《當上帝開嘴講台語》

 | | | 轉寄

5.3.2.1 閱讀測驗的成績比較-2

作者 梁淑慧 2009.06.28

另外，閱讀速度ê計算如下：將受訪者所記錄ê時間換算做秒數，chiah用各題ê總音節數去除各題ê秒數，to̍h是每秒鐘平均閱讀ê音節數。為著避免實際上看無題目、烏白亂臆答案ê情形，咱kan-taⁿ計算各文字類型中，5題全部回答正確者ê閱讀速度。結果如下：

表5.3.2.1b 各種文字ê閱讀速度比較（受訪者總人數234人）

全漢字人數160（68.4﹪）全漢字斷詞人數143（61.1﹪）
每秒鐘平均閱讀音節數1.22 每秒鐘平均閱讀音節數2.3
全羅馬字人數53（22.6﹪）全羅馬字斷詞人數89（38.0﹪）
每秒鐘平均閱讀音節數0.85 每秒鐘平均閱讀音節數1.16
漢羅合用字人數93（39.7﹪）漢羅合用字斷詞人數134（57.3﹪）
每秒鐘平均閱讀音節數1.65 每秒鐘平均閱讀音節數2.04


Tùi表5.3.2.1a、b大約thang看出經過「斷詞」ê文章比「無斷詞」ê文章koh-khah容易理解，而且閱讀速度mā khah緊。以早用「漢字」書寫ê中文文章，一向m̄- bat有「斷詞」ê形式，必須靠讀者家己ê語文常識來做判斷，致使學生tī tú-chiah開始練習閱讀ê時，抵tio̍h真chē理解頂面ê困難。若是教科書kap兒童書刊ê編輯會tàng採用「斷詞」ê形式，相信對學童ê理解kap閱讀速度一定會有幫助。而且「斷詞」對目前全力推展電腦軟體ê「語音辨識」功能ê時，特別有幫助，尤其是台語tī口語表達ê時，會tòe語法意義ê無仝來做豐富ê語音變調，若無藉「斷詞」ê功能來切分各單位to̍h無法度順利完成「語音辨識」ê khang-khòe。「白話字」ê設計本來就是以「詞」做單位，tī多音節詞ê各音節中央用“–”連接，利便讀者ê理解kap台語連讀變調ê規律，hō͘咱真佩服設計者ê智慧。

Tùi「羅馬字」（包括斷詞、無斷詞）ê答題人數來看，咱看tio̍h社會上ê「羅馬字」普及率相當kē，看m̄-bat羅馬字自然mā會影響「漢羅合用字」ê辨讀能力。對一般欠缺「羅馬字」訓練ê人來講，靠淡薄仔對「英文」ê熟sāi，加減會tàng拼出「漢羅合用字」中ê「羅馬字」，而且chiah-ê「羅馬字」出現ê所在大部分是tī固定ê「虛詞」位置，真容易就看有，這也就是看m̄-bat「羅馬字」ê人來看「漢羅合用字」文章會tàng達到beh倚「全漢字」文章ê正確率kap閱讀速度ê原因。

另外，tùi表5.3.2.1b各種文字ê閱讀速度比較表來看，「漢字」ê閱讀速度若像比「羅馬字」khah緊，m̄-koh當阮一個一個檢查受訪者ê資料ê時，lóng總chhōe-tio̍h 28位受訪者（佔總人數11.97﹪）tī「羅馬字」ê閱讀速度上比「漢字」khah緊。Chiah-ê受訪者共同ê背景是：閱讀「全羅馬字」抑是「漢羅合用字」書面語ê頻率真koân，有13人是逐天閱讀，有10人是一星期閱讀2~3擺。可見閱讀「羅馬字」是會tàng透過訓練來增加速度--ê，大多數ê人kan-taⁿ有「漢字」ê閱讀經驗to̍h掠準「羅馬字」讀起來khah慢，這是錯誤ê觀念，mā是欠缺公平ê比較。除非整個ê教育制度kap社會資源提供台語「羅馬字」有親像華語「漢字」kāng款ê優勢條件，譬如：tùi學齡前開始學認字、小學開始讀寫；週圍有夠額ê出版品；社會有認同、肯定；成做法定ê文字；納入國家考試範圍……等等。若無，tī閱讀速度ê比較lóng bē-tàng算是客觀公正--ê。