《耶穌言行錄》

| | | 轉寄

Tē-16-chiuⁿ,Iâ-so͘ chio ha̍k-seng

作者 Ko Kim-seng. 2008.07.27

（Iok-hān 1：35-52）
Kè ji̍t Iok-hān i nn̄g ê ha̍k-seng the khiā，khòaⁿ-kìⁿ Iâ-so͘ the kiâⁿ，chiū kā i ê ha̍k-seng kóng，"Khòaⁿ Siōng-tè ê Iûⁿ-ko. "Nn̄g ê ha̍k-seng thiaⁿ-kìⁿ chit ê ōe，chiū tè Iâ-so͘.Iâ-so͘ oa̍t thâu khòaⁿ-kìⁿ nn̄g ê ha̍k-seng tè I，chiū mn̄g kóng，"Lín beh kiû sím-mi̍h？"In ìn kóng，"Sian-siⁿ，lí tah-lo̍h khiā？"Iâ-so͘ kóng，"Tè góa lâi khì khòaⁿ. "Chiū khì khòaⁿ I só͘ tiàm ê só͘-chāi，saⁿ-kap hioh tī hia，tit-tio̍h chin hó ê ki-hōe thang thiaⁿ Iâ-so͘ ê kà-sī.In tiong-kan chi̍t lâng，chiū-sī An-tek-lia̍t.I khì kā i ê hiaⁿ-tī Se-bûn kóng，"Goán ū tú-tio̍h Bí-sài-a，"chiū chhōa i khì kìⁿ Iâ-so͘.Iâ-so͘ khòaⁿ chiū kóng，"Lí sī Iok-hān ê kiáⁿ Se-bûn，beh chheng-ho͘ chòe Ki-hoat. "（Ki-hoat kap Pí-tek sī saⁿ-tâng ê ì-sù.Ki-hoat sī Hi-pek-lâi ê im，Pí-tek sī Hi-la̍ip ê im，ì-sù sī chio̍h）.Pí-tek āu lâi chòe sù-tô͘，chiū-sī cha̍p-jī ê chi̍t-ê.

Koh kè-ji̍t，Iâ-so͘ beh khì Ka-lī-lī，tú-tio̍h Hui-le̍k，chiū kā i kóng，"Tè góa. "Āu-lâi Hui-le̍k khì kā Ná-tàn-gia̍p kóng，"Mô͘-se ê lu̍t-hoat kap Sian-ti ê chheh só͘ kì ê lâng，goán ū khòaⁿ-kìⁿ，chiū-sī Iok-sek ê kiáⁿ，Ná-sat-le̍k ê lâng Iâ-so͘. "

Ná-tàn-gia̍p tùi i kóng，"Ná-sat-le̍k kiám ōe chhut sím-mi̍h kàu jōa-hó ê lâng mah？"Hui-le̍k knog2，"Lí lâi lhoann3. "Iâ-so͘ khòaⁿ-kìⁿ Ná-tàn-gia̍p lâi chiū kóng，"Chit ê sêng-si̍t sī í-sek-liat ê lâng，bô kan-chá ê. "Ná-tàn-gia̍p tùi Iâ-so͘ kóng，"Cháiⁿ-iūⁿ ōe bat góa？"Iâ-so͘ ìn i kóng，Hui-le̍k iáu-bē kiò lí，lí tī bû-hoa-kó chhiū-ē，góa í-keng khòaⁿ-kìⁿ lí lah. "Ná-tàn-gia̍p chiū kóng，"Sian-siⁿ chin-chiàⁿ sī Siōng-tè ê Kiánⁿ，í-sek-lia̍t ê ông. "Iâ-so͘ kóng，"Góa kóng，Bû-hoa-kó chhiū-ē，khòaⁿ-kìⁿ lí，lí sìn hò͘ⁿ？Āu-lai5li2 ōe khòaⁿ pí chit ê tāi-chì koh-khah tōa ê ，chiū-sī ōe khòaⁿ thiⁿ khui，Siōng-tè ê chhe-sài chiūⁿ-lo̍h tī Jîn-chú ê téng-bīn. "

Lán chòe Iâ-so͘ ê ha̍k-seng，tio̍h o̍h chhin-chhiūⁿ An-tek-lia̍t，Hui-le̍k，ín-chhōa lâng lâi chiū-kūn Iâ-so͘.Ia̍h tio̍h o̍h Ná-tàn-gia̍p sêng-si̍t bô kan-chà ê khoán-sit.

思羅安台語點字網站