《蘇老師 ê 台語教室》

 | | | 轉寄

學剃頭

作者 呂籽蓉 2024.01.28

學剃頭 呂籽蓉
我是50年代出世ê人，大環境ê經濟無kài好，真歹趁食，一傢伙有六ê大
人，九ê囡仔，頭喙真正濟，sī大人足辛苦。阮阿爸踏三輪車，阮阿母kah
阿媽in去隔壁莊外省ê眷村，kā人洗衫，嘛閣ài去菜園種菜，mā飼羊逐工
lóng有夠無閒，hō͘阮看kah足m̄甘--ê。我kā阿母講，我mài讀國中，我來
tàu趁錢，阿母講，mài讀冊ē像青mê牛ē足甘苦，我講等大漢咱若較ū錢
khah去讀冊啦。上疼我ê阿爸聽kah足感心，講我chiah-nī會曉想，beh
kā sī大人重擔tàu分擔，tō kā我chhōa去彌陀ê二高村五叔暇學剃頭，講
手若有學一把功夫就m̄驚iau腹肚，彼當陣囡仔學師仔足甘苦透早愛燒塗
炭，hō͘煙燻kah目睭bi bē開，目油㴙㴙滴，雜差仔工課有夠濟，抾材、破
材、磨刀、洗面巾，無家己ê時間，閣ū別ê師傅知影我是頭家ê姪仔，定會
tiau工kā阮蹧躂只有喙。齒根咬leh含著目屎m̄敢哭出來，有時氣甲擋袂
tiâu，足想beh放棄五嬸一直苦勸我較忍耐--ê，總有一工你mā會出頭天做
師傅時，這馬nā放棄足無彩mā對阮阿爸歹交代，有理是訓練無理當作磨
練，食苦當作食補，我想著有答應過阿爸ê代誌，kā家己講: 「天下無難
事，只驚有心人食得苦中苦，方為人上人!」自我安慰，鼓勵家己!較認真
上實在，經過兩冬，五叔講我ē-sái出師ah，叫五嬸chhōa我去電頭毛較像
大人款，hah電好看起來真正有像師傅ê型體，真是三分人七分粧。時間teh
過有夠緊，目一ē nih經過五十冬，五叔kah五嬸in lóng無tī世間，我真
感謝in對我ê栽培我較有今仔日ê成就家己開店做頭家。