《哈佛台語筆記》

 | | | 轉寄

主日學應該恢復母語教學

作者 李勤岸 2007.10.14

Tī chia 講ê主日學是指兒童主日學，嘛kan-na beh 討論長老教會ê主日學。

歷史上看起來，教會ê主日學是tòe 學校ê 語言教育teh 行。不過，是攏tòe tī 足後壁，m̄ 是tòe tiâu-tiâu。比如講當學校已經teh 使用華語（所謂國語）ah,主日學猶teh 教白話字，用母語（Holo話、客話、原住民話）教學。現此時，學校已經開始teh 推行母語教學ah,主日學猶teh 用華語教學。 到底主日學ê語言使用比學校ê 語言使用慢偌久，無做真精確ê 調查，無真瞭解，不過，我推測可能慢leh二、三十冬左右。換句話講，主日學tī語言選擇上真保守，算是後知後覺。咱照按呢kā推測，主日學若beh 恢復母語教學可能ài koh 經過二、三十冬。到彼陣，嘛免恢復母語教學ah ，因為到時母語已經死beh 了ah。

為甚麼主日學beh 選擇華語做教學語言？真簡單，主日學目的只要是hō͘囡仔認bat 上帝，m̄ 是beh 來做母語教學ê ，嘛m̄是beh做文化傳播ê 。所以，使用囡仔聽有koh 會曉講ê 語言理所當然 。主日學並無選擇語言，是囡仔ê 語言去決定主日學ê 語言使用。這參教會做禮拜ê 語言選擇真相像 。因為現此時做禮拜ê 人大多數猶是以年長者為主，in 是慣習母語ê人口，所以禮拜猶是用母語。以此推論，年長人口凋零以後，主日學華語人口ê 這代會替代頂一代成做教會ê主要成分，按呢長老教會自然而然變做華語教會。

台語禮拜ê 教會tī北美洲變做華語教會ê例真濟。有台福教會，嘛有長老教會。我bat 去美南ê 一間教會講演，參加in ê 禮拜，牧師是一個長老教會ê 牧師，伊用台灣腔足重ê 「台灣國語」講道，家己嘛感覺真無自在，但是無法度，因為教會有幾個中國來ê kap 一個東南亞來ê 會友，in 聽無台語，「咱m̄通 hō͘語言成做傳播福音ê 障礙！」。這是一句非常有說服力ê 話。 真歹kā 伊反駁，畢竟傳福音是教會ê 基本原則。不過，假使這句話若成做教會語言使用ê 指導原則，咱ê 教會一定陸續淪陷，一間一間成做華語教會，以後甚至成做英語教會。Tī 北美洲，嘛有可能有講英語ê人會來咱教會，咱是m̄是嘛應該改用英語做禮拜？其實，第二代ê 囡仔大多數kan-na 會曉英語，以後無改用英語嘛無可能。按呢，台語教會自然而然tī 北美洲會變做英語教會，tī台灣會變做華語教會。這個地球，以後就無台語教會。這敢是上帝ê旨意？上帝敢希望人類用一個語言崇拜伊？咱按呢做，雖然「無hō͘語言成做傳播福音ê 障礙」，但是是m̄ 是已經障礙咱ê 母語去傳播福音？ 耶穌kā伊ê 門徒講去普天下傳福音，是叫in 用各國ê 母語傳福音，抑是用希伯來語傳福音？咱相信m̄是叫in 用in 家己ê 語言希伯來語去傳，因為若按呢，咱chit-mái tī教會應該攏teh 講希伯來語。初代教會以及後來各教派去到任何所在傳教，攏是學習當地ê 語言， 用當地ê 語言傳福音，翻譯聖經。長老教會早期ê傳教士攏嘛遵照這個原則，巴克禮翻譯聖經是根據這個原則，甘為霖編字典是根據這個原則，馬偕設教會嘛是根據這個原則。

這個原則就是上帝ài咱用咱ê 母語傳福音，用普天下各種無仝ê 母語傳仝一個福音，m̄ 是用仝一個語言傳各種無仝ê福音。聽無當地ê 母語，m̄是當地ê語言ài去遷就伊，去講伊聽有ê 語言，是伊應當來學當地ê 母語。會友準講無beh 學當地ê 語言，嘛會tàng 用同步翻譯ê 方式hō͘ in 聽有。

人類ê 語言一直teh 死亡中，死亡ê 速度真緊。現此時世界約有六千個語言，語言學家警告講若無去保護弱勢語言，tī這個世紀末，就會死到chhun 一半。台灣現此時有十四個語言，聯合國教科文組織警告咱講，台灣人若無beh去保護弱勢語言，koh 無偌久，就會全部liam-mi 消失，chhun 華語留落來。

人類需要保留愈濟語言，保留愈濟文化，hō͘世界愈多元愈繽紛美麗，相信這是合上帝所意愛ê ，若無，上帝bē hō͘人類有chiah 濟人種，hō͘人類chiah 濟語言，bē hō͘傳教士用各地ê 母語傳教，bē hō͘各種語言有伊家己ê 聖經。

台灣人有責任為人類保存咱當地ê 語言文化，長老教會嘛有義務維持使用當地ê 母語傳教。Beh 會tàng hō͘教會繼續使用母語傳教，ài ùi 兒童主日學做起。長老教會應該恢復主日學ê白話字教學，恢復母語做兒童主日學ê教學語言。

若無，咱攏來等待長老教會變做華語教會，變做英語教會。