《台語網放送頭》

 | | | 轉寄

抗議國家台灣文學館降級

作者 Sêng-hiân 2007.09.09

台灣文學館是咱國頭一間國家級ê文學博物館，按政府組織再造方案，經過行政院核定以行政法人組織型態成立，並且 tī ○三年十月十五 kā「國家台灣文學館設置條例草案」函送第五屆立法院審議，m̄-koh bē 赴完成三讀，組織立法做粿增差無包餡。第六屆重 koh 提案，現此時立法院猶有 1 ê 會期審議，是按怎文建會大主大意 tī 八月十五 kā「國立台灣文學館組織規程」kap「國立台灣文學館辦事細則」報請行政院核准，koh 公告實施，hō͘ 台灣文學館 ùi「國家級機構」降做「四級行政機關」--leh？

文建會 chiah-ni̍h-á 緊手的 kā 國家台灣文學館籌備處 khanjio--起-來，按算 beh 引進濟濟公務人員，kā kap 國家台灣文學館籌備處 saⁿ-kap 拍拚 soah 無公務人員資格 ê 契聘人員 lut 任。按呢 kám 有平正？借問文建會 ê 大人，文學館 chhím 開館，就向行政法人法制行 ê 發展方向，是 m̄ 是已經為著 beh hō͘ 工作權受政府保障 ê 公務人員，有 koh khah 濟選擇 ê 機會，choaⁿ-á phah 擦銷--去-a？Taⁿ 行政組織不時替換，無彩國家資源，kám m̄ 免向社會來公開說明？Koh 未來公務人員占大多數 ê「國立台灣文學館」kám ē-tàng sòa 接發揮文學博物館上大 ê 路用--leh？