《耶穌言行錄》

| | | 轉寄

Tē-24-chiuⁿ,Thó-hî ê tāi-chì

作者 Ko Kim-seng. 2008.09.21

（Má-thài 4：18-22；Má-khó 1：16-26； Lō͘-ka 5：1-11）
Ū chi̍t ji̍t，Iâ-so͘ khiā tī Ka-lī-lī ê hái-kîⁿ kóng tō-lí，lâng chin-chōe the thiaⁿ；ū nn̄g chiah thó-hî chûn pha-teh，chûn-téng bô lâng tī-teh，ū chiūⁿ-hōaⁿ lâi sóe bāng.

Chi̍t chiah sio̍k tī Se-bûn.Hit ê Se-bun chiū-sī An-tek-lia̍t ê hiaⁿ-tī，chêng An-tek-lia̍t bat chhōa i lâi lìⁿ Iâ-so͘.Iâ-so͘ chiū lo̍h i ê chûn，kah i lio̍h-lio̍h-á khui；chiū chē-the kóng tō-lí kà-sī hōaⁿ-téng the khiā ê lâng.Iâ-so͘ knog2 soah，vhiu7 kah Se-bûn pàng chûn khah khui pha-bāng thó-hî.Se-bûn ìn kóng，Sian-siⁿ，goan thong-m̂ tio̍h-bôa，lia̍h lóng bô，nā-sī chiàu lí ê ōe，goán tio̍h pha-bāng.Hit-tia̍p pha-bāng thó tio̍h hî chin-chōe，bāng kàu beh li̍h，chiū chio pa̍t chiah chûn lâi pang-chān，nn̄g chiah chûn chài hî kàu beh tîm-lo̍h-khì.Án-ni sī hián-bêng Iâ-so͘ ê tōa koân-lêng，ia̍h sī hián-bêng thiàⁿ I ê ha̍k-seng ê sim.Se-bûn Pí-tek khòaⁿ-kìⁿ án-ni，chiū phak tī Iâ-so͘ ê kha-ē，kóng，"Chú ah，tio̍h lī-khui góa，góa sī ū chōe ê lâng；"kóng án-ni，in-ūi chai Iâ-so͘ ê chun-kùi，só͘-í siūⁿ ka-kī bōe kham-tit Iâ-so͘ kap i tiàm.Iâ-so͘ chai Pí-tek ê sim，chiah kóng，"M̄-sài kiaⁿ；liáu-āu lí ōe tit-tio̍h lâng. "Che sī chí Pí-tek chòe thoân-tō ê kang，tit-tio̍h lâng chòe Iâ-so͘ ê ha̍k-seng，chhin-chhiūⁿ tit-tio̍h hî hiah chōe.Se-bûn kap tâng-phōaⁿ thoa chûn óa-soaⁿ，lóng-chóng pàng-sak，lâi tè Iâ-so͘.Iâ-so͘ kiâⁿ bô lōa-hn̄g koh khòaⁿ-kìⁿ nn̄g ê thó-hî lâng，chi̍t ê miâ Ngá-kok，chi̍t ê miâ Iok-hān，hiaⁿ-tī-á kap in lāu-pē tī chûn-nih the pó͘ bāng.Iâ-so͘ chio in，sûi-sî lī-khui pē lâi tè Iâ-so͘.Lán tio̍h o̍h chiah ê ha̍k-seng ê khoán，ta̍k hāng thàn Iâ-so͘ ê bēng-lēng，chiah ōe tit-tio̍h hok-khì.

思羅安台語點字網站