《耶穌言行錄》

| | | 轉寄

Tē-77-chiuⁿ,Sat-kai

作者 Ko Kim-seng. 2009.09.27

（Lō͘-ka 19：1-10）
Iâ-so͘ ji̍p Iâ-lī-ko teh keng-kè ê sî，ū lâng miâ-kiò Sat-kai，sī chòe siu-hiòng ê thâu-lâng，ia̍h sī hó-gia̍h lâng，ài khòaⁿ-kìⁿ Iâ-so͘ sī sím-mi̍h hō ê lâng，nā-sī lâng chōe，ia̍h ka-kī sī óe-lâng，só͘-í khòaⁿ bōe tio̍h；phah-sǹg Iâ-so͘ beh tùi hia keng-kè，chiū cháu chòe-chêng，peh-chiūⁿ sng-châi-chhiū thang lâi khòaⁿ.Iâ-so͘ kàu，kia̍h-ba̍k khòaⁿ i，kóng，"Sat-kai kín-kín lo̍h-lâi，kin-á-ji̍t góa beh tòa tī lín chhù. "I chiū liâm-piⁿ lo̍h-lâi，hoaⁿ-hí chiap-la̍p Iâ-so͘.Chèng-lâng hiâm Iâ-so͘ kóng，"Cháiⁿ-iūⁿ khì hioh tī pháiⁿ-lâng ê só͘-chāi. "

Sat-kai khí-lâi tùi Chú kóng，"Chú ah，góa chiong só͘ ū ê chi̍t-pòaⁿ chín-chè sòng-hiong lâng；siat-sú bat bû-lōa le̍k-sek lâng，chiū chiong sì-pē lâi pê i. "Iâ-so͘ kóng，"Kin-á-ji̍t chí chit ke tit-tio̍h kiù，in-ūi chit lâng chòe A-pek-lia̍p-hàn ê hō͘-è；Jîn-chú kàu，sī beh chhē sit-lo̍h ê lâng lâi kiù i. "

Lán nā ài tit-tio̍h chin ê hok-khì tio̍h o̍h Sat-kai，hoaⁿ-hí chia̍p-la̍p Iâ-so͘，koh tio̍h o̍h i ê só͘ kiâⁿ.I í-keng hō͘ Iâ-so͘ tiàu，chiū liâm-piⁿ chhíⁿ-gō͘，siūⁿ chá le̍k-sek lâng sī tōa m̄-tio̍h.Chá Mô͘-se thoân lu̍t-lē kóng，"Lâng chòe chha̍t thau khan iûⁿ，tio̍h pê sì-pē. "Sat-kai sui-bóng bô tú-tú chhin-chhiūⁿ án-ni，chóng-sī chai i ēng khúi-khiat ê kè-bô͘ lâi tit-tio̍h chîⁿ，sī kap chòe chha̍t bô koh-iuⁿ，só͘-í tùi lâng the̍h chi̍t-pē kam-goān pê-pó͘ sì-pē：án-ni hián-bêng i ê kū-sim kū-khoán lóng kóe-ōaⁿ chòe sin. Lán chòe Iâ-so͘ ê ha̍k-seng eng-kai ū chit hō ê khoán-sit chiah tio̍h.

思羅安台語點字網站