為tio̍h beh修桑木ê課，盡力jiok-tio̍h。看伊ê學術記錄，黃彰輝kah-ná jiok-tio̍h桑木教授siong尾一班ê課。
註一：tùi東大成績記錄轉載：『英米』為『英美』ê意思。 註二：tùi東大成績記錄轉載：『英吉利語』為『英語』ê意思。 註三：『演習』是『討論課』ê意思，像英語內底ê SEMINAR。
- 《台灣人e5先覺─黃彰輝傳》文章索引 | RSS | 寄給朋友
- « 上一篇 | 下一篇 »
