《草地囝仔做牧師》

 | | | 轉寄

《草地囝仔做牧師》 編者序

作者 編輯小組 2010.07.18

阮ê教會《基督教門諾會木柵教會》蒙神ê帶領，ē-tàng得tio̍h林牧師ê牧養，十gōa年來，chit-ê小教會chiah ē-tàng行得穩健，會友因為受牧師ê指導，不管男女老幼，因為tī信仰上有正確ê認bat，所以無論tī家庭生活方面，khang-khè上，或者是生涯發展……各方面lóng真有成就。咱發現，有chit種深遠影響力ê源頭，是因為林牧師伊對信仰ê持守kap實踐。伊是咱敬疼ê牧師。

回想起伊行過ê艱辛koh豐富ê牧會生涯，牧師lóng是講：「真正m̄知影是án怎行過來--ê！從來mā bōe感覺thiám，mā bōe感覺欠缺。真是奇妙！」

第一個牧養ê教會是新屋教會。初到客家庄，tùi一句客話lóng bē曉，到ē-tàng用客語講道，kap會友自然交通；主日學人數chē到四、五十人mā lóng由牧師kap牧師娘包辦；草創時期ê新屋教會，簡陋ê牧師館，只要tú-tio̍h落雨天，tī灶腳煮飯lóng tio̍h ài戴葵笠仔。Hit時生活非常清苦，三個囝兒tú好teh發育時期，為tio̍h厝內ê人ê營養，lóng是飼雞、掠鰗鰍、摸蜊á、種菜來補貼；賣閹雞得來ê錢，就hō͘ gín-á做學費。牧師娘想beh tńg後頭厝lóng因為考慮車資chiah會停腳。探訪會友，出門就是kui工，騎腳踏車tī石頭仔路頂懸震kah kui身軀麻麻麻。Tī hiah-ni̍h艱難ê環境中，一家大小ē-tàng全心事奉十四年，而且「甘之如飴」，án-ne ê見證，深得會友ê肯定kap尊敬。

後來受虎尾教會禮聘，到了虎尾，ta̍k禮拜除了固定主持三堂ê講道，mā積極投入各團契ê活動，主日學全盛ê時koh有百gōa位學生。因為牧師ê觀念tòe會tio̍h時代ê腳步，趣味koh有智慧，自然mā深得教會青少年ê愛戴。藉tio̍h豐富ê智慧kap愛心，觀察會友ê需求，對貧弱ê肢體hō͘ in即時ê幫助，堅固真chē會友ê信仰。

蒙神ê恩典，目前林牧師ê經濟算是非常富裕，但是in持守十分簡單樸實ê生活，扶助弱小肢體，盡心盡力協助總會推展福音事工，已經生動刻畫了一幅上帝ê好管家ê美麗圖畫。

伊ê生命篇章實在m̄是文字所ē-tàng講完—ê，tio̍h像保羅所講ê：「我知影án怎處tī富足，mā知影án怎處tī貧乏，ta̍k所在我lóng不時得tio̍h秘訣，靠he hō͘我加添力量ê，凡事lóng ē-tàng作。」這to̍h是林牧師生命ê寫照。咱ē-tàng確信ê是：上帝已經tī祂忠心良善ê奴才身上，展現一個美好ê計畫，如今chit-ê計畫ê主角將信仰ê精義加入性命ê火爐中。焠煉出一道道ê靈糧，hō͘真chē饑渴慕義ê心感覺飽足，咱jōa-ni̍h-á ǹg望有koh-khah chē ê生命因此得tio̍h造就，所以本會成立編輯小組，並利用上班之餘ê時，將林牧師ê講道稿整理出版，希望藉tio̍h文字ē-tàng儘量傳達林牧師講章ê真義，來榮神益人。
編輯小組