《哈佛台語筆記》

 | | | 轉寄

新師訓練

作者 李勤岸 2007.04.08

我教冊十四冬，兼任ê mài算，mā教過四間學校，m̄-bat參加過「新師訓練」。做學生ê時間koh khah久，經過ê學校koh khah儕，有ê真正有kā新生做orientation，有ê，利用這個時間整理學校ê環境，掃塗kha、拭窗仔、割草••••••。

哈佛對新進人員除了熱情ê歡迎會真儕以外，koh正正式式舉辦學術性真重ê新師訓練。

你無法度無感覺哈佛ê熱情，伊ê welcome party一個過一個。有ê kan-taⁿ食物件、交誼，有ê koh兼orientation。食物件m̄是凊采辦，攏有師傅來煮食、烘肉，koh有服務生來泡酒、thîn酒、phâng菜。看--起-來攏是請專業ê餐廳入來辦--ê。哈佛講是全美上好額ê學校，你無法度m̄相信。哈佛燕京學社邀請東亞語文系、燕京圖書館所有ê師生、職員來tī主任杜維明教授ê厝，tī校園邊仔，tī語言部辦公室對面。杜教授tī門kha口，tsham ta̍k個人客握手。人客kheh-kheh-kheh，穩當有規百人。食飽koh安排音樂演奏幫助消化。東亞系家己另外koh tī大學部辦公室外口曠闊ê草埔頂kuân辦一場烘肉迎新。系主任Peter Bol坐tī塗kha及學生沿仔食沿仔開講。我tsham幾個行政助理及研究生kheh一塊野餐桌。廚子（toô-tsí）、調酒師穿白色制服、戴高帽仔，se̍h來se̍h去teh服務。大學部家己koh辦一場，野餐桌頂排滿滿，攏是真好料ê日本料理。國際辦公室mā辦tsheⁿ-tshau邀請所有新來ê外國學者、學生。我有熟似著羅馬尼亞、英國、法國、瑞典、日本、越南ê訪問學者及學生，mā tú著兩個中國來ê學者，一個真有國際禮儀，用英語tsham我對話到底，另外一個，看我ê名牌寫台灣，就用北京話beh牽親引戚，我隨kā講：「Excuse me！beh來食麵--ah。」，麵ê北京話就是「免」--lah。

全校新進人員orientation辦了上頂真，每禮拜二早時tī教授俱樂部（Havard Faculty Club）舉行，連續辦一個月，請食早頓，用電腦powerpoint展示，簡介哈佛、紹介健康保險、退休金制度。我ê健康保險單已經交--去、聽了tsiah知影意外保險無保無彩，一個月納十幾箍niâ，若是意外致使bē-tàng工作，哈佛就ài飼你一世人。佳哉會tàng koh改。改了，真有安全感。

開學前兩工，新師訓練堂堂登場。Tī專門幫贊教學ê Derek Bok大樓舉行。Derek Bok tī 1971年到91年做校長。伊做校長ê時tsiah四十二歲。Tī伊任內，哈佛成做世界性ê大學。Mā是tī伊任內成立教學學習中心，每學期初辦理新師訓練，印教學法手冊、製作教學影帶•••••。若是老師要求，in就來教室錄影，hoō老師做教學改進路用。

九點開始報到，外口廣場用搭布帆，歐式自助早頓服務，六人ê坐桌排二、三十桌。看去大部份真少年，可能是助教（teaching fellow），無就是少年教授，像阮這款老歲仔真少。新校長Summers是頂任ê美國財政部長，以前哈佛經濟系教授，坐tī阮隔壁桌。九點半，司儀宣佈校長致辭。伊peh--起-來，西裝留tī椅仔，後壁siat-tsuh落出來一大tsat。伊講話態度輕鬆、親切、幽默，開場先捧場，講：「在座ê是哈佛最重要ê成員，是直接及學生接觸ê先鋒。」伊家己mā是教員，真清楚老師ê輕重，「有三點beh kap大家勉勵：第一、你永遠m̄知影家己ê極限，ài時常檢討家己tī台仔頂ê缺失，」伊舉Clinton做例，講：「伊時常觀看家己演講ê影帶來改進家己」；「第二、ài想辦法接觸學生，m̄-thang lia̍h講你有office hour學生就會來tshuē--你，有ê人個性pì-sù，真oh主動去tshuē老師，你ài設法去接近--伊；第三、應該tī家庭、社區kā家己ê角色扮演好勢，m̄-thang kan-taⁿ無暝無日浸tī『工作』--ni̍h。」

十點，研討會（workshop）開始。有兩個時段，每時段同時有十場，你bē-tàng攏參加，雖然逐場看--起-來攏真精彩。第一時段，我揀「用文學教語言ê方法」。主持--ê是一對少年漂撇ê助教，in用Shakespeare ê詩做例，運用多媒體、小組討論來present。第二時段，我揀「按怎應付學習失能（disability）ê學生」，由哈佛學習失能中心主任及一位資深ê心理學教授主持。In講tī哈佛教冊ài有十份一ê學生有學習失能現象ê心理準備，學習失能包括殘障、心理障礙、壓力、語言能力khah bài等。每場攏準備kah真豐富，下課koh要求逐人填評鑑、寫意見。

下課，出來大樓外口廣場，一排真長ê「師隊伍」beh享受歐陸自助餐，有廚子（toô-tsí）kā你切牛肉。Buffet食了，e晡koh有三節課。

2001.9.10 初稿，2002.1.7改

本文是tī《哈佛台語筆記》輯一〈Journal•筆記－－哈佛校園聽著台語ê鐘聲〉內底ê頭一篇