《台語kah魔術》

 | | | 轉寄

教囡仔寫台語詩

作者 蘇晏德 2016.03.20

教囡仔寫台語詩~經驗分享

Tī社會上教台語有20冬ê經驗，踏入學校教學生有14冬久，一直到4冬前才想著我若
退休離開學校，我教台語ê歷史會留lo̍h啥物記錄，是m̄是留lo̍h空白ê記tî；若
按呢敢是真可惜，著因為按呢才開始教囡仔用台語寫作；因為寫作會當tī台語界ê歷
史留lo̍h美好ê見證，透過台語寫作hoō學生佮老師留lo̍h永遠ê記tî，這是台語
老師ê時代任務。

有人teh講，教囡仔講toan-tiah(道地)ê台語已經是無簡單ê一件代誌，何況beh
寫台語詩。天下間無oh-chiâⁿ ê事，看咱是m̄是beh去做；代先我叫囡仔練習寫
作ê時，in攏hăⁿ一聲，káⁿ-nā袂輸愛in ê命。經過我ûn-ûn-á說明，ta̍uh-
tauh-á就有作品一篇一篇浮上檯面。我kā囡仔講，寫台語詩愛有詩意、感情抑是趣
味性，tō是講若無詩意佮感情，上無嘛愛有趣味性。經過我ê分析佮開拆，囡仔沓沓
仔就進入狀況。

我kā囡仔講，寫台語詩愛用台語思考，千萬m̄-thang用華語思考；台語漢字若袂
曉寫、用台語羅馬字來寫，羅馬字若袂曉有對照表通查，若閣袂曉、台語m̄-bat ê
字ē-sái問老師。囡仔若是用華語kā我問，我會講請你用台語問；譬喻講：伊若kā
我問『好像』的台語按怎講、按怎寫，我袂kā伊講，因為伊無用台語思考；伊若問
「親像」兩字ê台語按怎寫，我才會寫hoō伊了解，因為這ê時陣伊有用台語思考。
教囡仔teh寫台語詩ê時，百分之百愛用台語思考，不准用華語來思考，若用華語來
思考無法度寫出有詩意、有感情佮趣味ê台語詩。全新ê台語思考方式，m̄-nā
hoō囡仔台語進步，嘛hoō囡仔ê台語聽、講、讀、寫ê能力攏得著幫贊。

Tī寫台語詩ê時，囡仔會用心去思考，伊用台語做中心，這是chit-má ê教育m̄-
bat有ê經驗。當然m̄是每一ê囡仔攏有法度完成作品，因為一禮拜才一節台語課；只
要老師用心鼓勵、貼心指導，囡仔ê作品就是對老師上好ê回報。Tī寫台語詩ê過程
會發覺無仝款ê囡仔，有無仝款ê個性；對in ê作品當中發現無仝款ê囡仔世界，對
囡仔ê台語詩了解伊ê家庭背景，發現伊內心ê點點滴滴。

下面是台語囡仔詩ê題目，hoō逐家做參考：時間、我的家、心情、爸母、Hú仔
kah鉛筆、四季、親人、朋友、個性、教室、日頭、體格、山、月娘、上天、雲、大
自然、星辰、天公伯仔、花、老師的話、做環保、學校、台語老師、日頭花…等。