《林茂生博士論文》

 | | | 轉寄

[推薦序五] 一位熱愛母校ê教育家

作者 高俊明 2017.07.02

林茂生先生是一位偉大ê教育家。伊是第一位tī美國哥倫比亞大學完成博士課程，來得tio̍h哲學博士學位ê台灣人。

林博士bat擔任台灣大學ê文學院院長。伊tī少年ê時mā bat tī台灣台南市擔任過長榮中學ê教務主任；hit時，tú好是日本統治台灣ê時代。有一pái，台灣總督府ê民政長官下村宏來到長榮中學訪問。Hit時，下村長官捐贈真小額ê金錢hō͘長榮中學，並且做一首日語ê和歌（短詩）來表達伊ê感想。伊ê意思如下：
「M̄是松樹，mā m̄是櫻花，我送你chit-ê小花ê盆栽，請你khǹg tī你ê小窗邊。」

林博士聽了後，真敏感to̍h隨時感受tio̍h下村長官看bē起當時ê長榮中學；建設簡陋，學生無chē，m̄值得伊koh khah大力支持幫助ê意思。就án-ne，伊隨時用真súi ê日語做和歌回應下村長官，講： 「我tùi細窗á眺望校園，桃花李花四界盛開，有眼光ê人就ē-tàng看見。」Tī chit首短詩內面，ē-tàng看出林博士ê洞察力、智慧、才能、遠見、勇氣、正義感kah對母校ê真愛。

林博士ê博士論文「日本統治下台灣ê學校教育—它ê發展及有關文化ê歷史分析kah探討」，chit本冊是tùi台灣ê文化、地理、歷史等等ê角度來評論日本tī台灣所施行ê教育ê特色kah缺點。

林博士mā tùi政治上ê平等kah文化上ê平等，以及經濟上ê平等各方面來看日本tī台灣ê教育，koh kā chit種教育制度kah教育理論the̍h來kah當時ê先進國家ê殖民地教育比較。然後，林博士mā提出日本政府tī台灣ê教育方面應該有ê改革方案。

若咱用心閱讀林博士ê論文，就一定ē-tàng得tio̍h真chē ê啟蒙kah幫助。
（作者為台灣基督長老教會牧師）