《耶穌言行錄》

| | | 轉寄

Tē-72-chiuⁿ,Lia̍p-sat-lō͘

作者 Ko Kim-seng. 2009.08.23

（Iok-hān 11：1-46）
Má-tāi，Má-lī-a ê hiaⁿ-tī Lia̍p-sat-lō͘ phòa-pīⁿ，in chiū chhe lâng chiū-kūn Iâ-so͘ kóng，"Chú ah，lí só͘ thiàⁿ ê lâng phòa-pīⁿ lah. "Iâ-so͘ thiaⁿ chit ê ōe，tī I ê só͘-chāi iû-goân tiàm nn̄g ji̍t.Āu-lâi kā ha̍k-seng kóng，"Kap góa koh khì Iû-thài，lán ê pêng-iú Lia̍p-sat-lō͘ teh khùn，góa beh khì kiò i chhíⁿ. "Ha̍k-seng kóng，"I teh khùn chiū hó. "Iâ-so͘ chiū bêng-bêng kā in kóng，"Lia̍p-sat-lō͘ í-keng sí lah，góa kai-chài bô tī hia，hō͘ lín thang sìn；taⁿ kap góa khì chiū-kūn i. "Iâ-so͘ kàu tè，Lia̍p-sat-lō͘ í-keng bâi-chòng sì ji̍t.Má-tāi thiaⁿ-kìⁿ Iâ-so͘ kàu，chhut-lâi ngiâ-chih I kóng，"Chú ah，lí nā tī chia，goán ê hiaⁿ-tī tek-khak bô sí. "Iâ-so͘ kóng，"Lín ê hiaⁿ-tī ōe koh-oa̍h. "Má-tāi kóng，"Góa chai lō͘-bé ji̍t koh-oa̍h ê sî，i tek-khak koh-oa̍h.

"Iâ-so͘ kóng，"Hō͘ lâng koh-oa̍h sī góa，hō͘ lâng ū sìⁿ-miā ia̍h sī góa，sìn góa ê lâng sui-bóng sí，tek-khak oa̍h；nā oa̍h lâi sìn góa，éng bōe sí；lí sìn mah？"Ìn kóng，"Chú ah，sī；góa sìn lí sī Siōng-tè ê Kiáⁿ Ki-tok，só͘ eng-kai tio̍h lâi sè-kan ê lâng. "Má-tāi kóng liáu，tò-khì àm-chīⁿ kiò Má-lī-a kóng，"Sian-siⁿ kàu，teh kiò lí. "Má-lī-a thiaⁿ-kìⁿ án-ni，kín-kín khí-lâi chiū-kūn Iâ-so͘，phak tī I ê kha-ê kóng，"Chú ah，lí nā tī chia，góa ê hiaⁿ-tī tek-khak bô sí.

"Iâ-so͘ khòaⁿ-kìⁿ chit ê hū-jîn-lâng thî-khàu，koh khòaⁿ-kìⁿ saⁿ-kap lâi ê Iû-thài lâng ia̍h thî-khàu，chiū siong-sim hoân-ló kóng，"I bâi-chòng tī tah-lo̍h？"Ìn kóng，"Chú lâi khòaⁿ.

"Iâ-so͘ lâu ba̍k-sái.Iâ-so͘ koh-chài siong-sim kàu bōng—nih.Bōng sī chio̍h-tōng，téng-bīn ū hē chio̍h.Iâ-so͘ kóng，"Sóa-khì hit ê chio̍h. "Má-tāi kóng，"Chú ah，taⁿ í-keng sì-ji̍t，sin-si hiú-nōa.

"Iâ-so͘ kóng，"Góa kiám bô kóng，Lín nā ū sìn ōe khòaⁿ-kìⁿ Siōng-tè ê êng-hián？"Lâng chiū chiong chio̍h sóa-khui.Iâ-so͘ kia̍h-ba̍k kóng，"Pē ah，í-keng thiaⁿ góa，góa kám-siā lí.Góa chai lí siông-siông thiaⁿ góa，to̍k-to̍k kóng án-mi，hō͘ ûi-teh khiā ê lâng lâi sìm lí sī chhe góa. "

Kóng liáu，tōa siaⁿ âu-kiò kóng，"Lia̍p-sat-lō͘ chhut-lâi. "Sí-lâng chiū chhut-lâi，kha-chhiú chat pò͘，bīn pau kun.Iâ-so͘ kóng，"Tháu khui hō͘ i kiâⁿ. "

Tùi án-ni chōe-chōe lâng sìn Iâ-so͘，hō͘ chè-si-thâu kap Hoat-lī-sài lâng it-hoat oàn-hūn，kè-bô͘ beh hām-hāi.

Chit ê tāi-chì thang hō͘ lán kì-tit Iâ-so͘ khah chá tùi Iû-thài lâng só͘ kóng ê tō-lí chí-sī lán，I ū koân，ōe hō͘ lán tit-tio̍h sin ê sìⁿ-miā，chiū-sī ōe têng-thâu-siⁿ lán ê sim，phì-jū hō͘ sim-si koh-oa̍h；ia̍h ū koân ōe hō͘ lán ê seng-khu tī boa̍t-ji̍t tùi bōng-nih chhut-lâi koh-oa̍h，tú-tio̍h hó pháiⁿ ê pò-èng.Hit ê ōe chiū-sī"Sî beh kàu，chit tia̍p chiū-sī，sí ê lâng ōe thiaⁿ-kìⁿ Siōng-tè ê Kiáⁿ ê siaⁿ，thiaⁿ ê lâng tek-khak oa̍h. "Pē ka-kī ū oa̍h-miā，siúⁿ-sù Kiáⁿ ū oa̍h-miā ia̍h sī án-ni.M̄-sái kî-koài chit ê tāi-chì，sî beh kàu，bōng-lāi ê lâng lóng-chóng ōe thiaⁿ-kìⁿ Jîn-chú ê siaⁿ chhut-lâi；chòe hó ê lâng khí-lâi tit-tio̍h oa̍h，chòe pháiⁿ ê lâng khí-lâi tú-tio̍h gí-chōe.

思羅安台語點字網站