《台語kah魔術》

 | | | 轉寄

總統啥物名？

作者 蘇晏德 2014.12.07

蘇晏德講笑詼~~總統啥物名？
阿才讀國小ê時功課無好，啥物lóng bē，老師想beh kā加分lóng揣無理由，想
講問siōng簡單ê問題，伊一定ē-tàng加分，老師問阿才：總統啥物名？阿才講：
我m̄知，老師講：馬英九，過無juā久老師koh問阿才總統啥物名？阿才koh講：我
m̄知，老師講：你ná ē koh bē記得leh，阿才講：我nā超過五分鐘tō bē記--
得，老師講：nā五分鐘beh到，你心內tō唸馬英九，án-ne你tō ē記--起來。
老師開始上課，老師講：宋朝ê時，岳飛hoō秦檜害--死，chit ê時陣阿明teh
tuh-ku，老師行到阿明ê身邊，大聲問阿明：岳飛啥人害--死，阿明講：我無害死
岳飛，老師koh問：岳飛啥人害--死，坐tī後壁ê阿才大聲講：馬英九，老師
chhoah-chi̍t-tiô，對阿才講：你ná ē講馬英九害死岳飛leh，阿才講：五分鐘
到ah，我ài講馬英九，nā無我tō ē bē記leh，老師講：你hoah tī心內tō好。
老師繼續講：國民黨kap共產黨tī中國發生內戰，國民黨hoō共產黨趕來台灣，
chit-ê時陣阿明koh teh tuh-ku，老師問阿明：國民黨hoō啥人趕來台灣，阿
明講：我無趕國民黨來台灣，老師大聲hoah：國民黨hoō啥人趕來台灣，坐tī後
壁ê阿才講：馬英九，老師講：阿才，m̄是馬英九是共產黨，阿才講：五分鐘ah，
我驚bē記leh，老師講：唸tī心內tō好。
老師繼續上課，忽然間有人放屁，老師講：啥人放屁，阿才講：馬英九，到下課ê
時，老師講：今仔日啥人掃便所，阿才講：馬英九（因為五分鐘到lah），老師kā
馬英九三字寫tī烏枋，kā阿才講：明仔載我beh問你總統啥物名？你nā知影，我tō
beh送你禮物，阿才kā馬英九三字寫tī內褲，阿才tńg--去洗身軀ê時，無換內
褲，第二工上課ê時，阿才lóng teh看內褲，ǹg望老師kín問總統啥物名？m̄-
koh老師lóng無問，第二工tńg--去洗身軀ê時，kāng-khoán無換內褲，阿才in
阿母利用伊teh睏ê時，kā阿才ê內褲換來洗，第三工老師有帶禮物來，tō問阿才
講：總統啥物名？阿才開始看伊ê內褲，老師驚一tiô問：為啥物teh看內褲，阿才
講：總統tī我ê內褲，老師問：總統啥物名？阿才大聲講：總統ê名叫做「小YG」--
----，老師講：「小YG」是chit條內褲ê牌chú，阿才用堅定ê口氣講：總統ê名叫
做「小YG」絕對無m̄-tio̍h。