《台語家庭》

 | | | 轉寄

愛哭青kap Hô͘-lin豆chiaⁿ ê故事(6-6)

作者 Teng Hongtin 2006.03.19

Ài-khàu-chheng kap Hô͘-lin-tāu-chiaⁿ ê kò͘-sū
愛哭青kap Hô͘-lin豆chiaⁿ ê故事(6-6)

青青感覺hô͘-lin豆實在是chiâⁿ厲害，充滿魔力。I開始後悔 ka-kī 過去ê行為，i無應該kā hô͘-lin豆ngoeh偷倒掉，koh kā ma-ma騙。

「我腹肚chiok iau--ê，kám ē-sái食你種ê hô͘-lin豆ngoeh--leh？」

「當然mā ē-tàng。」

Hô͘-lin豆chiaⁿ ê hô͘-lin豆ngoeh實在chiok好食--ê，青青jú食jú sòa嘴，chit時chūn，有1件魔法發生--a。

「Ah！Hô͘-lin豆chiaⁿ！我ē-hiáu飛--a，你看，我ê身軀有1對chiok súi ê金色ê si̍t--neh。我ē-tàng飛--a。」

青青chiâⁿ歡喜，chhan像1隻迷人ê ia̍h-á，tī hô͘-lin豆châng ê花蕊頂頭跳舞，日頭chiò落i ê身軀，看--起-來chhan像是五彩ê小天使。



「Oeh！青青！日頭chiò kha-chhng--a！你是beh睏kàu siáⁿ-mi̍h時chūn。青青！Kín起--來-lah！上課beh bōe赴--lo͘h。」 青青大力péng chi̍t下身軀，oa̍t頭繼續做 i ê眠夢。

「愛睏豬！好！我ài用特別ê手段chiah ē-tàng。我m̄信叫你叫bōe起來。我beh ngiau你ê鼻á--lo͘h。」

「Ah......Hah-chhiùⁿ！Hah-chhiùⁿ！Ah！Chia是siáⁿ-mi̍h所在--leh？Hô͘-lin豆chiaⁿ--leh？」

「Gōng gín-á，chia是lán tau--a，你iah-koh teh hām眠，是--無？」

青青目chiu peh kah金金金，oa̍t頭看--過-來相--過-去，看tio̍h i ê ma-ma kap pa-pa tng-teh準備上班。

「青！你khah kín起--來-lah，nā無，pa-pa kap ma-ma to̍h無ài ti̍h--你-a，beh kā你送hō͘別人--o͘。」Chit時chūn，青青雙手kā ma-ma攬tiâu-tiâu。

「Ma-ma！青青chiok愛pa-pa kap ma-ma--neh！青青後pái lóng ē乖乖食飯，mā ē愛食hô͘-lin豆--o͘！青青無ài送hō͘別人--o͘！」

(這篇文章kàu chia soah，感謝捧場。)