《林茂生博士論文》

 | | | 轉寄

前言

作者 英語：林茂生,華語：林詠梅, 台語：林俊育 2017.08.13

福爾摩沙kah附近ê大陸相厝邊，tī地圖頂面kan-taⁿ是一個小點， m̄-koh，它是日本擁有siōng重要ê殖民地之一。Chit-ê島嶼tī地圖頂面ê形狀，hō͘人感覺是tī大湧ê太平洋裡ê一台細台船á。親像船需要一位有智慧、有遠見ê舵手去導航，chit-ê島嶼指望一位睿（jōe）智kah開明ê領導者去引chhōa它ê前途。日本tī chit島嶼上頭pái ê殖民實驗是m̄是成功，是一個真重要ê關鍵，m̄-nā影響它擔當遠東ê主導權，同時mā影響四百萬島民無限ê前 途。

Tī西元1895年，日本佔領台灣ê時，發見chit-ê島嶼ê 情況不比她本國tī明治維新以前好gōa少。日本用一代加一點á ê時間現代化她本國ê經驗，來全力從事現代化chit-ê島嶼。 她已經盡力建立法律kah秩序、利便交通、繁榮經濟、提升生活水準，以及良好ê衛生環境，她已經成功ā。今續落來ê工 作是啥物？是教育ê問題。事實上，甚至對她真嚴厲ê 批評者mā無法度否認日本已經完成一項真艱難ê工作，to̍h是普及化教育制度ê建立，這是台灣史上前所未有ê，m̄-koh，tī chit-ê過程中，猶原遇tio̍h所有殖民強權所面臨ê一般問題，以及屬tī殖民地ê特殊問題。因為這是東方人治理東方人ê日本統治下獨有特殊ê例。

「教育是國家ê百年大計」是日本人ê一句成語，大意 to̍h是「教育是一個國家長年ê大基石」。以三十四年ê時間 來批判日本ê教育實驗ê功、過，可能是siuⁿ早，m̄-koh，試探來保留並重新評估chit段實驗時期ê記錄，對將來ê改善kah進步所有ê意義，是無嫌siuⁿ短，而且是值得做ê。所以，筆者ê目的是beh來探討台灣ê發展，並紹介日本tī教育上努力ê重要因素；並對有關ê一kóa問題，提出有效果ê分析kah背後ê原因；koh加上一kóa建設性ê批評，來期待望實現皇室 對khiā起tī chit-ê島上ê兩個民族「tī文化發展上koh khah合作」ê理想。

M̄-koh，chit項工作只不過是一個開始。Chit項工作範圍hiah-ni̍h廣泛（hoat），而且問題koh hiah-ni̍h普遍，達到每一個個（kò）別ê論點lóng kah-ná值得成做一篇論文。根據chit點以及重要資料來源ê無容易，筆者認為目前ê工作並m̄是完成，卻是koh khah長遠、koh khah詳細ê研究ê開端，相信chit項工作會佔領伊ê餘生。

筆者tī chia ài beh向門羅教授（Professor Paul Monroe )、康德爾教授（Professor I. L. Kandel )，以及威爾遜教授 (Professor L. M. Wilson)表達深深ê感謝，因為tī chit項工作ê準備過程中，in hō͘ 我in ê寶貴建議kah批評，以及in友善ê關懷。Tī伊ê研究初期，康之博士（Dr. G.S. Counts）kah 克伯崔刻博士（Dr. W. H. Kilpatrick）兩位，hō͘ 我親切ê援助kah鼓勵；遺憾ê是，當伊teh beh完成chit本冊ê時，chit兩位tú好出國，soah無法度得益in ê批評。康之博士對chit份研究工作ê組織kah資料ê來源，bat hō͘ 我真chē有益ê建議。筆者mā一 併beh向tī台灣ê朋友表示衷心ê感謝，如羅萬俥、王金海、 胡丙申，以及田中（T. Tanaka）列位先生，因為in tī收集資料上有bē-tàng欠缺ê幫助。