《台語kah魔術》

 | | | 轉寄

八月中秋0815

作者 蘇晏德 2023.09.24

八月中秋(台語文) 蘇晏德

八月中秋看月娘
Peh-goe̍h Tiong-chhiu khòaⁿ goe̍h-niû
月娘圓圓若像球
Goe̍h-niû îⁿ-îⁿ ná chhiūⁿ kiû
全家來食文旦柚
Choân-ke lâi chia̍h bûn-tàn-iū
逐家歡喜過中秋
Ta̍k-ke hoaⁿ-hí kòe Tiong-chhiu

八月中秋人團圓
Peh-goe̍h Tiong-chhiu lâng thoân-îⁿ
月娘圓圓月餅甜
Goe̍h-niû iⁿ-iⁿ goe̍h-piáⁿ tiⁿ
平安喜樂中秋暝
Pêng-an hí-lo̍k Tiong-chhiu mî
逐家耍甲笑微微
Ta̍k-ke sńg kah chhiò-bi-bi

八月中秋放煙火
Peh-goe̍h Tiong-chhiu pàng ian-hóe
囡仔相招覕相揣
Gín-á sio-chio bih-sio-chhōe
大人啉茶講笑詼
Tōa-lâng lim-tê kóng chhiò-khoe
快樂中秋平安過
Khoài-lo̍k Tiong-chhiu pêng-an kòe

八月中秋問嫦娥
Peh-goe̍h Tiong-chhiu mn̄g Siông-ngoô
天頂敢真有玉兔
Thiⁿ-téng kám chin ū gio̍k-thoò
若有阮會足欣慕
Nā-ū goán ē chin him-boō
月娘叫阮用心悟
Goe̍h-niû kiò goán iōng-sim ngoō