《Kahui ê Tâi-bûn Phû-tô-hn̂g》

 | | | 轉寄

2018 nî ê Tâi-gí pí-sài

作者 2020.07.05

Góa ē kì-tit beh pí-sài ê hit kang, góa bô siáⁿ kín-tiuⁿ, sim-chêng sǹg pêng-chēng, khì chē hóe-chhia ê sî-chūn hoan-thâu-hí-bīn, tō kā khì ah!

Beh Tâi-gí pí-sài ê só͘-chāi hām kū-nî chha-put-to, só͘-í ūi-tì chiok se̍k--ê, tō án-ne kiâⁿ khì beh pí ê kàu-sek. Kin-nî kap kū-nî bô kâng--ê--sī, ke chhâ jī-tián pí-sài. Góa sè-hán tha̍k kok-hāu 5 nî bat chham ka kòe Eng-gí chhâ jī-tián ê pí-sài, m̄-koh bô tio̍h-téng, sī góa hām-ban ê pí-sài.

2 hāng pí-sài sī chhâ jī-tián seng--ê, góa thê-chá ji̍p-lâi kàu-sek pī-pān, sing an-tēng sim-sîn. Chú-chî-jîn kóng 2 tiám tō beh khai-sí, teh pí ê sî-chūn, góa ê chhiú sī it-ti̍t chhoah bōe-têng, ū-kàu kín-tiuⁿ--ê, in-ūi bô pí kòe Tâi-gî ê chhâ jī-tián ê king-giām. Tē 1 kài chin-chiàⁿ sī pí kah chiok kiaⁿ-hiâⁿ--ê, pan-iâng ê sî góa khe̍h-tio̍h tē 3 miâ, chin-chiàⁿ sī chhoah chit-tiô, kái-sêng teh chó-bāng neh! M̄-káⁿ siōng-sìn ē tio̍h-miâ.

Koh lâi tō sī beh pí Pe̍h-ōe-jī, tī tē 1 koan góa ū pâi ji̍p--khì. tē 2 koan, góa teh siá Chiúⁿ kàu-siū chhut ê tê-bo̍k ê sî, sī khin-sang bīn-tùi, ta̍uh-ta̍uh-á siá góa ê tap-àn. chhūn 4 ê lâng teh pí ê sî, góa tō-sī kî-tiong chi̍t-ê, m̄-koh lāu-su chhut ê chi̍t tiâu góa hiông-hiông siūⁿ bōe--khì--lâi, siá m̄-tio̍h--khí, tō su--khì ah! só͘-í góa sī pâi tī tē 4 miâ, chhūn 3 ê lâng kè-sio̍k pí.

Góa kám-kak ū án-ne ê tio̍h-téng, sǹg bōe-bái ah! Lāu-su kā góa kóng, mê-nî koh ài lâi chham-ka o͘. góa kā kóng, hó ah ! bô-bûn-tê. sim-lāi teh siūⁿ, góa iáu-sī ē koh lâi sńg lah! ha!ha! hām ta̍k-ê tàu-tīn chin chhù-bī neh!

漢羅版
我會記得 beh 比賽 ê 彼工，我無啥緊張，心情算平靜，去坐火車ê 時陣歡頭喜面，就 kā 去ah! Beh 台語比賽 ê 所在 hām 舊年差不多，所以位置足熟 --ê，就按呢行去beh 比 ê 教室。今年 kap 舊年無kâng--ê--sī， 加查字典比賽。我細漢讀國校5 年 bat 參加過英文查字典比賽， m̄-koh無著頂，是我 ham-bān ê 比賽。
2項比賽是查字典先 --ê，我提早入來教室pī-pān，先安定心神。主持人講 2 點就beh 開始，the比 ê 時陣，我 ê 手是一直chhoah bōe-têng，有夠緊張 --ê，因為無比過台語ê 查字典 ê 經驗。第 1 改真正是比 kah 足 --ê，pan-iâng ê 時我提著第3 名，真正是 sī chhoah chit-tiô，蓋成 teh 做夢 neh! M̄-káⁿ 相信會著名。
Koh來就是 beh 比白話字，tī 第1 關我有排入 -- 去，第 2 關，我 teh 寫蔣教授出 ê 題目ê 時，是輕鬆面對， ta̍uh-ta̍uh-á 寫我 ê 答案。chhūn 4 ê 人 teh 比ê 時，我就是其中一 ê，m̄-koh 老師出ê 一條我雄雄想 bōe--khì--lâi，寫 m̄-tio̍h--khí，就輸 -- 去 ah!所以我是排 tī 第 4 名， chhūn 3 ê 人繼續比。
我感覺有按呢 ê 著頂，算 bōe-bái ah! 老師 kā 我講， 明年koh 愛來參加喔!我kā講，好ah !無問題。心內teh 想，我iáu-sī 會 koh 來耍 lah! 哈哈! hām ta̍k-ê 鬥陣真趣味neh!