《哈佛台語筆記》

 | | | 轉寄

週末ê 舊金山

作者 李勤岸 2007.06.03

舊金山幾位聯盟ê 兄姊邀請我kap Berkeley 台灣主權學生社ê 學生做夥食brunch，tī 一間台灣餐廳， in 有逐種台灣小食。少年ê 坐一桌，老歲仔坐一桌。老歲仔雞捲食有chhun ，捧過去beh hō͘ 少年仔，發現in 嘛有點。可見這二代除了台獨這味以外，猶有相通ê 口味。 Andy 講in 老母嫌伊台語有美國腔，我想，tī 美國出世、大漢ê 囡仔，若猶會曉點幾項仔有台灣口味ê 菜，beh 講台語，有腔無要緊。Berkeley 第二代ê 台灣囡仔，tī 學校組台灣主權社，辦台灣文化活動，koh 開台語班，無老師家己教，實在hō͘人感心。相信chiâe 優秀ê 台灣人有一工對台灣ê 貢獻一定bē 輸tī 美國ê猶太人對以色列ê 貢獻。

基隆兄Berkeley 畢業了後留tī 舊金山加州大學醫學中心做研究，這是全美一頂一ê 研究中心，伊所做ê 生科研究成果，最近台灣有廠商kap 伊簽約beh 開始生產。英資兄嘛是Berkeley 畢業ê 科學家，已經退休，幾冬前開始台譯美國作家Sneider 描寫228前後ê台灣小說『一桶蚵仔』，舊年完稿，交hō͘ 阮查某囡仔嘉宜拍字，已經有買著版權，連鞭 beh 出版。子貴兄tī 灣區捷公司做工程師，舊金山ê 地下鐵就是伊參與設計ê ，做二十冬才完成，最近beh koh 延長到機場。當時阿扁啊做台北市長ê 時，捷運出問題，就是派人來chia考察，才解決ê 。 北加州ê 聯盟支部支部長目前是琇蓉姊， in 翁庭和兄，北加州台灣同鄉會會長抵落任，真愛講笑，台灣菜配台灣笑話，消化上蓋好。最近南灣台灣人beh 辦台語學校，beh 派庭和兄kap 錦鐘兄轉去台灣受訓。

聽講我對地下鐵有趣味，宗昌嫂仔阿肅姊Sue答應beh 做導遊，chhōa 我坐地下鐵。

我對地下鐵有興趣是舊年開始ê ，舊年轉去台灣教冊，時常去台北開會，真濟機會坐捷運，發現台北ê 地下鐵真進步，速度緊koh 清氣，旅客照規定khiā tī 等候ê 格仔位，顯然是足有水準ê 現代化都市kap 現代國民。以前，我真無愛去台北，自從有捷運了後，我對台北開始好印象。地下鐵ê 感覺真好，人若落去地下，四通八達，bē 去妨礙著地上ê 交通，這是我心目中ê 現代都市。波士頓ê 地下鐵嘛是足發達，抵來彼個月tiau-tî 買combo ê 車票，會當坐公車，嘛會當坐地下鐵，希望有閒ê 時地上地下四界jōa-jōa sô。

波士頓ê 地下鐵叫做 T，是交通 (transportation) ê 第一個字母；chiâe 叫做BART(肉鐵），是灣區捷運 (Bay Area Rapid Transit) ê 第一個字母ê 縮寫。

這個 T(『鐵』)，khah 新，鐵枝khah 闊，車內鋪地毯，座位m̄ 是像波士頓ê T規排ê ，是像飛機頂ê 座位，坐著真爽快，嘛加真清氣。不過，khah 貴，是參台北捷運仝款，照旅途距離算票價，波士頓是一箍銀由在你坐。

買票了後，想beh 來便所一下，結果攏關起來啊，911以後，便所驚hō͘ 恐怖分子利用，攏關關leh 。只好koh 起來路裡chhōe 麥當勞解決。

Tī Oakland 附近有一段鑽過海底，約chiâⁿ 10 分鐘，耳孔有水壓，飛行機起飛抑是降落ê 感覺。可惜， in 無做透明ê ，bē 當看著海底ê 景緻，只好想像鯊魚tī 火車邊仔泅來泅去。聽講頂回舊金山大地動ê 時停電，有一班火車停tī 海底，bē 振bē 動，m̄ 知坐tī 烏烏暗暗ê 海底，會有偌恐怖？

Oakland 講是全美凶殺率上高ê 所在，有夠恐怖tō 著。

Tī 舊金山市中心落車。

Sue chhōa 我去看一個紀念烏人民權領袖Martin Luther King ê 水沖，壁頂是金恩當年tī Washington D.C. 演講ê 話句。伊講：『...Bē ！阮bē 滿足！ 直到有一工，公義親像水沖流滿土地...』根據這個理念，這個水沖hō͘ 水流滿水池，koh hō͘ 溢出來。水聲，自由ê 水聲，人權ê 水聲，tī 偓促ê 都市中心，沖洗市民ê 心靈。

邊仔有一間大戲園，今仔日是世界舊年上暢銷ê 小說家Harry Potter ê 電影首映，觀眾幾若千人攏戲園外口，原來是抵著防空演習，hō͘ 人趕出來。

正手旁是三藩市現代藝術館，6冬前才起ê。今年koh 是加州出身ê 美國偉大攝影家Anser Adam 100歲ê 生日，有伊ê 特展，Adam 用伊ê 鏡頭紀錄美國自然景觀ê súi ，特別是國家公園ê 壯麗。嘛有看著一個美國女畫家，畫真濟圖是我tī 機頂看落來ê 景緻，彼款幾何圖形ê 景緻，伊一定嘛是真愛坐飛行機看風景ê 人，m̄ 知伊猶koh 活leh 無？

Beh 黃昏ê 時，想講金門大橋ê 落日穩當真súi 。離傷遠，嘛無愛去橋頂，因為最近這個烏人市長才hōng 講恐怖分子會攻擊舊金山ê 五個大橋。阮就近 peh 起去美麗鐵(Marriot)大飯店ê 39樓，chhàu-tú-khám 是一個真有氣氛ê 咖啡廳，Sue 叫一杯咖啡，我叫一罐當地ê bì-lù，看日頭ûn-ûn-á斜西。金門大橋tī khah 遠ê 彼角落，日頭tī 有山ê 這旁。日頭猶未變súi 色就落去，都市ê 燈火漸漸光起來，服務生來kā 阮點蠟條。舊金山ê 夜景比黃昏ê 落日khah 好看。

2001/11/18

（Chit篇本底是《哈佛台語筆記》輯一 Journal•筆記－哈佛校園聽著台語ê鐘聲ê第 9 篇）