《林茂生博士論文》

 | | | 轉寄

《日本統治下台灣ê學校教育》—其發展以及有關文化ê歷史分析kah探討

作者 英語：林茂生, 華語：林詠梅, 台語：林俊育 2017.04.23



Tī欣喜中參雜tio̍h hō͘人phut-phut-tiô ê圓滿情緒，我提筆為先父林茂生博士ê博士論文寫序。Chit篇論文是tī 1929年完成，先父mā因為án-ne來獲（he̍k）得哥倫比亞大學ê博士學位。Tī論文完成七十一年後ê chit時chit刻，終於ē-tàng出版面世，hō͘ 我koh khah感受tio̍h深刻ê欣慰之情。

會延chhiân hiah-ni̍h久，tio̍h歸因tī台灣經過將近一世紀久ê殖民統治，連連被日本（1895到1945年）kah中國國民黨兩個外來政權所佔領統治。Chit篇論文tī日本統治時期無法度出版ê原因，是因為它對殖民地政府ê教育政策提出嚴正ê批評。林茂生博士本來認為1945年日本戰敗了後，伊ē-tàng達成本冊得tio̍h出版ê心願，mā tī伊1947年死tī蔣介石所領導ê中國國民黨手中了後，有「曇花一現」。

發生tī 1947年2月28 ê「二二八事件」，tī經過長時間ê查禁了後，今á日已經是眾人lóng知，並且已經記載tī史料中。「二二八事件」發生了後，真chē台灣ê知識菁英lóng續接「失蹤」，á是被殺害，林茂生博士to̍h是其中之一。事實上，tī現在台灣人一般所提起ê「二二八事件」發生了後，國民黨ê軍隊kah情治單位為tio̍h beh鞏固權力，方便掌控kui個台灣，開始進行剷除（sán -tî）任何可能ê反對勢力；為tio̍h án-ne，至少有三萬個台灣人民無辜遭遇tio̍h殺害。Chit-ê恐怖時期開啟一黨獨裁ê統治，並且藉tio̍h三十八年久ê戒嚴法來厲行專制，直到1987年chiah廢除戒嚴法。林茂生博士ê論文tī台灣歷史ê烏暗時期無法度得tio̍h出版，一直到1987年台灣民主政治發芽了後，chiah終其尾tī伊心愛ê家鄉重見曙光（sú-kng）。

我認為，chit篇論文用各種方式，beh tī群眾認知kah討論上做出重要ê貢獻。我想beh特別借chit-ê理由，提出兩項真有價值ê所在。第一，chit篇論文對台灣學校教育ê形成kah沿革，提出重要ê歷史解釋kah說明。Tī chit-ê超過半世紀ê期間，台灣人頭一pái體驗tio̍h現代化ê力量。

第二，chit篇論文teh強調文化認同tī任何教育層面，特別是tī發展kah落實學校教育體系所強調ê價值觀上，有不可取代ê重要性。若對家己ê文化缺乏認知kah參與感，就無可能產生自信，thang進一步tī kah-ná春風ê支持群體中來培養自我獨立思考ê能力；這to̍h是真正ê教育所必備（pit-pī）ê要素。總是，日本政府tī台灣所施行ê殖民地教育政策卻長期否認chit點。國民黨統治下ê教育政策，照常延續過去一貫壓制台灣文化ê做法，一直到無gōa久以前lóng是án-ne。台灣未來ê教育一定tio̍h手牽手，行向台灣文化ê更新kah復興之途，這mā是林茂生博士tī伊ê論文中一再強調ê，並且是終其一生奮鬥ê原動力。阮誠懇希望伊ê論文ē-tàng激勵教育工作者，以及hiah-ê一向致力tī chit項重要任務，希望漸漸kā台灣推向國際社會ê有志之士。我想，he mā會是林茂生博士siōng強烈ê渴望。

Tī chia，我一定tio̍h對我唯一ê小妹，mā常常是阮老父歡樂ê來源ê徐林詠梅女士，表達我心內siōng深ê感謝。因為她ê文學恩賜、毅力kah投入，chiah ē-tàng完成chit本論文ê華語譯本；阮lóng真感謝她ê付出。最後，儘管阮過去承受真chē ê悲劇、失落kah不幸，m̄-koh，我iáu是願意thí開希望ê翼（si̍t），迎向未來。所以，tī chia我beh用丹麥哲學家齊克果（Sőren Kierkegaard）ê銘言來kah大家分享：「暴君一死，暴政必亡；殉道者雖亡，伊ê影響力卻beh啟動。」（The tyrant dies and his rule ends, the martyr dies and his work begins。）

（作者是林茂生愛鄉文化基金會創辦人）