《台灣另類牧師．醫師─謝緯》

 | | | 轉寄

10-04 長老教會重返WCC

作者 陳金興 2012.04.29

1970年國民黨政府koh-khah強烈要求長老教會退出WCC，並出言威脅：「Lín若m̄退出，後果會真嚴重。」對這種講法，教會內部意見無仝。長期白色恐怖之下，小khoá違背國民黨政策ê，輕者被捕落監，嚴重者被槍殺ê，滿滿是。

因此，針對WCC一案，反對者大部分m̄敢公開表明；偏向政府ê教會領袖，勢力真正大。1970年3月30日tī台南神學院召開台灣基督長老教會第17屆總會會議，beh koh改選議長。因為政府當局強力要求總會退出WCC，真chē議員（牧師kap代議長老）擔心會受tio̍h當局ê特別「照顧」，m̄敢去參加會議。何況，因為WCC chit-ê hō͘人真歹剃頭ê燙手山芋，koh-khah是無人敢擔任議長，所以hit-pái會議因為出席人數未達到法定要求，soah致使流會。

總會委員會真緊tō開會決定下回開會ê日期kap地點。為tio̍h chit-ê tāi-chì，謝緯tī當年3月31日ê日記頂面按呢寫：「總會成立以來，siōng bái、siōng見笑ê場面，真正遇tio̍h了」。他為tio̍h總會「流會」chit件代誌，一直自責，感慨萬千：「身為總會議長，真正感覺家己一定tio̍h負起責任。」這mā致使已經任滿議長一年teh-beh卸任ê謝緯，只好「續任」到仝年ê 7月底。

謝緯tī他有生之年，維護了長老教會ê主權kap尊嚴，mā用他堅定ê信仰立場，保tiâu總會tī WCC組織ê席位。但是，台灣基督長老教會總會無法度忍受政府ê壓力，tī謝緯過往了後，猶原被迫退出了WCC。謝緯ê日記只寫到1970年4月17日，所以，咱m̄知他遇難chìn前，是m̄是有來自當局 koh-khah大ê壓力，kan-ta知影tī下chi̍t回會議前無偌久ê 6月17日，謝緯就因為車禍來意外身亡。

總會議長謝緯過往了後，由副議長高俊明牧師暫代議長職務。仝年7月30日tī淡江中學召開總會年會兩工，由高俊明主持會議。依照議程，WCC ê討論，排tī khah後壁。高俊明原本準備到時呼籲：「Chit-ê tāi-chì屬tī信仰問題，咱是一個個宗教團體，bē-sái為tio̍h政治理由，受政治壓迫來退出WCC。」高俊明希望ē-tàng清楚表白chit-ê立場，m̄-koh是m̄是會被接納，高俊明並無把握。

會議開始了後，高俊明tú好有重要ê代誌，必須「離開議場」私下kap別人商量，所以拜託副議長劉華義牧師代替主持會議。當高俊明chi̍t-ē離開，隨時有人臨時提議，ài kā後面議程中ê「退出WCC案」，提前討論。提議通過，就隨時開始討論。當時偏國民黨ê議員叫大家舉手贊成退出，in極力表示目前教會ê處境已經非常危險，若無退出，後果將不堪設想。

Chit ê案就án-ne真緊通過。當高俊明tńg來到議場ê時，知影chit款情形，非常痛心，他講：「Hit時chūn，我感覺政府實在真gâu用一koá奇奇怪怪ê手段」。Tùi án-ne，1970年7月30日，台灣基督長老教會退出WCC。直到10年後 (1980) chiah重返 WCC。