《受恩蒙福的一生》

 | | | 轉寄

刺中花

作者 林宗要 2010.09.26

雅哥二：1-2

四十年前tī新屋教會ê時bat演出一個聖誕劇：刺中花。大概ê內容teh講一位教會女青年信貞，有信仰而且koh生做真súi，性情溫存，是一位標準ê理想châ-bó͘ gín-á，因此佮意伊ê人bē少，châ-bó͘ gín-á因為堅持信仰，所以伊期望理想ê伴侶是教會青年，但是伊ê母親ê信心馬虎，有一日媒人來提親，男方名風流，是地方上好額人ê孤kiáⁿ，人品無好，人tio̍h親像伊ê名仝款，但是伊ê老母並無考慮信仰，kan-ta siáu貪對方ê厚禮kap聘金chiah答應了chit-chan婚事，媒人問伊ê母親：Kám講m̄免kap lín cha-bó͘-kiáⁿ參詳，伊ê老母共伊應講：m̄免，我thang作主，媒人koh問：Kám講m̄免kap您ê牧師參詳？母親答講「Kap hiah-ê無開化ê人參詳tāi-chì是bōe成功--ê！」

Châ-bó͘ gín-á tńg到厝了後知影chit-ê tāi-chì，向伊ê母親舉出kap無信者結合ê利害關係，恐驚信仰mā會受影響，母親講：「Chiah-ê lóng m̄免擔心，男方已經同意信仰自由，ē-tàng參加禮拜，chit種條件toh位去chhōe？」Cha-bó͘-kiáⁿ舉出實例，哀求伊ê老母，mài hō͘伊進入活地獄，母親受氣共伊責備講，「我敢生妳，就m̄驚你反抗」，cha-bó͘-kiáⁿ去哭hō͘牧師聽，牧師來苦勸伊ê老母無應該kan-ta貪圖物價，母親竟然回答牧師講，「牧師傳福音要緊，mài干涉人ê家內事，cha-bó͘-kiáⁿ是我ê，你iáu擔心我boeh將伊嫁hō͘ siáng？」牧師無奈，只好oat頭勉勵châ-bó͘ gín-á講「Mā可能有主ê美意」。

結婚了後，因為伊ê翁婿m̄做khang-khuè koh有真chē歹習慣，家勢衰敗，負真chē債務，債主上門討siàu，翁婿iáu活tī酒色中，ta-ke ê責備，翁婿ê起跤動手，面對真chē債主，koh ài擔起全家責任，án-ne ê生活實在非常痛苦，佳哉chit時，伊ê屘cha-bó͘-kiáⁿ已經是國小仔一年仔，母á-kiáⁿ相依為命。翁婿放蕩ê生活並無改變，厝內已經無ē-sái當ê物件，只chhun cha-bó͘-kiáⁿ學校ê制服，mā hō͘先生強取去當舖當掉。當舖頭家ê bó͘是一個不守婦道，kan-ta知影享受，m̄盡本分，個性敗害，時常用摔物件發洩情緒ê cha-bó͘，翁婿非常無奈，當「風流」提伊cha-bó͘-kiáⁿ 學校ê制服來當鋪ê時，頭家誠懇ê kā伊苦勸，mài tī福中m̄知影惜福，hit種賢慧ê bó͘ m̄知影珍惜，反倒tńg來共伊虐待，你想看māi，伊嫁入去lín-tau受盡折磨，m̄-bat講出怨言，mā kā厝內整理kah真整齊，án-ne賢慧ê女子beh去toh位chhōe？Koh勉勵伊奮發向善，重新開始過去律師ê khang-khè，風流良心發現，mā完全覺醒，但是後悔過去ê hit種人生狀況，伊實在無面去見bó͘-kiáⁿ。

婚後十年ê一個暗時，母á-kiáⁿ照常做完家庭禮拜，cha-bó͘-kiáⁿ去睏，信貞家己the替翁婿ê改正迫切ê祈禱，翁婿chit時已經完全聽見伊e5bou2 ê祈禱，回想店頭家ê忠言，想tio̍h過去十年來辜負信貞母á-kiáⁿ siuⁿ-chē，當伊聽見牽手án-ne迫切誠懇ê祈禱，伊ê內心無法度koh忍受，走去跪tī in bó͘ ê面前，痛悔求赦免，kā伊ê bó͘攬牢放聲大哭。

當然結局是翁婿悔改歸正，家庭恢復幸福美滿，chit-ê有淡薄á ē-tàng感動人ê話劇，伊teh說明chit位女主角，雖然tī極端ê困境中忍受tio̍h普通人真pháiⁿ忍受ê人生境況，但是伊lóng無怨天尤人，伊依從主耶穌ê教導，甘心揹十架跟隨祂ê腳步，伊ê存在，tú親像雅歌二：1-2所描寫ê是一蕊非常美麗ê刺中花，無hō͘惡劣ê環境所勝，顛倒戰勝伊達tio̍h尊貴、純潔ê人生狀況，這to̍h是刺中花！

聖經雅歌是指siōng出色、優jú ê詩歌，中文譯做雅歌，充分表現伊ê原意，主題是講男女間ê情愛，所以會hông騙入聖經ê正典，一般hông認為是比喻或者是解釋以色列kap上帝ê關係，新約是基督kap教會ê關係，用chit-ê心態去看雅歌ê時，chiah ē-tàng體會內中ê真義。

（一） 刺中鼓子花（本質ê完美）
鼓子花（或者花）通常是hiah-ê人所喜愛ê物件，每一個人lóng愛伊ê美麗凊芳。Tī今á日ê生活中，伊kap咱有真密切ê關係，室內若有花，氣氛就無仝，主日ê敬拜，任何教會mā一定有伊。表達愛情、關懷、慰問ê時，lóng用花來表達人內心ê誠意kap真情。因此花tī hiah-ê人ê生活中相當重要，因為伊是天生美麗，人見人愛。主耶穌用山頂野生ê鼓子花kap當時極尊貴ê所羅門王ê衫做對比來解釋，hit位極榮華ê所羅門王所穿ê尊貴ê衫mā bōe比山野中ê鼓子花ê súi，可見花ê美麗是無thang可比--ê，所以花無論tī任何場合中lóng顯出伊ê可愛嬌麗ê特質。

聖經ê作者tī-chiah用「我ê佳偶tī kiáⁿ兒中，kah-ná鼓子花tī草刺內」，咱ē-tàng了解作者tī-chia所強調ê，伊ê所疼ê對象ê生存境況非常惡劣，好親像hit叢刺中花ê外在環境，雖然有非常險惡ê挑戰，但是lóng bōe因為伊ê境況ê惡劣（變化）來改變伊ê本質，是用草刺中ê鼓子花來形容所疼ê對象。

若用比喻思考ê時，可比舊約ê教會到新約ê教會，伊存在ê環境，mā可能有真chē不利，痛苦ê現實包圍四周，但是教會ê存在的確bōe因為現實境況ê變化來變質，這to̍h是tī信仰ê過程中，主向信仰者所要求ê信仰ê性格，chit種kah-ná刺中花ê信仰to̍h是基督教信仰ê價值，tī過去ê教會史上表現出chit種尊貴ê信仰本質者，mā有真chē。基督徒ê信仰，to̍h是揹十架ê信仰歷程。

主耶穌向學生講「若有人beh tòe我，就當囥下自己，揹起伊ê十字架來跟tòe我」（馬太十六：24）Tī-chia咱ē-tàng看出基督教信仰ê siōng koân境界。保羅mā向提摩太講「只要立志tī基督耶穌內敬虔度日--ê，lóng tio̍h被逼」（提摩太後書三：12）。Chiah-ê事實lóng teh說明基督教信仰ê實質內容。

誠然，一蕊美麗可愛ê花teh充滿草刺ê所在，ài如何去發揮伊偉大ê特質，這是一件相當困難ê實情，因為tī án-ne惡劣ê環境中，伊必須ài有相當ê警覺kap謹慎，若無一定會hō͘ 四周ê環境所鑿tio̍h！這to̍h是基督徒信仰生活ê寫照，基督徒tī現實ê生活環境，伊必須ài有相當ê覺醒kap謹慎，若無會鑿tio̍h 來產生chiok驚人ê 孔嘴，因為主耶穌已經真明白ê kā咱講，基督徒ê信仰生活是入狹門kap行狹路ê過程，雖然咱ê人生中四界lóng有開闊ê門kap路，但是伊lóng m̄是屬於基督徒所有！

Chit種信仰ê本質，to̍h是刺中花所表現出來siōng完美，高尚ê本質。因此咱ē-tàng講tī刺中ê鼓子花，本質上是非常完美ê存在，雖然伊生存ê 四周圍有非常chē ê草刺！

（二） 草刺中ê鼓子花是純潔ê本性
刺中ê鼓子花，bōe因為是生存tī草刺中，就變做野草，雖然伊生tī草刺中，但是伊猶原是純白ê鼓子花，bōe因為環境ê緣故來變質，這to̍h是刺中花siōng可貴ê所在。

好親像頂面所講ê hit位善良ê教會女子，嫁入去惡劣、困苦艱難ê家庭中，但是iáu ē-tàng堅持信仰ê價值koh作美好ê見證！

作者tī-chia雖然用溫情ê寫法，但是soah用屬靈ê角度來看chit件tāi-chì，咱ē-sái體會作者ê用心是tī絕對ê信仰kap忠堅ê愛情。只有具備chit種性格，一位信仰者chiah ē-tàng持守信仰上ê純真kap對信仰ê主絕對無二心ê忠貞。

Tī一般人心中，通常對信仰ê對象ê敬拜tiāⁿ-tiāⁿ是用平常ê心態去應付，仝款是禮拜，仝款是宗教，無啥物差別。真chē人對基督教ê獨一性神觀無了解（尤其是處tī多神教ê台灣社會），對舊約中耶和華上帝ê排他性mā真pháiⁿ認同。

M̄-koh tī信仰ê世界，信仰ê主要求信仰者必須具備絕對忠貞ê信仰生活，雙腳踏雙船ê不忠ê行為tī社會上是hō͘人所厭棄--ê，好親像舊約時代，先知以利亞向當時ê以色列人所講--ê，in必須ài tī耶和華或者巴力ê中間選定一位，這to̍h是神學家所強調ê信仰ê性格，tī信仰ê世界無允准二樣心，心懷二意並m̄是好ê信仰心態。

Tī信仰世界，定定有chit種因為環境來影響tio̍h信仰ê本質ê事例，有一kóa基督徒kap人去觀光參觀古廟ê時，別人teh拜拜，基督徒mā tòe人拜。有一kóa基督徒tī惡劣ê環境中，m̄-nā bōe-tàng見證福音，反倒tńg kap人行共路，chiah做出犯法或者違背信仰良心ê tāi-chì，真chē基督徒墮落以及失敗ê主因，通常是tī bōe-tàng堅持伊ê信仰獨有ê特殊純潔ê本質。信仰者tī社會上應該是beh去影響人，去感化人，但是tiāⁿ-tiāⁿ有一kóa基督徒tī真道上顛倒hō͘人同化。

刺中ê鼓子花tī伊ê惡劣ê境況中iáu ē-tàng保持純潔ê特質，to̍h是伊可貴ê所在，伊kā咱講chiah-ê基督徒一件非常重要ê真理，tī草刺中是m̄是iáu ē-tàng保持潔白ê本質？這是信仰kap現實ê生活中ê一件真有挑戰性ê問題。Bōe hông 污染tio̍h。

創世記十三章以後，記亞伯蘭kap羅得ê情形，咱就會了解信仰必須ài有純潔ê本質：當時ê羅得袂堪--ê所多瑪城真chē惡劣ê狀況。本來伊ê使命是「化世俗」，但是現實ê生活hō͘伊成做「世俗化」，假使伊ē-tàng有草刺內ê鼓子花chit種心態去經營伊ê信仰ê時，伊就bōe kap惡魔妥協。

這to̍h是基督徒社會生活ê寫照，有ê時有可能會hō͘人認為阿西，但是soah表現出草刺中ê鼓子花純潔ê本質！

（三） 草刺中ê鼓子花ê香氣

咱已經思考草刺中ê鼓子花ê特質，1）完美ê本質 2）純潔純正本性，雖然伊ê生存ê環境相當ê惡劣，但是伊soah無因為伊ê境況來影響tio̍h伊本質ê實在，顛倒tī chit種境況中koh-khahe7-tàng發揮伊獨有ê特殊純潔ê內在價值。

最後咱koh思考草刺中鼓子花ê另外一種氣質，to̍h是伊ê清芳，咱lóng知影，花會hō͘人欣賞是因為伊外表美麗ê色彩，同時花本身，會發出香味mā是hō͘人欣賞ê主因，咱tiāⁿ-tiāⁿ會tī生活中看tio̍h hiah-ê人提花蕊，khǹg tī鼻孔邊聞伊ê香味，假使有一kóa花有艷麗可愛ê外觀但是有臭味，相信無人會欣賞伊！因此美麗ê花ê要件，一方面是外觀ê美麗，另一方面是有清芳ê氣味，chiah-ê事實是花是án-án 會hō͘人喜愛ê主因。

雖然玫瑰花有刺，但是hiah-ê人lóng bōe因為伊ê刺來棄嫌伊，人猶原佮意玫瑰花。

咱看草刺中ê鼓子花ê特質，雖然生tī草刺中（相當惡劣ê環境），iáu ē-tàng放出清芳ê香氣。Chit件事實是teh向基督徒提出一個問題，基督徒ê存在，有ê時mā有可能好親像刺中花，但是咱必須ài明白，無論著抑m̄著時，無論任何場合，基督徒ê特質就是beh不斷來發出ē-tàng榮耀上帝、見證耶穌基督福音清芳ê氣味。

基督徒見證上帝ê榮耀是無受時間kap空間ê限制，無論你活ê環境如何，基督徒ê特質to̍h是不斷來發出基督徒所講--ê：「因為咱tī上帝面前，無論tī得救ê人身上，或者滅亡ê人身上，lóng有基督清芳ê氣」（哥林多後書二：15），tī-chia咱ē-tàng體會信仰ê實在內容，to̍h是要求信仰ê人不斷來散播出有耶穌基督ê香味！To̍h親像刺中ê鼓子花，雖然tī hit種境況中，猶原有獨有特殊可貴ê香氣。

基督徒ài明白伊ê存在本身to̍h是價值！雖然咱存在ê環境m̄是lóng仝款，但是咱必須明白，咱ê存tī本身to̍h是價值ê事實。形成價值，是在teh發揮伊ê作用，m̄管你ê人生內容如何，溫室中美麗ê花蕊，受tio̍h特別ê照顧，khǹg tī花矸內成做人欣賞ê題材，或者是刺中花，活tī hit種惡劣ê境況中，你lóng必須ài會記，你ê存在本身to̍h是價值！因為咱每一個人lóng hō͘上帝安置tī各種無仝ê環境中，境況雖然無仝，每一個lóng有一個仝款ê價值，to̍h是發出清芳ê香氣tī你生活ê 四周！這to̍h是刺中花ê特質。

「刺中花」，提醒基督徒對信仰生活ê問題ê koh在認bat、自覺、憂患意識ê建立，kap揹十架ê生活心態，lóng應該去思考--ê。尤其tī現實ê生活中，如何去表現信仰生活，tio̍h-ài有信仰ê智慧kap判斷ê能力！