《耶穌言行錄》

| | | 轉寄

Tē-66-chiuⁿ,Sit-lo̍h koh tit-tio̍h ê phì-jū

作者 Ko Kim-seng. 2009.07.12

（Lō͘-ka 15 chiuⁿ）
Chèng thiu-hiòng kap kiâⁿ pháiⁿ ê chiū-kūn Iâ-so͘.Hoat-lī-sài lâng，tha̍k-chheh lâng ki-chhì kóng，"Chit lâng sī chiap-la̍p pháiⁿ-lâng kap in chia̍h. "Iâ-so͘ chiū siat phì-jū kóng，"Lín tiong-kan sím-mi̍h lâng ū chi̍t pah chiah ê iûⁿ，sit-lo̍h chi̍t chiah，kiám bô pàng-sak káu-chàp-káu chiah tī soaⁿ-nih，khì chhê só͘ sit-lo̍h—ê kàu tio̍h？Chhē-tio̍h，hoaⁿ-hí chiū pē tī keng-thâu téng tò—lâi；kàu chhù，chiū kiò pêng-iú kap chhù-piⁿ chū-chi̍p，kā in kóng，"Tio̍h kap góa hoaⁿ-hí，góa só͘ sit-lo̍h ê iûⁿ í-keng chhē tio̍h. "Góa kā lín kóng，"Chhin-chhiūⁿ án-ni，hoān-chōe ê lâng chi̍t lâng hoán-hóe，chiū thiⁿ-nih in-ūi i ū hoaⁿ-hí，khah hoaⁿ-hí káu-cha̍p-káu ê gī-lâng m̄-sái hoán-hóe—ê. "Á-sī hū-jîn lâng ū cha̍p ê gûn-á，sit-lo̍h chi̍t-ê，kiám bô tiám teng sàu chhù siông-sè chhē kàu tio̍h？Chhē-tio̍h chiū kiò pêng-iú kap chhù-piⁿ chū-chi̍p，kā in kóng，"Tio̍h kap góa hoaⁿ-hí，só͘ sit-lo̍h ê gûn-á í-keng chhē-tiòh. "Góa kā lín kóng，Chhin-chhiūⁿ án-ni，hoān-chōe ê lâng chi̍t lâng hoán-hóe，chiū tī Siōng-tè，thiⁿ-sài ê bīn-chêng ia̍h ū hoaⁿ-hí. ""

Koh kóng，"Lâng ū nn̄g ê kiáⁿ；hit ê tē-jī kiáⁿ tùi lāu-pē kóng，"Pē ah，lí chiong góa só͘ eng-kai tit ê ke-hé lâi pun hō͘ góa. "Lāu-pē chiū kā in pun ke-hé.Bô lōa kú tē-jī kiáⁿ siu-si̍p lóng-chóng só͘ ū ê mi̍h，chhut-gōa khì hn̄g-hn̄g ê só͘-chāi，tī hia hòng-tōng，ke-hé lóng húi-hoāi.Só͘ ū ê mi̍h í-keng ēng liáu-liáu，tú-tio̍h hit só͘-chāi tōa ki-hng，chiū chai khiàm-kheh ê kan-khó͘；chiah khì óa hit só͘-chāi chi̍t ê peh-sìⁿ，hit lâng chhe i khì soaⁿ-nih chhī ti；bô lâng hō͘ i chia̍h，chiū ài chiong ti só͘ chia̍h ê tāu-ngoeh lâi chí-ki；āu-lâi chhíⁿ-gō͘ chiū ka-kī kóng，"Góa lāu-pē ū hiah chōe ê tn̂g-kang，lóng-chóng ū thang chia̍h put-chí kàu-gia̍h，ia̍h góa teh-beh gō-sí；taⁿ góa tio̍h khí-sin khì chhē góa ê lāu-pē，kā i kóng，Pē ah，góa tek-chōe thiⁿ，ia̍h tek-chōe lí，taⁿ liáu-āu góa bōe kham-tit kiò chòe lí ê kiáⁿ，tio̍h lia̍h góa chòe tn̂g-kang khoán-thāi. "Tùi hit tia̍p chiū khí-sin tò-khì chhē i ê lāu-pē；lī iáu-kú hn̄g，lāu-pē khòaⁿ-kìⁿ，khó-lîn，cháu kūn chêng phō i ê ām-kún chim—i.Kiáⁿ tùi lāu-pē kóng，"Pē ah，góa tek-chōe thiⁿ，ia̍h tek-chōe lí，taⁿ liáu-āu bōe kham-tit kiò chòe lí ê kiáⁿ. "Lāu-pē chiū hoan-hù I ê lô͘-po̍k kóng，"Hit ê tē-it hó ê phàu hiahnn lâi kā i chhēng，chiong chhiú-chí hō͘ i kòa，ôe chhēng i ê kha，ia̍h hit chiah pûi ê gû-á khan lâi thâi，lán lâi chia̍h，lâi hoaⁿ-hí；in-ūi góa chit ê kiáⁿ sí ū koh-oa̍h，sit-lo̍h ū koh tit-tio̍h.

"Tāi-ke chiū teh hoaⁿ-hí.Nā-sī hit ê tōa-kiáⁿ tī soaⁿ-nih，hit sî tò-lâi，lī chhù bô lōa hn̄g，thiaⁿ-kìⁿ ga̍k-khì kap thiàu-bú ê siaⁿ，chiū kiò chi̍t ê lô͘-po̍k lâi，mn̄g i，chit ê sī sím-mi̍h tāi-chì？Ìn i kóng，"Lí ê sió-tī kàu lah；lí ê lāu-pē tit i pêng-an tò-lâi，chiū lâi thâi hit chiah pûi ê gû-á. "Tōa-kiáⁿ siū-khì，m̄ ji̍p-khì；lāu-pē chiū chhut-lâi khǹg i.Tōa-kiáⁿ tùi lāu-pē kóng，"Góa ho̍k-sāi lí chiah chōe nî，lóng m̄-bat ûi-ke̍h lí ê bēng-lēng，lí ia̍h lóng m̄-bat chiong chi̍t chiah iûⁿ-á-kiáⁿ siúⁿ-sù góa，hō͘ góa thang kap pêng-iú lâi hoaⁿ-hí；nā-sī lí chit ê kiáⁿ kau-pôe chhiong-ki phòa-hùi lí ê ke-hé，tó—lâi，liâm-piⁿ thòe i thâi pûi ê gû-á. "Lāu-pē in kóng，"Kiáⁿ ah，lí siông-siông kap góa tī-teh，góa só͘ ū—ê lóng sī lí ê；chóng-sī lí chit ê sió-tī sí koh-oa̍h，sit-lo̍h koh tit-tio̍h，lán eng-kai tio̍h hoaⁿ-hí khoài-lo̍k. ""

Lán pún lī-khui Siōng-tè chòe Mô͘-kúi ê lô͘-châi，seng-khu，lêng-hûn lóng bōe pêng-an，ná chhin-chhiūⁿ tē-jī kiaⁿ.Nā-sī Siōng-tè iáu-kú chún lán hoán-hóe lâi chiū-kūn I，koh pâi-pí bān-hāng hok-khì hō͘ lán hióng-siū；án-ni thang chai I si̍t-chāi sī jîn-chû ê Pē.Koh khòaⁿ Sèng-chheh ū kì-chài Siōng-tè ê ōe kóng，"Pōe-ge̍k góa ê kiáⁿ ah，lín chit tia̍p kui tī góa tek-khak thiàⁿ lín，góa ê siū-khì chiū soah，bô beh hêng-hoa̍t lín. "

思羅安台語點字網站