《耶穌言行錄》

| | | 轉寄

Tē-74-chiuⁿ,Siàu-liân chhéng-mn̄g éng-oán-oa̍h

作者 Ko Kim-seng. 2009.09.06

（Má-thài 19：16-22；Má-khó 10：17-27； Lō͘-ka 18：18-23）
Iâ-so͘ chiok-hok gín-ná jiân-āu bô lōa-kú，ū chi̍t ê siàu-liân lâng，ia̍h sī chòe koaⁿ，lâi chiū-kūn Iâ-so͘，kūi-teh mn̄g kóng，"Hó ê sian-siⁿ ah，góa eng-kai tio̍h cháiⁿ-iūⁿ chòe，chiah ōe tit-tio̍h éng-oán-oa̍h？"Iâ-so͘ kóng，"Siáⁿ-sū chheng-ho͘ góa chòe hó，bô chi̍t lâng hó，to̍k-to̍k Siōng-tè nā-tiāⁿ；lí ái tit-tio̍h éng-oa̍h，tio̍h siú cha̍p-tiâu-kài. "Hit ê lâng ìn kóng，"Góa tùi sòe-hàn ê sî lóng siú；iáu-kú ū bē chīn mah？"Iâ-so͘ oa̍t-thâu khòaⁿ，thiàⁿ—i kóng，"Iáu-kú ū khiàm chi̍t hāng，tio̍h khì bōe só͘ ū ê lâi chín-chè sòng-hiong lâng，chiū ū chîⁿ-châi tī thiⁿ-nih；koh tio̍h lâi tè góa. "Hit ê lâng thiaⁿ-kìⁿ chit ê ōe chiū pìⁿ-bīn iu-būn，chòe i khì，sī i ê chîⁿ-châi chōe ê iân-kò͘.Iâ-so͘ sì-kòe khòaⁿ，kā ha̍k-seng kóng，"Pù-lâng ji̍p Siōng-tè ê kok chīn-chāi oh. "

Sè-kan chōe-chōe lâng chhin-chhiūⁿ chit ê siàu-liân lâng，lia̍h ka-kī chòe hó lâng，bô siuⁿ Siōng-tè ê lu̍t-hoat lâng thàn bōe kàu，in-ūi lâng gōa-phê sui-bóng bô hián-bêng sím-mi̍h pháiⁿ，iáu-kú sim-lāi ū pháiⁿ ê liām-thâu；hō͘ Siōng-tè khòaⁿ，bô m̄ sǹg sī ū chōe ê lâng.

Koh ū lâng chhin-chhiūⁿ chit ê siàu-liân lâng，tùi-tiōng chîⁿ-châi khah tùi-tiong Siōng-tè，ài chòe Iâ-so͘ ê ha̍k-seng ia̍h bōe chiâⁿ.Chóng-sī nā kam-goān khek ka-kī lâi tè Iâ-so͘，chiū ōe tit-tio̍h khah tōa ê hok-khì，chiū-sī éng-oán bōe pāi-hoāi ê chîⁿ-châi tī thiⁿ-nih.

思羅安台語點字網站