《受恩蒙福的一生》

 | | | 轉寄

得勝ê人生

作者 林宗要 2011.02.20

約翰一書五：1-12

工商業ê發達，hiah-ê人汲汲營營teh追求功利，因此「成功」成做現代人所燒熱烈追求ê目標。近幾年來有關chit種「成功」ê書籍不斷地出版，這顯示現代人心中ê「價值觀」，mā顯明人性ê真實面。因為好勝是人ê天性，所以tī人生中，咱tiāⁿ-tiāⁿ會發生好強誇耀ê情形，証明了人類chit種「好勝癖」。雖然適度ê好勝心，對人生有所幫助，但是過份ê時就會失態，甚至產生人格ê問題。Tī咱ê社會上tiāⁿ-tiāⁿ有一kóa「假仙」kap「澎風龜」to̍h是chit種過份ê誇口心所致ê結果。勝利ê喜樂，每一個人lóng經驗過。Tī春秋時代，秦武王是出名ê大力士，tī伊身邊有兩個勇士真受伊ê寵恿——任鄙kap孟賁。有一pái孟賁看見兩隻牛相鬥難分難解，伊一手chhi̍h一隻ê角，另gōa一隻iáu想beh鬥，伊受氣隻kā伊掠起來，正手大力kā牛角挽掉，牛死。有一工王帶二人來到周都，看見九鼎，武王講：「kám有人ē-tàng kā伊舉起來？」眾人lóng知武王好勝，因此lóng講言bōe-sái，任鄙提議講，孟賁真gâu舉重，舉起來koh行，武王mā舉起來行了幾步（beh誇示伊ê氣力真大）但是soah因為力不足鼎chiah lak落來壓tī腳頂koân，將腳指頭ê骨頭teh斷，流血siuⁿ chē soah死去。Chit-ê故事teh說明人ê好強、好勝ê心理，有時過份要求，顛倒會造成人生ê不幸。

有時咱teh信仰ê世界mā會發生chit種事實。教派之間ê互相評論to̍h是一例。自認是屬靈ê人往往會真無客氣批評伊感覺無gōa好ê教派。長老教會是siōng chiap hō͘人攻擊ê目標。

真chē自認為是屬靈派ê人往往批評其他ê教派是無靈性。相信tī咱ê信仰生活中，咱tiāⁿ-tiāⁿ會有chit種經驗，有人嫌咱ê教會無夠屬靈chiah離開去其他教會。Chit-ê時陣基督徒必須反省一項事實－啥物是「聖靈內涵」？Kám講是hiah-ê外表跳舞唱歌祈禱大聲喊「哈利路亞」「阿們」ê人？並m̄是án-ne，屬靈ê基督徒必須ài teh生活、家庭、職業上有美好ê見証chiah會受tio̍h尊崇。雖然咱bōe曉跳靈舞，咱祈禱ê時bōe大聲hoah，但是只要咱ē-tàng teh生活上、家庭中、職業上受人肯定ē-tàng榮耀上帝，我相信chit種有見証ê生活會比跳靈舞koh-khah討上帝喜樂。這是信仰ê真理，若是，一個基督徒tī外表雖然有熱情ê表現，比如祈禱大聲hoah，但是伊ê生活若bōe-sái榮耀上帝，無好見証，試想，chit種人beh如何稱伊做屬靈ê基督徒？

因此基督徒必須ài建立一個共識，to̍h是經由生活ê見証來宣揚信仰。這是教會二千年來所強調kap要求基督徒信仰生活ê真正內容。

理所當然ê，面對tio̍h外教派ê批評，咱也tio̍h適度反省，當咱見tio̍h別ê教派ê信徒，對聖經真理ê了解若真透，傳講福音ê熱情，以及完全ê投入教會事奉，咱chiah-ê hō͘人看做無夠屬靈ê基督徒，必須ài自我反省。宗教信仰雖然m̄是kan-ta有感情，咱iáu bē-tàng bē記熱情ê信仰氣氛，對信仰生活所造成ê正面作用。

尤其是tī教會生活中，咱體會tio̍h jú是熱情ê信仰表現，jú ē-tàng有得勝ê信仰生活。Tī教會中表現美好ê事奉者通常lóng有一粒火熱ê心。

咱評斷別人ê成敗，m̄是現在伊手中有啥物，是伊tī人生觀是m̄是有正確。社會上，真chē好額子弟，有非常好ê人生條件（手頭有豐盛ê人生資源），但是in因為無健全、偏差ê人生觀來成做了尾á-kiáⁿ，反之有一kóa非常sàn-chhiah ê人，兩手空空，soah ē-tàng建立理想、健全ê心態，因此經過幾十年ê phah拚chiah有所成就。

因此我知影，人生態度是直接影響人生成功siōng根本ê因素，基督徒ê信仰生活koh-khah需要chit種正確ê心態，持有正確信仰價值觀ê基督徒，teh信仰生活上，必定結美好ê果子。但是真chē有無健全信仰心態ê人，tī教會生活中ê表現往往成做教會ê負擔。

無健全、偏差ê心態是造成人生失敗ê主因，teh信仰ê世界mā相仝，無正確ê人生態度bōe造就基督徒ê信仰，對教會mā bōe有好處，這自然是bōe榮耀上帝，下面幾點是tī主內當建立ê正確人生觀：

（一） 建立用信仰來贏過chit世界ê人生
約翰kā咱講一個真理：上帝ê囝兒ē-tàng贏過世界，咱戰勝世界是因為咱ê信（約翰一書五：4）。

所謂勝利ê人生，必須tī人生ê各方面，lóng有戰勝一切ê表現，人生ê成就，是bōe-sái靠幸運來得tio̍h。愛迪生ê名言，「天才是99％ ê汗水kap phah拚chiah建立ê」咱看真chē世上偉大ê成功者，in ê人生旅程中lóng經歷過一段奮鬥phah拚ê苦境，chiah有驕傲ê成就。

因為teh創造ê起初，人反背上帝，上帝hō͘人類犯罪ê懲罰to̍h是：「所有ê土地因為你ê緣故受tio̍h咒懺，你tio̍h終身辛勞chiah ē-tàng生產夠額ê糧食。你tio̍h汗流滿面chiah食會飽，你tio̍h 做穡，一直到你死去，歸tī塵土」（創世記三：17～19）tī chit段經文，咱thang看tio̍h人生ài phah拚ê必然背景，本來上帝所創造ê世界將人安置tī伊甸園內，但是chit種快樂ê生活soah hō͘罪所破壞，自人類犯罪以來，上帝就將犯罪ê人趕出樂園，自那時chūn開始，人to̍h ài透過流汗kap phah拚chiah ē-tàng生存。咱mā thang講，人是活tī上帝ê受氣中（因為犯罪chiah受tio̍h咒懺！）Chit種生活並m̄是上帝創造人ê本意。上帝將創造ê人安置tī伊甸園中，表示上帝賜hō͘人ê生活本是快樂ê，可惜罪hō͘人生變成失敗ê人生，因此人必須恢復成上帝ê kiáⁿ兒ê身分chiah ē-tàng有勝利ê人生，chit種tùi罪ê釋放m̄是óa靠人ê義，是tī上帝ê恩典，to̍h是基督耶穌十字架ê救贖，tùi基督寶血ê救贖，犯罪ê人chiah ē-tàng koh再恢復成做上帝ê囝兒，chit種成做上帝ê囝兒ê過程，to̍h是基督徒ê信仰生活，mā to̍h是約翰所講ê tùi上帝所生ê人生。只有án-ne，人chiah ē-tàng贏過世界。因為經過人ê信仰，chiah ē-tàng接觸tio̍h上帝ê大能kap福音ê表徵－基督耶穌，因此基督ê靈自然會賜予聽祂真理ê人身上。Chit種受聖靈感動ê人生，自然是勝利ê人生， mā to̍h是保羅所講tī伊ê人生中會結聖靈果子ê人生，自然勝利是屬chit種人ê，因基督ê靈所充滿ê人生，自然ē-tàng用祂ê靈運用tī人生ê過程中，tī真chē人生ê選擇有良好ê指引，因為聖靈ê角色正式指引屬基督耶穌ê信仰者行teh符合伊ê真理ê路頂koân，chit種真理ê路，mā to̍h是人生成功ê路。

因為咱人生ê路時常有彎曲坎坷ê狀況，若無特別ê力量做人生ê動力，真gâu跋到，m̄-koh當一個人有信仰ê時，tiāⁿ-tiāⁿ人生會產生奇妙ê變化，真chē信仰者teh生活中因為有奇妙ê變化chiah ē-tàng克服真chē逆境kap難題，人所看做無可能ê tāi-chì，tiāⁿ-tiāⁿ因信仰chiah解決。人生加上信仰，tiāⁿ-tiāⁿ有hō͘人料想bē-tio̍h ê結果。雅各tī曠野ê時ê經驗（創世記廿八），當時伊ê內心是煩悶、不安、驚惶，但是teh信仰內底kap上帝連結了後，chit種對拋荒地ê驚惶kap不安soah變成伯特利（上帝ê厝），hō͘伊體驗tio̍h上帝ê榮耀，tú親像聖詩287首：「苦境變為聖路」，chit時ê人生to̍h是勝利ê人生，m̄管伊ê景況如何，lóng已經ē-tàng完全體驗tio̍h得勝ê性命。

面對誘惑ê時，有信仰ê人tio̍h用信仰ê盾牌來防惡ê利誘，hō͘人生teh試探中得勝。信仰hō͘咱kap基督連結ê時就成做上帝ê囝兒！只有相信耶穌是上帝ê kiáⁿ兒ê人，chiah ē-tàng戰勝世界。（約翰一書五：5）

誠然！相信者tī現實生活中，有siuⁿ-chē真pháiⁿ了解ê tāi-chì，若用信仰ê角度觀察，咱就會了解保羅所講「萬事lóng互相效力，叫愛神ê人得好處」（羅馬八：28）體會chit種人生to̍h是得勝ê人生。最後咱來思考死亡kap信仰，死亡會吞掉人生ê一切，化一切變做烏有，但是當人用信仰贏過死亡ê時，就變成復活kap永生，這kám-m̄是得勝人生？

（二） Tùi疼來完成ê人生
勝利ê人生，是beh tùi信仰來形成ê人生，因為人生真chē現實ê狀況實在m̄是軟弱無完全ê罪人ē-tàng應付--ê。人生ê tú-tio̍h逆境、心靈ê衝突、信心ê動搖等，chiah-ê問題有一kóa時chūn確實m̄是人所有法度負擔ê，用人ê氣力實在無辦法面對，一定ai 3 tùi上帝hia來ê信仰力量來扶正、引chhōa處tī真chē問題中ê人生，行tī上帝所喜樂ê人生道路頂koân。

信仰（特別是基督教信仰）tiāⁿ-tiāⁿ kap「疼ê行為」有深切ê關係，有人用疼ê行為當做解釋信仰ê siōng好工具，說明疼kap信仰ê實質關係。因信仰是抽象--ê，必須經過具體行動——疼，chiah ē-tàng証實信仰偉大ê內容kap價值，teh信仰ê世界，無疼ê信仰是bōe受肯定ê。雨果ê悲慘世界－ē-tàng改變hit位主角人生觀ê，m̄是主教ê信仰，是伊疼ê完全表現。Ná親像頭前講--ê信仰ē-tàng創造奇蹟仝款，teh疼ê行為中mā有chit種偉大ê真理，有學者強調主耶穌ê神蹟，to̍h是祂完全ê疼ê表現。因為一切ê問題lóng會phah teh疼ê面前，中世紀ê法蘭西斯tiāⁿ-tiāⁿ tī山野中kap毒蛇猛獸做伙，講道hō͘ in聽，因為伊有完全ê疼，因為疼會kā一切溶去，無論任何tāi-chì lóng會hō͘完全hō͘疼溶去，這是事實。以賽亞書十一章teh描寫彌賽亞理想國ê時，gín-á tī毒蛇孔出入mā bōe受傷，因為tī其中充滿tio̍h疼，疼會醫治人生一切ê苦悶，化解人之間ê爭端。箴言「怨恨會惹起爭端，仁愛會遮蓋真chē罪過」。Tī人世間所有ê鬥爭怨恨lóng是因為欠缺疼，chit種狀況m̄是人所樂見ê。假使人一直活teh充滿仇恨ê環境中，是bōe有理想ê日子--ê。比如過去ê東方kap西方ê對立，以及猶太人kap阿拉伯人ê仇恨，hō͘人ê生存建立tī不安kap仇恨中，chit種生活方式bōe-sái算是得勝ê人生！

因為咱欠缺疼，致使tī咱ê中間有猜疑、怨恨、自我中心，tī chit種境況中欠缺溫和ê空氣kap甜蜜ê氣氛，所以「疼」to̍h是造成人生勝利ê主要因素，若無伊，人生就無法度得勝。

咱chiah-ê已經體驗tio̍h上帝ê疼ê基督徒，必須ài tī人生中，傳播koh-khah chē疼ê行為，kā che成做咱得勝ê人生基石，án-ne，咱ê人生必然得勝！

（三） 有永恆ê性命（約翰一書五：11～12）
最後咱來思考得勝ê人生，是有永遠ê性命--ê。Tī chit段聖經中kā咱講：基督耶穌ê性命是用水加上十字架頂ê血ê性命，雖然真chē人懷疑，但是上帝ê靈親身見証chit項tāi-chì。因此，用這三者——水、血、靈ê見証來証明基督耶穌是上帝ê kiáⁿ兒。咱知影，証人通常lóng有決定性ê影響。（譬如案件真pháiⁿ有進展，若有一個証人，就簡單解決阿！）tī人án-ne，koh-khah m̄免講上帝親身見証ê基督耶穌，這比任何人ê見証koh-khah確實、koh-khah有保障。因此對hiah-ê相信上帝見証（上帝ê kiáⁿ兒耶穌基督hō͘伊信祂ê人有永恆ê性命）ê人，tī伊ê性命中，to̍h ē-tàng體會到永恆ê性命。比如約翰三：16「Hō͘信祂ê人有永生」。上帝ê靈ê見証m̄是空有--ê，是有永生的證據。約翰tī-chia kā咱講「上帝已經將永生hō͘咱，這永生是teh信祂ê kiáⁿ兒，信祂kiáⁿ兒就會有永生，m̄信上帝ê kiáⁿ兒ê人就無永生」這永遠ê性命是人kap基督耶穌信仰相聯結chiah有ê恩典，chit種因為恩典ê信仰chiah賜hō͘咱ê永遠性命，是存tī基督耶穌內底。

Tī-chia咱thang知上帝所賜ê永生是確立teh滿有恩典ê信仰，若無這信仰，m̄管人生是何等ê敬虔、人格有jōa-ni̍h-á高尚，人生jōa-ni̍h-á受人肯定，若拒絕上帝ê kiáⁿ兒，永遠ê性命就無可能存tī伊ê人生中，若無上帝ê kiáⁿ兒耶穌基督，m̄管你得tio̍h全世界，但是你soah無永遠ê性命，chit種人生是無價值ê，耶穌講：「人若thàn得全世界soah kā家己ê性命賠起lih，有啥物好處？」咱koh-khah ē-tàng了解耶穌向伯大尼ê姊妹講ê話：「復活tī我，性命mā tī我，信我ê人雖然死mā一定會復活。」（約翰十一：25）。

Khiā-tī基督教信仰ê立場，咱了解得勝ê人生是有永遠性命ê人生，這是咱信仰phah拚ê方向。若失了咱ê信仰，一切lóng是白了工ê！

結論：人ê希望得勝、成功是事實，可惜teh屬靈ê道路頂koân，人tiāⁿ-tiāⁿ無願意phah拚追求。約翰kā咱講三條ē-sái行ê路：1）用信仰來追求。 2）用疼ê行為來完成ê人生。3） 把握永遠ê性命價值！