《耶穌言行錄》

| | | 轉寄

Tē-92-chiuⁿ,Iâ-so͘ tèng sí tī si̍p-jī-kè

作者 Ko Kim-seng. 2010.01.10

（Má-thài 27：32-44；Má-khò 15：21-32； Lō͘-ka 23：26-43；Iok-hān 19：17-24）
Iâ-so͘ pē si̍p-jī-kè chhut-khì；káⁿ seng-khu ià-sian tòng-bōe-tiâu，chiū tú-tio̍h Kó͘-lī-nāi ê lâng miâ kiò Se-bûn，chèng-lâng bián-kióng i pē Iâ-so͘ ê si̍p-jī-kè.Tī lō͘-nih ū chōe-chōe hū-jîn-lâng thòe Iâ-so͘ thî-khàu kap siong-sim.Iâ-so͘ oa̍t-thâu kā in kóng，"M̄-sái thòe góa thî-khàu，nā-sī in-ūi lín ka-kī kap lín ê kiáⁿ-jî chiū thang thî-khàu. "

Kiâⁿ kàu chi̍t só͘-chāi miâ kiò Kok-kok-thaⁿ，tī hia tèng I tī si̍p-jī-kè.Iâ-so͘ kóng，"Pē ah，chèng-lâng m̄-chai só͘ chòe，tio̍h sià-bián in. "

Ū lâng ēng io̍h-chúi beh hō͘ Iâ-so͘ lim，I m̄ lim.

Peng-teng sì lâng í-keng tèng Iâ-so͘，chiū the̍h I ê saⁿ chòe sì-hūn pun，ta̍k ê peng pun chi̍t hun.Lāi-bīn ê saⁿ téng-ē sī kui niá chit—ê.Peng chiū liam-khau khòaⁿ chī-chūi tit-tio̍h.Sèng-chheh kóng，"In pun góa gōa-bīn ê saⁿ，liam-khau góa lāi-bīn ê saⁿ，"ū èng-giām.

Pí-lia̍p-to siá chám-tiâu tah tī si̍p-jī-kè téng，ēng Ki-lī-nî，Lô͘-má，Hi-pek-lâi ê jī lâi siá kóng，"Iû-thài lâng ê ông. "Chè-si bô hoaⁿ-hí，kiû Pí-lia̍p-to tio̍h ōaⁿ jī，siá kóng，"Ka-kī chheng-ho͘ Iû-thài ông. "Pí-lia̍p to m̄，kā in kóng，"Só͘ siá í-keng siá liáu. "

Hit ji̍t ia̍h tèng nn̄g ê hoān-lâng，chi̍t ê tī Iâ-so͘ ê iū-pêng，chi̍t ê tī chó-pêng.

Iû-si-koaⁿ kap chèng-lâng ki-chhì Iâ-so͘ kóng，"I kiù pa̍t lâng；nā chòe Ki-tok，Siōng-tè só͘ kéng—ê，tio̍h kiù ka-kī. "Peng-teng ia̍h hì-lāng，phâng chhò͘ hō͘ I，kóng，"Lí nā-sī Iû-thài lâng ê ông tio̍h kiù ka-kī. "

Kap I tiàu-teh nn̄g ê hoān-lâng，chi̍t ê ki-chhì kóng，"Lí nā chòe Ki-tok，tio̍h kiù ka-kī kap goán. "Hit ê tē-jī ê chek-pī tē-it ê kóng，"Lí saⁿ-tâng siū chōe，cháiⁿ-iūⁿ m̄ kiaⁿ Siōng-tè？Lán siū chōe sī kong-tō，in-ūi só͘ siū sī ha̍p lán ê só͘ kiâⁿ；nā-sī chit lâng ê só͘ kiâⁿ bô chi̍t hāng m̄-tio̍h. "Chiū kóng，"Iâ-so͘ ah，lí tit-tio̍h lí ê kok lâi ê sî，tio̍h kì-tit góa. "Iâ-so͘ kóng，"Góa si̍t-chāi kā lí kóng，Kin-á-ji̍t lí tek-khak kap góa kàu Lo̍k-hn̂g. "

思羅安台語點字網站