《耶穌言行錄》

| | | 轉寄

Tē-86-chiuⁿ,Boa̍t-ji̍t ê sím-phòaⁿ

作者 Ko Kim-seng. 2009.11.29

（Má-thài 25：31-46）
Iâ-so͘ ēng phì-jū kóng lóng-chóng ê lâng lō͘-bé tio̍h siū sím-phòaⁿ，chiū kóng，"Tng Jîn-chú tit-tio̍h êng-kng，kap lóng-chóng ê thiⁿ-sài kàu，chē I êng-kng ê ūi；bān peh-sìⁿ chū-chi̍p tī I ê bīn-chêng，sûi-sî pun-khui in，chhin-chhiūⁿ kò͘-iûⁿ ê pun biân-iûⁿ lī soaⁿ-iûⁿ；biân-iûⁿ lok chiàⁿ-pêng，soaⁿ-iûⁿ lok tò-pêng.Ông chiū kā chiàⁿ-pêng ê lâng kóng，"Lín tùi góa ê Pē siū-un，thang chìn-chêng siū-hok，chiū-sī tùi chhòng-chō sè-kan í-lâi，thòe lín só͘ pī-pān—ê.In-ūi góa iau，lín hō͘ góa chia̍h；góa chhùi-ta，lín hō͘ góa lim；góa chhut-gōa，lín hō͘ góa tòa；góa thǹg-pak-theh，lín hō͘ góa chheng；góa phòa-pīⁿ，lín chiàu-kò͘ góa；góa tī kaⁿ-nih，lín hó khoán-thāi góa. "Gī ê lâng ìn kóng，"Chú ah，sím-mi̍h sî khàoⁿ-kìⁿ lí iau，chiū hō͘ lí chia̍h？chhùi-ta，chiū hō͘ lí lim？Sím-mi̍h sî khòaⁿ-kìⁿ lí phòa-pīⁿ，á-sī tī kaⁿ-nih，chiū hó khoán-thāi lí？"Ông chiū kā in kóng，"Góa si̍t-si̍t kā lín kóng，Í-keng kiâⁿ án-ni khoán-thāi góa ê hiaⁿ-tī tē-it sòe ê chi̍t-ê，chiū-sī kiâⁿ i khoán-thāi góa. "Koh kā tò-pêng ê lâng kóng，"Lín siū chiù-chhàm—ê，tio̍h lī-khui góa，khì ji̍p éng-oán ê hé，chiū-sī in-ūi Mô͘-kúi kap i sù-chiá pī-pān—ê.In-ūi góa iau，lín bô hō͘ góa chia̍h；chhùi-ta，lín bô hō͘ góa lim；chhut-gōa，lín bô hō͘ góa tòa；thǹg-pak-theh，lín bô hō͘ góa chhēng；phòa-pīⁿ kap koaiⁿ-kaⁿ，lín bô chiàu-kò͘ góa. "In ìn kóng，"Chú ah，goán sím-mi̍h sî khòaⁿ-kìⁿ lí iau，chhùi-ta，chhut-gōa，thǹg-pak-theh，phòa-pīⁿ，koaiⁿ-kaⁿ，chiū bô ho̍k-sāi lí mah？"Ông chiū kā in kóng，"Góa si̍t-si̍t kā lí kóng，Í-keng bô kiâⁿ án-ni khoán-thāi chiah ê tē-it sòe ê chi̍t-ê，chiū-sī bô kiâⁿ i khoán-thāi góa. "Chiah ê lâng siū éng-oán ê hêng-hoa̍t，gī ê lâng ji̍p éng-oán-oa̍h. "

Tha̍k chit chiuⁿ thang chai lâng sí liáu lóng-chóng tio̍h siū sím-phòaⁿ；só͘-í lán iáu-kú oa̍h tī sè-kan tio̍h tāi-seng pī-pān āu-lâi sím-phòaⁿ ê tāi-chì.Kiám-chhái mn̄g，"Tio̍h kiâⁿ sím-mi̍h lâi pī-pān，chiah ōe ún-tàng，m̄-sái kiaⁿ sí-āu ê sím-phòaⁿ？"Chiū thang ìn kóng，"Tio̍h sìn óa-khò kiù-chú，in-ūi Sèng-chheh kóng，"Sìn chiū tit-tio̍h kiù；m̄ sìn chiū tēng-chōe. ""Kiám-chhái koh mn̄g，"Cháiⁿ-iūⁿ ōe chai sī sêng-si̍t sìn I？"Ìn kóng，"Tio̍h khòaⁿ ū chhut-la̍t o̍h I ê só͘ kiâⁿ lâi thàn I lóng-chóng ê kà-sī á bô. "Lán nā o̍h Kiù-chù ê só͘ kiâⁿ，thàn I ê kà-sī，chin-chiàⁿ chòe I ê ha̍k-seng，ài lī-ek chèng-lâng.Chit ê sī pîn-kù，sī sêng-si̍t thiàⁿ Chú；tī sím-phòaⁿ ê sî tek-khak hō͘ Chú chiap-;a̍p kàu éng-oán-oa̍h.

思羅安台語點字網站