《受恩蒙福的一生》

 | | | 轉寄

為tio̍h你ê緣故

作者 林宗要 2010.10.17

約拿書一：1-15

Tī人生中咱有時會看tio̍h一kóa咱所bōe-sái了解ê情形，tī社會現象中，有一kóa人做了天大地大ê tāi-chì soah kap其他ê人無啥關係，顛倒是有一kóa人做真細項ê tāi-chì，soah hō͘人間發生了真驚人ê後果。

有辦法ê人thang tùi法律縫來閃避伊ê所犯--ê真大ê罪惡，另外有一kóa老實忠厚ê人soah因為伊ê老實忠厚去犯tio̍h法律hông判重罪。無gōa久以前tī苑裡有一位艱苦人因為tī保安林中a̍t幾支枯乾ê木麻黃hō͘保警看tioh8ka7伊送到法院hông判七年有期徒刑，像chit款tāi-chì，tī現實ê人生中，咱時常ē-tàng看tio̍h。

有時tī人生社會中會為tio̍h某某人ê緣故chiah影響tio̍h人生狀況，chit種為tio̍h人ê緣故所牽連出真chē ê人生問題tī咱ê人生生活中是tiāⁿ-tiāⁿ有ê現象，像父母對kiáⁿ兒無意識中ê感化，真chē kiáⁿ兒ê生活或者人生觀lóng會受tio̍h父母ê緣故ê影響，相信chit種tī厝內所形成無意識中ê影響對kiáⁿ兒ê人格ê造成有決定性ê關係，因為tī kiáⁿ兒ê心中，tiāⁿ-tiāⁿ用父母ê生活方式成做一種定型ê模樣，chit種自然無形中ê影響，m̄-nā tī父母kap kiáⁿ兒中ē-tàng看tio̍h，有時tī教會中，牧師kap會友之間mā會有chit種情形產生，牧師駐tī固定ê教會一段時間了後，會將伊定型ê模樣，teh有意，無意識中造成符合伊型態ê信者ê狀況。

Chit種影響kap感化，tī咱ê生活中tiāⁿ-tiāⁿ ē-tàng看見，tī咱ê生活中咱tiāⁿ-tiāⁿ聽見一句.「啥物父母生出啥物kiáⁿ兒」是teh說明人tī境況中受tio̍h影響ê事實。為何teh提親ê時hiah-ê人會真注重探聽對方ê家庭狀況？這確實m̄是beh了解財富或者社會地位ê問題，主要tī家庭成員對當事人ê影響，chiah看會出對方人格ê狀況。

因為人生ê生存是處tī ē-tàng塑做性ê過程中，尤其是gín-á以前ê時期，雖然人ê意志對人格ê影響mā是主要因素，但是生存ê環境可能比人ê意志所佔ê成份khah koân一--kóa，因為咱各人lóng真了解咱人ê人性ê軟弱，所以伊ê意志tiāⁿ-tiāⁿ會受tio̍h環境影響，當然mā有一kóa例外，有人tī非常惡劣ê環境中iáu ē-tàng離開環境來成功，有人tī美好ê環境中墮落ê人mā是有。

M̄-koh人若ē-tàng有khah適中ê環境，生活可能khah安定幸福，這是事實，這是現代父母一直teh phah拼替後一代ê緣故開創koh-khah完美ê家庭環境，hō͘咱ê kiáⁿ孫ē-tàng生活tī khah完美ê境況中！

同時咱mā必須了解一ê事實，to̍h是你ê kiáⁿ孫因為你ê緣故來成功，有成就，對教會、社會有美好ê表現，同時，你ê kiáⁿ孫mā會因為你ê緣故成做匪類，m̄敢正正當當ê行路，tī教會、社會環境中無面見人！相信咱會了解chit種嚴肅ê人生現象。

每一個人lóng期待人生會有成就，chit種成就確實m̄是kan-ta tī個人，必須ài有傳承，若無是無價值ê，為何tī台灣有一句話講「好bōe過三代人」To̍h是承傳斷絕，chit種情形tiāⁿ-tiāⁿ lóng確立tī個人ê影響力，mā to̍h是咱所beh強調ê緣故，因為chit種由私己ê緣故tiāⁿ-tiāⁿ lóng會關連到其他ê人際關係上，基督徒必須ài體認tio̍h chit種因為咱ê緣故chiah影響tio̍h kiáⁿ兒、家庭、教會kap社會khang-khè等等ê問題，chit種認同to̍h是信仰生活有價值ê內容，因為經過你美好ê信仰ê緣故，ē-tàng tī你所有有關ê生活境況中有正面積極ê信仰表現，chit種信仰是主所喜樂ê信仰。

因為án-ne，基督徒必須ài tiāⁿ-tiāⁿ用嚴肅、謹慎ê心態來反省檢討咱ê信仰kap生活中所帶來ê影響力，hō͘伊ē-tàng成做有價值，ē-tàng建立德性，造就人生ê信仰內容，chiah-ê lóng是因為你ê緣故。

（一） 問題ê開始
宇宙ê主宰耶和華kap偏狹猶太思想ê對比to̍h是約拿書ê主題。列王紀下十四章廿五節：「……好親像耶和華以色列ê神藉tio̍h伊僕人迦特希弗亞米太ê kiáⁿ兒先知約拿所講--ê……」。這位先知是西元前八世紀時代ê人，到底是m̄是chit位先知或者是別人，tī神學界mā有爭論，不過大部份ê人是認為藉tio̍h先知約拿ê名，向當時ê猶太人提出一個問題。咱若看約拿書ê前一本俄巴底亞冊，咱就會知he是充滿tio̍h排斥異邦民族，尤其是以東人，因為以東人對猶太人ê耶路撒冷ê陷落m̄-nā無同情，顛倒用應該死好ê心態去對待伊，所以咱chit本冊to̍h是針對以東人ê排斥、詛咒chiah寫--ê，但是約拿書ê主題khah m̄是限定tī偏狹ê猶太人思想，伊是teh強調猶太人所敬奉ê主耶和華，伊是萬民之主，mā是尼尼微人ê上帝。

雖然當時尼尼微城ê人民犯罪反背耶和華上帝，但是上帝iáu期待tio̍h chiah-ê迷失ê人民會悔改歸正，hō͘ in有koh再接受上帝恩典ê機會，所以命令先知約拿去傳播上帝ê憐憫kap疼，這是上帝ê旨意，但具有偏狹猶太主義思想ê先知約拿，伊soah認為主耶和華是屬於猶太民族所有，其他外邦人無資格thang接受上帝ê恩疼，因此當上帝下命令叫伊去尼尼微傳上帝ê憐憫kap公義ê時，伊soah逃往他施，因為伊認為chiah-ê無受割禮ê外邦人實在無資格thang接受上帝ê恩典kap祝福。

約拿書ê主題就是beh hō͘當時ê人民了解，上帝m̄-nā是以色列人ê上帝，同時mā是尼尼微人ê上帝，為tio̍h chiah-ê迷失、反背ê人民，上帝必須命令先知去傳達伊ê救恩。

Chit-ê思想若用今á日教會ê立場來講，「上帝是基督徒ê上帝，同時mā是非基督徒ê上帝」所以上帝ài咱chiah-ê已經認bat神恩典ê基督徒，向hiah-ê非基督徒傳達上帝ê憐憫kap公義，這to̍h是咱ê教會存在ê使命。

假使咱若bōe-tàng認真建立chit種觀念，咱就會疏忽上帝託付hō͘咱ê使命，失去傳福音ê教會，to̍h是kap當時ê先知仝款。

因為tī伊ê心中，伊所理解--ê，是神恩無應該tī尼尼微城中，hit種驕傲 ê心態咱mā thang tùi約拿向hit時ê人所講ê話來體會伊，「Mài家己心內teh講，有亞伯拉罕做咱ê祖先，我kā lín講，神ē-tàng tùi chiah-ê石頭中hō͘亞伯拉罕興起kiáⁿ孫來。」（馬太三：九）。確實chit種思想tī當時ê猶太人中真普遍，可能tī基督徒中mā有chit種心態，咱自認為是上帝特選之民，但是其他ê世俗人是化外之人，但是約拿書kā咱講，chit種偏狹ê心思是m̄-tio̍h ê，因為上帝是全人類ê主！

（二） 約拿逃避上帝
約拿是先知，應該是siōng ē-tàng體會上帝心意ê人，這是先知ê特質，但是約拿tī-chia所表現ê是bōe-tàng了解上帝ê旨意，這是矛盾ê角色！各位啊！咱kap上帝ê關係應該比別人koh-khah清楚上帝ê心意，這是基督徒ê特質，但是有ê時咱soah生活tī kap上帝心意相伴ê生活狀況。上帝ê命令是ài先知約拿去尼尼微傳達上帝ê恩典kap救恩，去尼尼微是上帝hō͘約拿ê使命，但是伊soah選擇倒反ê方向他施。雖然尼尼微ê道路或者彎彎曲曲，但伊soah是上帝ê意思ê路。

他施ê路mā可能是通順舒適，但是伊soah m̄是上帝所指示ê道路。

Chit-ê事實the kā基督徒講生活ê原則，同時咱mā會想tio̍h主基督tī馬太七章：十三～十四：兩條無仝ê路有無仝ê路況，但是mā有無仝ê結局。

人ê個性，歡喜承受美好舒適ê生活kap khang-khòe，這是事實，但是tī舒適ê人生中若無上帝ê旨意ê時，hit種舒適ê人生實在bōe-sái榮耀上帝，tī人世間，人時常逃避人應該ài有ê責任，因為tī-chia人必須付出真chē（加倍）ê能力面對伊ê人生，但是對基督徒來講，無上帝旨意ê人生狀況雖然舒適安逸，但是soah m̄是基督徒生存ê實在，基督徒tī人生生活中必須ài確立聽候上帝ê聲音ê生活方式。

Chit種會阻礙基督徒去完成上帝ê託付ê生活，通常是tī基督徒bōe-tàng體會合神ê旨意所致使ê，咱人ê價值觀若bē合上帝ê價值觀ê時，to̍h是人逃往他施ê主因，親像約拿認為尼尼微配bōe起神ê救恩，所以雖然有上帝ê聲音，但是因為kap伊ê理念無仝，（自然會發生矛盾、衝突ê現象）為tio̍h beh解決伊kap上帝之間ê無仝認同，伊用遠走高飛替伊進一步ê路－到他施去。

他施tī toh位？雖然無真明顯，但是真chē人認為是chit-má西班牙南邊，tī當時是不lí-á發達ê所在（Mā to̍h是文明ê所在），為何約拿無選別ê所在soah選他施？

可能to̍h是chit種人ê算盤，一方面是空間ê遠離，另外一方面koh有koân度文明ê所在，因為chit種進步發達ê所在mā是吸引人ê生活ê一種方式，你看今á日真chē移民，in ê心思to̍h是希望ē-tàng生活tī khah好ê人生環境中。「Tú-tio̍h一隻船、beh ùi他施去」，人ê如意計劃，配合無tú好tú-tio̍h，tiāⁿ-tiāⁿ會hō͘人認為he是天賜良機，因為心所想ê kap現實ê狀況非常巧合！

咱mā想tio̍h使徒行傳廿七章，保羅beh往羅馬ê時ê巧合，有一隻船beh去羅馬，koh有一陣微微á ê南風吹來，眾人lóng真得意，就出帆，結果是tú-tio̍h極大ê危機，船kap所有ê貨物lóng失去！
Tī人生ê過程中，chit種意念kap現實ê機會真巧合ê相tú ê時，人往往會真得意，才bē記得（却）了交託hō͘主ê人生生活。

（三） 為tio̍h你ê緣故
Chit種人ê如意算盤（本來是充滿幸福kap光明ê未來），啥知影約拿tī船頂soah tú-tio̍h非常驚人ê危機，「狂風大作、甚至船破壞了差不多」（約拿一：4）。本來約拿ê如意計劃是逃離去他施，坐船了後伊就tī船底睏，認為siōng妥當（Ē-tàng 無煩無惱ê生活）！但是耶和華阻擋，破壞伊ê計劃，用船siōng驚ê風湧來抵擋伊，雖然船內有真有經驗ê內行人，tú-tio̍h真正危機ê時是無辦法ê，kā人ê能力用盡啊kap作為失敗了後，人開始chhōe全能者ê庇護，用siōng原始ê見解，to̍h是咱中間某一人有得失tio̍h上帝！所以什麼人ê緣故hō͘船遇難？結果約拿中籤。

約拿本身向船內ê人訴明伊ê狀況kap伊所信ê主上帝，伊mā深深了解今á日ê問題lóng是因為伊chiah引起，「我知影lin2tu2-tio̍h大風、是因為我ê緣故。」（一：12）

為tio̍h約拿ê緣故，chit隻船tú-tio̍h m̄ bat有ê危機，in用盡一切（1）人為ê方法，船內ê工作人員ê經驗，但是無辦法thang好化解in ê危機。（2）各人哀求家己ê神明mā lóng無幫助。（3）Kā船來ê貨物擲掉（是財產、是行船ê主要目的），mā無法度解決問題。

「耶和華ê憤怒」m̄是用chiah-ê方法thang好化解--ê，是teh chhōe出元兇ê主因，mā to̍h是緣故ê消滅，chit-ê問題，是基督教信仰ê中心問題，耶穌基督ê救贖ê意義ê原因，只有上帝本身ê作為，chiah ē-tàng解消人ê罪債。

好親像約拿當時，hiah-ê人ê作為，kap in ê神明或者是船內ê貨物lóng m̄是緣故者，無緣故者自然無法度解決因為緣故chiah引起ê危機。

約拿mā有先見之明，伊了解船ê危機是伊ê緣故，所以要求in消滅緣故者－伊本人，除了消滅緣故者以外是無辦法hō͘ chit隻船ē-tàng平順到目的地。

列為，今á日咱來反省，因為你ê緣故所帶來影響：因為你ê緣故（積極正面ê作為），你ê家庭、kiáⁿ兒、親人、教會、社會lóng有美好ê人生清芳ê氣味！若是（消極負面ê人生作為）會因為你ê緣故chiah hō͘你ê厝、kiáⁿ兒、教會、社會有負面ê評判，尤其基督徒ài反省，有時因為你ê緣故chiah傷害tio̍h教會，hō͘基督耶穌ê名受侮辱！

咱必須三思你ê緣故ê事實，因為咱ê存在是連帶關係ê，無論tī厝內或者教會內kap社會生活中，確實beh將你ê緣故指向tī有榮光、有見証ê境界中，bē-tàng因為你ê存在，成做天國ê阻礙，這是今á日咱ê信仰生活必須tiāⁿ-tiāⁿ kā伊省思ê所在。

耶穌基督ê福音ê成敗關鍵，lóng確立tī每一個基督徒ê存在中，因為hiah-ê人ài因為基督徒ê緣故才對上帝ê福音有所取捨！

結論：用約拿ê思想來反省咱ê信仰，你ê人生ê動機beh如何去建立？人kám m̄是指向安穩平順ê目的地mah？是m̄是為tio̍h你ê緣故chiah發生危機或者問題？Bē-tàng因為你ê緣故chiah致使上帝ê名受辱Ài謹慎。約拿ê緣故Hō͘大船發生危機。