《媒合也可以尋著真愛》

 | | | 轉寄

chē過頭ê愛

作者 劉峯松 2011.07.31

影響或者阻礙婚姻ê因素真chē，家庭mā是其中一ê；咱chit篇討論ê，to̍h是家庭有可能成做婚姻路上ê鎮路石。

有人自細漢父母雙亡，有人是出世是單親家庭，或者由老父晟養大漢、或者由老母一手liap大ê，狀況lóng無仝。單親ê原因，或者是父母有一ê過身，或者是父母離婚，m̄管出是tī toh一種情形，家庭lóng是無健全、無正常。tī toh一種家庭出世，所謂「出身」，to̍h是天命，無thang好選擇kap逃避，只好認命。Chiah-ê「出身」辛苦ê，欠缺完全ê愛，to̍h是自細漢ê愛無夠，萬事to̍h靠家己、lóng是家己來；背後無父母支持ê力量，看起來無啥有力，立足點差人一節，khah bē穩固、比較khah食虧。有ê因為án-ne造成性格上kiu-kiu、自卑、優柔、欠缺自信；若經濟條件koh無好，生活lóng發生困難，婚姻大事mā只好khǹg一邊、交hō͘天安排啊。特別tī當今ê功利主義社會，chit種家庭mā是khah無使人歡喜ê，有人一探「家風」，探出狀況，除非當事人愛情堅貞或者特別優秀將才，無就會時常hō͘棄嫌、回絕，真正是m̄知beh án怎chiah好！

不過最近有一kóa會員講起「身世」，soah hō͘我認知上大大改變，得tio̍h真chē經驗。人teh成長過程雖然ài óa靠父母，但是若因為家庭出狀況chiah必須ài khah早出社會自立自強，其實mā m̄是pháiⁿ-tāi。阮發現有人出身單親家庭或者是孤兒，經過磨練，個性獨立堅毅，做tāi-chì真積極；安分守己，bat tāi-chì、真成熟；謙虛、知影撙節，bōe驕傲，其實有koh-khah好ê人格特質kap表現。特別有一位父母離婚ê羅貝講：「我kā父母不幸ê婚姻當做鏡，這一代會珍惜緣份，重視家庭，絕對bē行仝款ê路。」這段話感心無停。最近大家知影ê美國民主黨贏過來ê總統候選人歐巴馬，mā出世tī單親家庭，老母koh嫁hō͘人二pái，看起來m̄-nā無影響伊ê成長，顛倒是造就伊成功ê主要關鍵。可見不足ê疼、無夠ê疼，無一定不幸、無好，lóng是看個人án怎對應，而且mā m̄ bōe構成婚姻路上ê阻力。

講到另外一種家庭，to̍h是ㄧ般家庭，父母健在、感情和樂，生囝晟囝lóng盡心盡力，hō͘ in受良好ê教育、lóng有良好ê身心發展，而且做牛做馬mā甘願，chit種幸福家庭是咱一生一世teh phah拚追求ê，伊是咱人生奮鬥ê重要目標，mā是咱人存在ê價值kap意義。性命若出世tī án-ne一個平穩安全ê家庭中，啥物lóng無欠、koh充滿愛，也thang講造化有功、一種好字運；chit種幸運ê人並m̄是靠phah拚得tio̍h或者意志決定ê，mā hō͘人欣羨--kah。M̄-koh咱beh講ê是tī chit種家庭內面，mā有出狀況ê時。

有一kóa父母對kiáⁿ兒關心過頭，疼kah siuⁿ過份，soah致使kiáⁿ兒bōe大漢，依賴性真強，無獨立性，mā無判斷力，tī事業上koh算ē-sái，tī婚姻路上mā tiāⁿ-tiāⁿ一事無成。有一kóa羅貝靠父母幫忙chhōe對象，有一kóa瑪麗mā仝款，但是媽媽主導婚姻ê態勢koh比爸爸khah強。真chē人晚婚，當事人雖然真tio̍h急，但是做老母ê koh-khah tio̍h急，所以khà電話來問ê，真chē lóng是媽媽；陪in面談ê，mā tiāⁿ-tiāⁿ是媽媽；「相親」ê時伊出現tī邊á，阮kā問「相親」了後ê意見，當事人「惦惦」，又koh是媽媽代替伊回答。做人kiáⁿ兒ê人雖然ài凡事相信、凡事服從，唯「母」是瞻；但是mā有一kóa會員tiāⁿ-tiāⁿ一面無辜、無奈，坦承家己無法度做主。一位瑪麗講：「我十六歲ê時老母就開始限制我交男朋友，如今已經四十歲啊，看伊iáu ē-tàng án怎？」koh有一位仝款超過四十歲ê未婚瑪麗偷偷á kā我講：「只要老母iáu活teh，我就嫁bōe出去啊！」chiah-ê瑪麗家庭富裕，對kiáⁿ兒期待真koân，mā真用心栽培；而且lóng看做掌上明珠，絕對bē chiah簡單kā割分開。只是án-ne一心一意beh替公主chhōe王子、揀來揀去，但是時間是無等人ê，結果hō͘寶貝千金一年過一年，當然姿色mā一年不如一年，行情jú來jú低。特別hō͘人懷念ê是，有一kóa媽媽看起來人生經驗豐富，koh非常迷信，比如「我cha-bó͘-kiáⁿ肖羊， bōe-sái chhōe肖虎ê，會欺負伊」、「我cha-bó͘-kiáⁿ肖馬， bōe-sái chhōe肖雞ê，會kā伊啄」、「相命ê講，我cha-bó͘-kiáⁿ只適合差四歲ê」、「我cha-bó͘-kiáⁿ ài廿八歲了後緣份chiah會到」……。Chiah-ê媽媽過度保護，hō͘ in siuⁿ-chē愛，koh聽信江湖術士之言，限制一大堆，自然就耽誤kiáⁿ兒ê終身大事；雖然最後忽然間chin-sîn，只是lóng已經siuⁿ慢啊。講到爸爸siuⁿ過強勢、疼得siuⁿ猛，soah阻礙tio̍h囝兒婚事ê人，mā是有，有一個年超過半百ê絕世美女kā我講：「阮老父chit-má變成植物人，tī病床頂lóng bōe振bōe動，我chiah算得tio̍h自由啊。」in老父iáu未變植物人chìn前，為伊ê婚事善盡職守、嚴格把關，而且已經到心力交瘁ê地步，也thang講疼入心，kā父愛發揮到siōng koân，結果是kā家己害慘啊。試問：世間siáng siōng大？當然是父母siōng大；但是tùi父母所造成ê耽誤，做人kiáⁿ兒ê人koh ē-tàng講啥、koh敢講啥neh？這真正是人間矛盾，mā是人間憾事！

可見父母ê愛siuⁿ-chē mā無好。

堂‧吉訶德ê使用人桑丘，心想有一工家己若做總督了後，就應該kā cha-bó͘-kiáⁿ瑪麗嫁hō͘伯爵或者鄉紳，但是伊ê bó͘泰瑞薩soah無仝意，伊ài kā瑪麗嫁hō͘庄頭內ê羅貝，講：「咱chia胡安‧多丘ê kiáⁿ羅貝‧多丘是一個身強力壯ê囡仔，你我lóng認bat；我知影伊對咱們ê姑娘真有意思。In-tau kap咱門戶相當，是真好ê一門親。」(Ⅱ5)泰瑞薩to̍h是主張尊重當事人ê意願，父母mài插手，而且siōng好「門戶相當」─「逐隻羊long2ai3有sù-phuè，婚姻ài門當戶對」，這mā是阮婚姻紹介ê「泰瑞薩觀點」，以及一大堆羅貝kap瑪麗ê由來。講真正ê，父母對kiáⁿ兒ê婚姻是ē-tàng關心，soah bē-tàng干涉siuⁿ-chē siuⁿ深，soah致使造成「愛之適足以害之」ê一kóa驚人ê後果。

本文出自玉山社出版《媒合也可以找到真愛》