《耶穌言行錄》

| | | 轉寄

Tē-57-chiuⁿ,Kó͘ⁿ siâ-kúi

作者 Ko Kim-seng. 2009.05.10

（Má-thài 17：14-21；Má-khó 9：14-29； Lō͘-ka 9：37-42）
Iâ-so͘ tùi soaⁿ-téng lo̍h lâi ê sî，ū chōe-chōe lâng ûi-lûi teh khiā kap ha̍k-seng saⁿ-kap kóng-ōe；chiông-tiong ū chi̍t lâng tōa siaⁿ kiò kóng，"Sian-siⁿ，kiû lí lîn-bín góa ê kiáⁿ，sī ko͘-siⁿ—ê；hō͘ siâ-sîn só͘ tîⁿ，hut-jiân âu-kiò kha-chhiú khiû-liû，lâu pe̍h-phe̍h-nōa，siông-siông hō͘ I hāi，oh-tit thoat-lī：góa bat kiû lí ê ha̍k-seng lâi kóaⁿ，in bōe-ōe. "Iâ-so͘ kóng，"Tio̍h chhōa lí ê kiáⁿ chiū-kūn góa. "Hit ê lâng sûi-sî chhōa I lâi.Chi̍t-ê khòaⁿ-kìⁿ Iâ-so͘，sîn chiū khiú-la̍k i，tó tī tōe-nih，hoan-lâi hoan-khì，ia̍h lâu-nōa.

Iâ-so͘ mn̄g I ê lāu-pē kóng，"Lí ê kiáⁿ hoān-tio̍h chit ê sîn ū lōa-kú？"Ìn kóng，"Tùi sòe-hàn ê sî；lí nā chòe ōe lâi，chiū lîn-bín lâi pang-chān góa. "Iâ-so͘ kóng，"Lí kóng"Lí nā ōe"，lâng nā sin chiū bô só͘ m̄-ōe. "I chiū liâm-piⁿ âu-kiò kóng，"Chú ah，góa sìn，nā sìn bōe chhim，chiū tio̍h pang-chān góa. "

Iâ-so͘ hoah siâ-sîn.Sîn tōa siaⁿ kiò，chin khiú-la̍k I chiū chhut；hit ê kiáⁿ ná sí chi̍t-poaⁿ-iūⁿ，lâng phah-sǹg i í-keng sí.Iâ-so͘ khan I ê chhiú hû i，kau hō͘ lāu-pē.

Ha̍k-seng àm-chīⁿ chiū-kūn Iâ-so͘ kóng，"Goán bōe kóaⁿ kúi sī cháiⁿ-iūⁿ？"Iâ-so͘ kóng，"Sī m̄-sìn ê iân-kò͘. "

思羅安台語點字網站