《草地囝仔做牧師》

 | | | 轉寄

人生kap基督

作者 林宗要 2010.12.26

用弗所書二章1～10節

「人生」實在有真複雜ê問題，咱若將人生kā伊詳細ê分析kap觀察ê時，會確實體驗tio̍h真chē無仝ê現象。

五花十色ê社會，是ē-tàng表達出人生ê實況，因此ài了解人生siōng好ê所在，to̍h是現實ê社會。

咱若看大眾傳播ê社會新聞，to̍h koh-khah ē-tàng了解咱ê人生現象。因為社會是群眾聚集生活ê所在，siōng ē-tàng反應出人生siōng實在ê情形。報紙ta̍k個月lóng刊出「台灣ê社會實驗表」，tùi各方面體驗台灣ê社會狀況（Mā to̍h是體驗人生！），專家tùi無仝ê角度來看台灣ê社會狀況，同時用身軀各部分配合說明，比如：心——文化（台灣空間ê非人化）；腦——政治，tī客觀現實中chhōe出切實ê可能：肺——環保，核四審查空洞chhèng-chhái、中油煉油廠風波、垃圾水處理、十三行址；運動機能——經濟，比如對大陸ê經濟、加入GATT（關稅貿易總協定）；喉舌——大眾傳播，電視台向錢看、由特權掌控失去公正性；消化——社會，to̍h是家庭倫理崩盤。

若用醫生ê診斷來看台灣ê社會，khi身軀lóng是病，無一位好ê所在，這to̍h是咱台灣社會ê狀況，mā to̍h是咱chiah-ê人生活ê環境！

誠然，當咱每工tùi報上看tio̍h--ê，lóng是kui身軀病痛ê社會狀況，到底生存tī án-ne ê社會，人生是啥物？

相信身為基督徒ê咱，對人生ê了解比一般人koh-khah深刻chiah-tio̍h！

照基督徒信仰ê看法，人生是為著beh榮耀上帝chiah存在ê。但是當咱詳細觀察人生ê時，大多數人生m̄-nā bōe-sái榮耀上帝，顛倒是teh侮辱上帝、毀謗上帝。

因為人khah愛生活tī m̄是上帝所起ê世界，mā to̍h是活tī惡勢力ê範圍內，因此心思敗壞、觀念bōe正、行為怪奇、生活墮落，是人性ê真實寫照，ná親像保羅tī羅馬人書三章10～18節，引用聖經ê話所講ê人生，to̍h是生活tī罪惡中，「無義人，連一個mā無，無了解ê、無chhōe求上帝ê，lóng是偏離正路，做伙變做無路用，無行善ê，連一個mā無，in ê嚨喉是phah開ê墓，in用喙舌弄詭詐，嘴唇內底有虺蛇ê毒氣，kui嘴lóng是咒罵苦毒，殺人流血，in ê腳飛走，所經過ê路to̍h行殘害暴虐ê tāi-chì，平安ê路in m̄-bat知影，in眼中m̄驚上帝」。

保羅chiah-ê引例，可能應用tī現代ê台灣社會，確實咱是生活tī非常驚人ê中間。

或者有人會講，chiah-ê驚人ê人生現象，只是少部分ê惡，大部分ê人安份守己，這mā是事實，但是chiah-ê大部分ê人生如何neh？

咱thang用摩西祈禱詞來形容chiah-ê人ê實況，「咱一生ê年日是七十歲，若是khah勇壯thang到八十歲，但是其中所矜誇ê，不過是勞苦愁煩，轉眼成空，咱如飛chiah去」（詩篇九十篇10節），這是人生ê事實，tī七、八十歲ê人生中，人ē-tàng誇口啥物？總統ê權力、大財主ê好額，或者高深ê學位？Chiah-ê lóng成做ná摩西所講，轉眼成空！Tī大有權力ê人，in所ē-tàng誇口ê是啥物 ？Kám-m̄是kap一般人仝款ê終局，ài面對死亡ê事實。

Tī chit-ê事實面前，任何權力者lóng無法度超脫！Tī-che情況中，到底人生是啥物？

咱若tùi聖經來看人生ê時，咱to̍h ē-tàng了解，創世記一～三章，咱ē-tàng看tio̍h基督教ê人生是啥物？人是被造者，同時有上帝ê形像，上帝將人安置tī伊甸園中，同時上帝koh交代人ài照顧看守上帝所託ê一切。

Tī-che咱thang看出人生ê意義，本來人生是快樂ê存在，但是因為人違背了上帝ê命令，因此，chiah-ê人所有ê特質，lóng被消滅，人無koh活tī快樂ê所在，是活teh汗流滿面痛苦ê世界，同時koh充滿tio̍h真chē罪惡ê中間。

當時chit種人生m̄是上帝所喜樂，因為無符合上帝ê本意，本來上帝所創造ê人是像tòa-tī樂園hit種，快樂自在，kap上帝有不斷往來ê關係，以上帝所賜hō͘人ê智慧kap地方，去完成祂所託人類去管理、照顧ê世界（上帝所創造ê世界），che是上帝創造人ê原旨，可惜ê是人m̄-nā無法度完成伊，顛倒kap上帝ê原旨相違背，生活tī上帝所無喜樂ê境況中，這to̍h是人生ê現實。

今á日咱tùi chit段聖經（以弗所書二章1～10節）來思考人生kap基督ê問題。

（一）無基督ê人生（以弗所書二章1～3節）
Tī以弗所書二章1～3中真清楚說明，無基督ê人生ê悲慘狀態。

咱tī創世記二～三章，ē-tàng看tio̍h一個離開上帝ê人ê狀況。初代台灣教會有真chē宣教師，in真gâu講台語，因此ē-tàng hō͘人注意tio̍h in，mā善用台灣ê俗語，所以teh佈道ê時chūn，通常lóng有真chē人聚集，tī七、八十年前ê台灣社會，無啥物娛樂，因此時常利用暗時tī中心地點舉行佈道會（我tī四十gōa年前學生時代，tiāⁿ-tiāⁿ參加孫雅各牧師娘tī台北圓環舉行ê佈道會，當時人khah清閒，所以真chē人參加。）Chit位宣教師提一面銅鑼，學台灣式ê摃法，一面摃鑼，一面大聲喝，「上帝遺失了gín-á！」，因此集合ê人bē少，然後開始用伊真輾轉ê台語向群眾紹介上帝疼人ê福音！

無基督ê人生，是比如chit位宣教師所講，是上帝失落ê gín-á，自然tī-chit種狀況，便無koh具有屬上帝ê特質，咱若看以弗所書二章1～3節，咱就會了解，chiah-ê離棄上帝ê人，in ê生活是何等ê悲哀，奧古斯丁所舉ê例完全說明chit-ê事實，hō͘土所淹掉ê銀錢，雖然有價值，但是無tī使用者手中，是有名無實，保羅形容chiah-ê無基督ê人生是：

1） 違抗上帝命令ê人生。罪人ê生活無符合上帝ê旨意，你看現代社會中，hiah-ê hō͘罪所控制ê人。Kám-m̄是活tī án-ne境況中mah？

2） In ê靈性死亡。人ê價值tī有上帝ê形像，mā to̍h是有靈性ê人性。但是保羅tī-chia所講tio̍h chiah-ê無基督ê人生，in是無靈性，自然tī生活上欠缺屬於上帝ê表現。

3） 隨從世俗ê邪惡，服從惡魔。這是無基督ê生活特色，只要屬世ê私慾，lóng是in生活ê內容，in反抗上帝，所以真自然ê成做屬魔鬼ê存在。

4） 放縱本性ê慾望kap自私ê意念。是無基督ê人生ê生活方式，咱看現實浪費、娛樂ê所在，lóng是無基督ê人生ê世界，屬於基督ê人永遠bōe去chit種放縱私慾ê所在！真正ê基督徒bōe去chàm酒家，bōe到色情場所去。

5） 註定受基督ê刑罰。這是對無基督ê人生ê結果ê宣示，因為咱知影，人生是受託ê人生，伊ê意思是有一日，人必須面對主人——khiā-tī上帝ê面前，向上帝交代清楚受託ê責任！但是chiah-ê無基督ê人生，in bōe思考chiah-ê問題，in認為in ê人生是家己ê，一切ê權限lóng是in所有ê。因此，有權ē-tàng採行in所認為ē-tàng行ê生活方式，因為tī in ê人生中，in已經失去了人生siōng大ê價值——靈性，所以無法度判斷應該有ê生活方式，hō͘罪所迷惑ê特色是無基督ê人生，你看hiah-ê放縱tī in ê私慾ê人生，任何人ê任何方法，lóng無法改正in墮落ê生活！Chit款tāi-chì tī咱ê人生中，時常ē-tàng體會，有絕對主權ê上帝，對hiah-ê bōe-tàng完成受託責任ê人，一定會kā伊處罰，he就是末日審判。

（二）基督kap人生（以弗所書二章4～7節）
無基督ê人生，m̄是上帝所喜愛ê，因上帝無愛受創造ê人生活tī悲哀之中。Ài化解chit-ê事實，只有tī上帝手中，to̍h是像聖經講ê，這成肉身，tī人中間，充滿恩典kap真理，mā to̍h是上帝tī二千年前tī猶太伯利恆所賜hō͘咱人類ê救主——基督耶穌。

因為祂ê來臨，改變了人類ê歷史，kap人生ê全貌，保羅tī-chia講：
1） 是上帝豐盛ê憐憫，若m̄是上帝ê憐憫kap恩典，人生是無可能接受榮耀ê救主，因為上帝是公義ê上帝，同時mā是充滿慈悲ê天父，路加福音十五章浪子ê比喻，siōng ē-tàng表達出chit-ê事實。

2） 是顯出上帝無比ê大愛，祂因為豐盛ê憐憫chiah差孤kiáⁿ臨到世間，成做人類ê救主，救人脫離hō͘魔鬼所拘束、犯罪烏暗ê生活，祂chit種豐盛ê憐憫，是teh表現出祂無比ê疼（約翰福音三章16節），mā to̍h是因為上帝無比ê大疼，所以基督chiah會臨到世間，來完成救贖ê聖工。

3） 由恩典chiah得救，上帝chit種無比ê疼，就是beh hō͘只要信祂ê人，bōe到滅亡顛倒得tio̍h永生。約翰福音一章12節「只要接待祂ê，to̍h是信祂名ê人，祂就賜in權柄，作上帝ê囝兒」。

Chit種基督耶穌ê救贖是信仰ê行為，m̄是óa靠人ê修為、善行ē-tàng化解，人tī上帝面前ê虧欠，是上帝豐盛ê憐憫，願出祂無比ê恩惠，hō͘咱chiah-ê卑微軟弱ê人，因信稱義，咱今á日所以ē-tàng成做基督徒，是上帝ê恩典，m̄是任何人ê任何功勞，是白白ê恩典，所以主耶穌向學生講：「Lín白白得tio̍h ê，也tio̍h白白hō͘人」。這to̍h是今á日咱ê教會基督徒所以ài傳福音ê事實，因為咱是白白得tio̍h ê，咱有責任將此無比ê恩惠ê福音，紹介hō͘其他ê人。

4） Kap基督同活ê人生，有基督耶穌人生ê人，teh伊ê人生中，確實ài有屬基督ê生活（To̍h是像基督ê生活！），mā to̍h是咱常時提起ê，基督耶穌歡喜你做啥物？因為有基督人生ê人，lóng會了解基督ê屬性是啥物。所以有基督ê人生（基督徒），必須ài生活teh符合基督耶穌ê真道頂面。

5） 顯示出祂ê屬性——上帝是疼，所以祂mā要求屬祂ê人，必須ài相疼，因為疼ê生活，siōng ē-tàng解釋屬基督ê性質。以弗所書二章7節「Beh將祂to̍h是豐富ê恩典，to̍h是祂tī基督耶穌內底向咱所施ê恩慈，顯明hō͘後來ê世代看」。

（三）Tī基督內底tsiah得救ê人生（以弗所書二章8～10節）
Tī chit三節聖經中，保羅kā咱講，tī基督內底tsiah得救ê人生ê狀況是：

1） 因信稱義，tse to̍h是基督教信仰ê內容，人ê得救m̄是tī家己ê才能，或者家己有啥物優秀ê人生修為，因為chiah-ê人生ê 才幹以及傑出ê人生修為，只不過是人應該ê本分而已，mā to̍h是人必須án-ne去生活，講到干犯ê罪過，是人為ê傑作，任何人lóng無法kā伊化解ê。得救ê唯一條件，是tī「相信基督耶穌是上帝ê kiáⁿ兒」chit-ê信仰ê根基上。

2） 無自誇ê內容，得救ê人生，是teh óa靠上帝ê恩典，是因為信，m̄是因為家己ê行為，是上帝所賞賜（以弗所書二章8節），既然m̄是靠人ê行為，án-ne人就無啥物好誇口（以弗所書二章9節），chia所提起ê誇口，是講人ê得救m̄是因為人家己ê行為——守律法或者良好ê道德生活，是完全tī上帝白白豐盛ê恩典所賜hō͘ ê，所以人無自誇ê理由，一個體驗tio̍h基督救贖ê人，bōe誇口家己，所誇口ê只有主耶穌（哥林多後書十章17節），誇口主ê作為是得救ê人生ê生活方式，tī耶利米書九章23～24節，「耶和華án-ne講，智慧人mài因為伊ê智慧誇口。勇士mài因為伊ê勇力誇口，財主mài因為伊ê財務誇口，誇口ê是因為伊有聰明，認bat我是耶和華，koh知影我喜樂tī世上施行慈愛公平kap公義，用tse誇口，這是耶和華講ê」。一個得救ê人，所beh誇口ê，to̍h像頂面講--ê主ê作為，因為祂ê作為，咱tsiah ē-tàng能成做伊ê子民。

3） 受創造，tī基督耶穌內底行好事ê人生（以弗所書二章7節），chit句聖經teh說服得救ê人siōng súi ê生活方式，基督徒所以會做基督徒，是tī基督耶穌內底行好事，雖然咱ê信仰是因信稱義，得救kap人ê德性無關，但是一個重生ê人，必須ài有新ê人生，chit種新ê生活to̍h是kap舊ê作為無仝，舊ê生活teh犯罪烏暗不法中，新ê作為是tī光明善行中，屬於基督ê人生，必須ài tī基督耶穌內底行好事，tú親像提多書二章14節，「基督替咱獻上自己身軀，救咱脫離一切ê邪惡，hō͘咱成做伊純潔ê人民，歸屬hō͘伊，就是ài熱心tī chiah-ê好行為」。基督徒hō͘救贖ê使命，是teh行善ê事實。

結論：以弗所書二章1～10節，真清楚kā咱講：1）無基督ê人生ê悲慘ê狀況；2）基督kap人生ê關係；3）Koh-khah重要ê是咱chiah-ê得救ê人生ê表現，咱ài時常存感恩ê心，完成咱ê使命——行善ê人生。