《台語kah魔術》

 | | | 轉寄

彰化台一線遊記

作者 蘇晏德 2018.02.04

彰化台一線遊記

2017年2月初2拜四(咱人正月初六)烏陰天，早時9點出發，今仔日ê目的地是彰化
縣ê溪州、田尾、永靖(Ián-chiān)三ê鄉，chit三ê行政區是tī彰化縣ê南
pêng(俗稱彰南)，chit三ê鄉是第一擺來，以前bat坐車經過，對chit-ê所在無
特別ê印象，chit擺是因為beh去溪州公園，順路去永靖(Ián-chiān)聽永靖人講
台語，順紲來一回深度ê旅遊。

第一站：『溪州公園』，kah牽手--ê二人，車chiūⁿ路竹交流道上北，沿國道1號
lo̍h西螺交流道，轉台一線經過濁水溪ê橋頂，看對倒手pêng、紅色ê鐵轎~西螺大
橋，國中畢業旅行有對chia經過，he是43冬前ê代誌ah，西螺大橋是我欣慕想beh
去ê所在，真可惜chit擺我無牽tio̍h你ê手。駛過濁水溪著是彰化縣，車到溪州加
油站加油，我用台語kah加油員對話門路，查某ê工讀生用真liú-lia̍h閣親切ê台
語kā我回答，我tng面kā伊呵咾鼓勵，因為beh講台語ê少年人愈來愈少ah，尤其
是查某囡仔；鼓勵人講台語是台語人ê責任，chit-ê查某囡仔hoō我留落真深ê印
象。對加油站正oat、駛幾百公尺tio̍h8到溪州公園，彰化縣溪州鄉ê溪州公園，是
全國面積上大ê平地公園，面積有123公頃；溪州公園tī 2004年舉辦花展博覽會，
名聲隨傳遍全國，當時ê名「溪州花博公園」，彰化縣政府按照澳洲墨爾本的費茲洛
公園重新規劃，2014年改名「費茲洛公園」，tī-chia舉辦2014花tī彰化活動。
M̄-koh改名出現反對聲音，自按呢「還我溪州，無愛仿冒的費茲洛」連署，得
tio̍h相當熱烈ê響應，ia̍h有真濟民眾笑講「肥豬肉公園」，這馬閣改轉來溪州
公園。2017年溪州公園ê金雞花展仝款真chhia-iāⁿ，吸引將近百萬人來參觀，阮
大約tī-chia停跤三點鐘，tī公園大門口、kā一ê阿婆買一粒肉粽kah一塊chhì-
kak粿，我ê目的是beh hām老人講台語，然kî後徙跤離開溪州公園。

第二站：『田尾公路花園』，離開溪州公園、上北沿台一線，經過寶斗、這是
hōo人放拺ê舊地名，這馬街路ê地摽攏寫北斗，外地人已經袂記得寶斗chit-ê在地
真實ê地名，一府、二鹿、三艋舺、四寶斗，已經鑽入時間ê磅空，寶斗已經離咱足
遠足長。車liâu-liâu-á駛過chit-ê曾經繁華ê小鎮，來到田尾公路花園，車
chhah tī公園邊ê停車場，tī公園聽tio̍h pa-pu pa-pu ê喝賣聲，kā賣冰ê大
哥買一粒芋冰，順紲探訪地方特色，伊講chia有足濟店、會使去lau-lau leh，
足濟店？喔！原來是花店；四界行、hām che庄跤所在嘛真鬧熱，聽講chia是台灣
上大ê花園，規叢好好，四界攏是園藝店，ta̍k所在攏是花花世界，賞花免出國、
來田尾包君滿意。Tī散步中途湊抵坎(chhàu-tú-khám)、路nih有一位大姊講：
今仔日khí-moo su̍t put lí giang，chiâⁿ久無聽tio̍h這款親切ê話語，
我kā伊比讚，台語人愛揣回kiông beh失落ê台語。

第三站：『永靖(Ián-chiān)』，車沿台一線繼續上北來到永靖；無講你m̄
知，我來永靖ê目的是beh chhōe永靖人講話，聽永靖人講台語；聽講Ián-chiān
ê ki-á-pian lián-lián tiān-tiān，pòaⁿ-mê ke-lōo lián-lián
chhian-chhian (永靖的枝仔冰冷冷碇碇，半暝街路冷冷清清)，『eng』ê音、
講『ian』，是永靖ê特色。車停tī永靖國小門口，守衛室內面有二ê中年婦女，佮
in破豆大約講十thóng分；紲接去成美文化園，佮園區的工作人員開講，雖罔講甲
真投機，m̄-koh真可惜，濟濟永靖人已經失去in ê原味，永靖腔khah輸我chit-
ê外地人；我問一个二十幾歲ê查某囡仔，『行政院』台語按怎講，伊講hêng-
chèng院、無講hiân-chiàn院。台灣各地ê腔口若beh保留，需要提倡羅馬字，若
無各地ê腔口會hōo強勢腔食掉，終其尾台語會hōo華語消滅，天佑台灣、天佑台灣
各族群語言，台灣人m̄-thang閣睏ah。
永靖國小的對面，tio̍h是頂新集團ê成美文化園，來chia參觀ê人真濟，號做『成
美』是為著beh成人之美，因為毒油事件，頂新魏--家、sòa hōo chit-ê世外桃
源『成美文化園』留lo̍h污點，來chia參觀免門票、茶點攏免錢，m̄知是beh回報
鄉親抑是beh贖罪。Chit-ê園區有一條巷管(kóng)，巷管(kóng)是我來chia對
一位大約六十thóng歲ê婦女學--tio̍h ê台語，雙面種落羽松(落羽松是樹仔
名)，所以形成一條巷管(kóng)，景色kán-na用一字來形容~媠。紲尾車駛到永安
街ê永靖故事牆，這片牆畫tio̍h先人ê點點滴滴，kah hōo人懷念ê過去，有二ê
20幾歲、對田中來ê查某囡仔嘛來翕相，我kā in講：懷念過去愛講台語，kā in
洗腦！講台語ê好處，我感覺in有聽--入去，我閣講一擺，鼓勵人講台語，是台語
人ê責任。阮tī-chia hip一張相片，然kî後車離開永靖駛到寶斗交流道chiūⁿ高
速公路，踏入回鄉ê路途，又閣是美好ê一日，彰化感謝--你。