《受恩蒙福的一生》

 | | | 轉寄

信心ê報償

作者 林宗要 2010.11.21

路加十八：35-43

Tī新屋教會牧會ê時，有一位日本時代ê財主，teh光復了後獨資興建一座橋，大概有5～6公尺長，這橋是伊ta̍k工一定ài行ê路，已經是六、七十歲ê老人，beh去新屋街仔，無騎車，lóng是用行路ê，tùi in-tau到新屋街大概20分鐘，ta̍k pái路過伊出資興建ê橋頂ê時，伊lóng會停落來看幾分鐘仔，心內發出歡喜ê笑容，認為家己做了一件有意義ê tāi-chì，hō͘來往ê人非常方便，同時伊mā真歡喜聽tio̍h hiah-ê人提起伊ê義舉，來自我滿足。

這是一般人對家己ê慈善行為ê一種心態。 基督徒ê信仰中，bē-tàng有chit種功利ê心思，認為咱替上帝（教會）所做ê是一種有價值ê行為，soah期待上帝ê祝福或者報償。

日前有一位長老會ê執事，問起路加十六章，「財主kap拉撒路ê故事」，ài如何去了解？因為照聖經ê記載，好額人並無任何犯法ê tāi-chì，但是hit位可憐ê拉撒路mā無配ㄘㄚtio̍h進入天國ê善行，但是聖經soah描寫財主入獄受苦，拉撒路tī天國享受福氣。確實這段聖經，咱無簡單去了解，是m̄是主耶穌teh排斥好額人？當然m̄是，主耶穌強調ê to̍h是chit位財主，上帝交託hō͘伊無限ê財富，伊應該盡力去做伊應該做ê聖工，上帝差一位可憐ê乞食，tī筵席中來到伊面前，伊有責任將一碗飯hō͘ chit位需要ê人，chit種sòa手ê幫助，伊應該tio̍h了解，這是上帝所託付伊ê人生責任，m̄-koh咱看tio̍h chit位財主，kan-ta知影享樂，soah疏忽了目chiu前伊應該ài做聖工，當然好額人享福無一定是罪，但是未完成上帝交託ê使命，做伊應做ê tāi-chì，to̍h是罪。上帝hō͘ chit位可憐ê人，tī伊厝ê門腳口，ǹg望ē-tàng分tio̍h伊一點點物件，伊soah無hō͘伊任何物件，thang看出chit位好額人ê心態，是無將上帝khǹg tī眼內，（a）伊認為一切ê財富是伊所有，心中無受託ê精神。（b）伊雖然好額，但是soah無疼心，好額soah不仁，to̍h是伊入獄ê原因。

Chit件tāi-chì teh教咱基督徒ê人生觀kap財富觀，所以基督徒ê任何義舉或者對教會ê關心kap奉獻，bōe-sái看做功勞，he是上帝交hō͘伊ê恩賜。ē-tàng提起--ê，只是伊有疼心去完成上帝交代ê使命而已，因為疼ê行動是付出、是犧牲、是無計較--ê，當然koh-khah bōe-sái有期待上帝ê祝福chit種功利思想tī心內。但是，上帝mā是會特別祝福持有chit種人生觀kap價值觀ê基督徒，至少正確ê人生觀是致使hō͘上帝賜福ê要件。保羅tī哥林多前書十三：4-5「疼是bōe自我誇口、bōe青狂、bōe做歹勢ê tāi-chì，bōe求家己ê好處」。非常清楚teh說明疼ê特質，基督徒若ē-tàng照保羅所講ê疼去行，必定有美好ê結果。福音書中，咱看tio̍h馬利亞用香膏抹耶穌，chit件tāi-chì to̍h是保羅所講ê疼ê真實內容，無計較是疼ê性質，馬利亞若計較，伊bōe用三百工工錢chiah ē-tàng買tio̍h ê香膏去抹耶穌（若用今á日工資1000 kho͘/工×300＝30萬！），這是何等價值ê作為，chit種作為（完全ê疼ê表現），to̍h是主耶穌o-ló馬利亞ê主因。基督徒ài了解，chit種疼ê行為to̍h是基督教信仰siōng好ê註解，基督徒必須ài tiāⁿ-tiāⁿ用che來見證基督ê福音，hō͘每一個基督徒，真正ē-tàng將咱所白白得tio̍h恩典ê福音傳開，這是基督徒ê使命。當然，beh完成這使命，基督徒必須ài有親身ê經歷上帝，有體驗ê信仰，chiah會有榮耀上帝ê作為。

今á日咱所讀ê chit段聖經，路加福音十八：35-43：chit位可憐、不幸ê chheⁿ-mê者，經過伊迫切ê哀求耶穌，chiah得tio̍h耶穌ê憐憫了後，伊所表現ê to̍h是對主耶穌基督恩典ê回應「就tòe tio̍h耶穌，一路歸榮耀kap神，眾人看見chit項tāi-chì，mā o-ló神」（路加福音十八：43）。Chit節聖經to̍h是描寫一個受恩ê人應該ài有ê生活表現，tòe tio̍h耶穌ê人生是基督徒ê人生，chit種人生的確是榮耀上帝ê人生，同時mā有好見證，眾人看見伊榮耀上帝ê作為，mā lóng kā榮耀歸hō͘上帝，這to̍h是上帝創造人ê目的，chit種偉大有價值ê行為，to̍h是基督徒信仰生活所必須ài認真phah拚去實行ê生活方式。

（一） 悲慘不幸ê人生
通過chit段聖經咱來思考chit位chheⁿ-mê者所表現出來ê信仰內容，伊ê人生是不幸koh悲慘，聖經用「Chheⁿ-mê koh做乞食」來表明伊當時ê狀況。chheⁿ-mê本身是人生生活ê一件負面ê事實，主耶穌tī福音書中，bat真中肯ê說明目chiu kap人生ê關係，「身軀ê燈to̍h是目chiu，你ê目chiu若光，規身軀tio̍h光，你ê目chiu若昏花，規身軀就烏暗，你內面ê光若暗，hit-ê暗是大ê」。咱ê社會形容目chiu是靈魂之窗，to̍h是teh強調目chiu ê重要性。因此tī人群中一位失明ê人，必定會失去競爭力，因為伊欠缺人生siōng重要ê光明ê目chiu，chit種狀況tī/teh各所在lóng一樣，古今lóng然！tī/teh台灣ê社會，失明ê人實在無法度kap看會tio̍h ê人競爭，因為in欠缺了人生ê光。一個chheⁿ-mê者假使有無數ê產業，án-ne伊tī生活上就無需要煩惱，m̄-koh聖經頂koân講，chit位chheⁿ-mê者是討食ê；因為伊失去了kap人競爭ê目chiu，但是伊必須ài生存，唯一ê辦法to̍h是伊求人憐憫，不得已成做乞食，咱想一位chheⁿ-mê ê乞食，坐tī路邊kā人分，若tú-tio̍h有疼心、同情心ê人，有可能會伸出同情ê手來援助伊，m̄-koh tī現實社會中，真有疼心ê人無chē，通常人lóng是無情，甚至iáu會批評責難chiah-ê不幸ê乞食，咱ē-tàng tùi聖經看tio̍h chit項事實，「行tī頭前ê人，就責備伊，m̄准伊出聲」（路加福音十八：39），假使有疼心，kám-m̄是應該行óa伊，chhōa伊來到耶穌面前，hō͘耶穌ê疼降tī伊ê身上chiah對，因為hit一大陣人，一定真清楚耶穌有能力，會行神蹟，而且chit位可憐ê chheⁿ-mê者本身mā有chit-ê意願，ǹg望耶穌ē-tàng kā伊醫治，hō͘伊復明，但是眾人hō͘伊ê是無情kap責難，甚至壓制伊，叫伊mài呼叫，當時ê群眾是án-ne teh對待chit位不幸ê chheⁿ-mê者，現代人對待chiah-ê不幸ê人koh如何？相信咱mā ē-tàng tùi現實生活中體會tio̍h，有時咱看tio̍h行動無方便ê人，因為坐公車soah hō͘司機大細聲，kap當時ê群眾有啥物無仝？Chiah-ê目chiu失明ê乞食，in本身ê生活已經有夠痛苦不幸阿，koh tú-tio̍h無情、無疼心ê群眾ê責備kap壓制，án-ne ê人生kám-m̄是真悲慘？

（二） 不幸中遇tio̍h耶穌
通常，人若tī悲痛中過日子，tiāⁿ-tiāⁿ會有真chē絕望ê表現，伊ê特色是消極或者失志。

Hiah-ê人tiāⁿ-tiāⁿ會批評chiah-ê消極ê生活者是「意志薄弱」或者「對人生ê了解無清楚」，事實上，hiah-ê活tī不幸中ê人，若無啥物tāi-chì thang當做性命ê動力kap ǹg望，tiāⁿ-tiāⁿ會發生悲哀ê結果。

今á日chit位不幸ê乞食，伊ê生活只有tī路邊討飯食，到底食會飽boh，lóng是一個問題，伊ê生活to̍h是án-ne teh渡，等到有一工，耶穌經過chit條路ê時，hō͘伊發現tio̍h絕對ê ǹg望，因為伊tùi平時所有ê經驗（聽人講起），知影目前猶太人社會中興起一位教主，to̍h是人稱提撒勒人耶穌，tī耶穌過去一段短短ê時間ê事工中，有真chē神蹟發生，解決了真chē人ê危機kap絕望，跛跤ê人ē-tàng koh行，致tio̍h臭頭ê人mā好去，死人活起來，chiah-ê消息深深刻入chit位不幸ê乞食腦海中，伊teh期待、ǹg望，相信有一日，耶穌一定經過chit-ê所在，伊tī-chia分的確m̄是無原因，咱ē-tàng想像，tī伊ê內心必定抱真大ê期望，若ē-tàng tú-tio̍h耶穌tùi chia經過，m̄知jōa好！因此當伊聽tio̍h耶穌經過chit-ê所在ê時，伊大聲叫耶穌，求耶穌kā伊鬥相共、kā伊醫治，chit時ê「不幸」，造成伊「有」機會kap主耶穌接觸，伊若是明眼ê人，可能chit時，伊bōe tī路邊叫耶穌，或者伊是離開故鄉出外，或者是生活墮落mā無一定，但是因為伊chheⁿ-mê，hō͘伊kan-ta ē-tàng tī路邊kā人分，對人ê立場來講，實在是不幸kap悲哀ê人生，耶穌基督ê福音，tiāⁿ-tiāⁿ是發hō͘人生tī chit種不幸kap悲哀中，咱看教會生活，有真chē人tī悲痛、絕望ê境況中，忽然間tú-tio̍h耶穌基督ê福音來成為基督徒，所以有時人生ê不幸kap悲慘，顛倒提供hiah-ê人有接近救恩ê機會。真chē顯赫、有成就ê人，通常是用人ê方法teh經營人生，但是當in失敗ê時，就會開一條通到上帝面前ê路。得意順利ê時，人是自專驕傲，當真正體驗tio̍h人生ê絕望ê時，所有ê辦法lóng無效，chit時除了向上帝呼求以外，無別條路，chit位chheⁿ-mê者to̍h是chit種狀況，chit時chit-ê所在，只有耶穌基督ê恩典chiah ē-tàng解決伊ê問題。

（三） 信心ê報償
咱看tio̍h chit位不幸ê可憐人，雖然受壓迫、責難，但是伊對主耶穌ê信心，無因為外在壞環境來改變，這值得今á日ê基督徒向伊學習。人tiāⁿ-tiāⁿ會因為現實ê境況，改變伊ê心中ê意志，tī聖經中siōng明顯ê to̍h是彼得三次m̄認主，tī學生中彼得算是代表人物，伊是學生ê領袖，事實上伊所表現ê信仰（對耶穌ê關係），實在是值得欽佩，伊tiāⁿ-tiāⁿ tī重要ê關頭，代表學生表達意見，無gōa久前，伊iáu真勇敢ê用刀仔kā祭司長ê奴僕ê耳孔割落來，但是幾點鐘了後，伊soah tī一位cha-bó͘-kán面前，m̄敢承認伊ê主，這是何等驚人ê反背行為，mā是信仰生活上tiāⁿ-tiāⁿ有ê問題，真chē hông認為有作為ê基督徒，會因為現實ê利害關係來出賣耶穌，但是tī-chiqa咱看chit位不幸悲慘ê chheⁿ-mê者，伊m̄驚環境ê壓迫kap人ê責難，koh-khah增強伊呼求耶穌ê決心，伊深信除了克服逆境，若無無法度khia7ti7耶穌面前，承接耶穌所beh賜hō͘伊ê一切福份。

當一個人有chit種堅強ê信心ê時，無論外在ê境況jōa nih-á惡劣，mā 無可能消除基督徒心中ê絕對信心，chit款事實to̍h是初代教會迫害史，若用初代教會kap組織完美ê羅馬帝國對比，教會實在m̄是伊ê對手，thang用卵kap石頭來形容當時ê教會承受羅馬政府無人性ê壓迫，m̄-koh初代基督徒ta̍k-ê受tio̍h聖靈ê充滿，in表現出對主耶穌熱烈ê信心，成做性命ê動力，chit種tùi信仰所發出ê真理ê力量，m̄是政權thang壓制ê，chit位chheⁿ-mê者克服了逆境，hông chhōa到耶穌面前，chit時to̍h是伊人生ê關鍵時刻，重要ê轉捩點，伊ê人生就看面對耶穌ê這一刻！克服阻礙chiah ē-tàng接近耶穌，這是信仰者必須認bat ê真理，伊決定ê信仰kap熱誠ê意願是伊到耶穌面前ê條件。

當時耶穌向伊提出一個問題，「你ài我為你做啥物？」萬有、恩典ê主耶穌，一直用chit句話teh問每一個時代中ê每一個人。當一個人khiā-tī耶穌面前ê時一定會聽tio̍h chit句「你ài我為你做啥物？」，tī-chia決定人ê生死、禍福！因為信仰to̍h是人對耶穌chit句話ê回答，當耶穌發出chit-ê呼聲ê時，你beh如何kā祂回應？這是人生siōng大ê課題。

Chheⁿ-mê者無求乞食siōng迫切需要ê食物（糊口），伊所求ê是伊永遠需要ê「我ài看會tio̍h」，食物只ē-tàng滿足伊暫時ê需要，但是目chiu ē-tàng看tio̍h是伊永遠所希求ê，只要伊ê目chiu ē-tàng看tio̍h，伊就m̄驚無飯thang食，chheⁿ-mê者chit句話是自古以來人類ê心聲，每一個時代ê hiah-ê人lóng需要向耶穌講出chit句話，「主ah！我ài看會tio̍h」，可惜ê是chiah-ê需要ê人，雖然tī恩主面前竟然m̄-bat主耶穌，「光照tī烏暗內底，烏暗soah無接受光」（約翰一：5）

Chit位chheⁿ-mê者克服了逆境，用積極ê心態khiā-tī主面前，將伊siōng迫切ê需要，求主幫助，果然伊決定ê信心，成全了伊ê心願，解決了伊人生ê不幸kap悲慘，hō͘伊ê人生重新出發，建立充滿tio̍h無比希望ê人生，chit種人生to̍h是人類追求ê生活方式。

結論：「主ah！我ài看會tio̍h」，看bē-tio̍h是人生ê悲痛，不幸kap悲痛ê化解tī面對耶穌。會記得，tī你到面對耶穌ê路途中，有真chē障礙物，你必須ài有勇氣克服，tòe tio̍h耶穌，榮耀上帝。「眾人mā kā榮耀歸hō͘上帝」，這是明眼人ê責任。