《台灣另類牧師．醫師─謝緯》

 | | | 轉寄

10-02 謝緯被推選做第16屆總會議長

作者 陳金興 2012.04.15

1967年1月24日，謝緯tùi台中中會議長卸任，改任中會第37屆中委。過了一年，1968年2月11日長老教會召開總會，chit工beh改選議長kap副議長，謝緯ê名出現tī副議長ê候選名單中間。他為著bô-ài被選做副議長，所以thiau-kò͘-ì 無去參加會議，透早就到埔里去巡迴看診，當時他ê心內感覺真輕鬆自在。

但是，hit暗beh睏ê時，卻接tio̍h孫鴻沂牧師ê電報，告知謝緯已經當選總會第15屆副議長，ài他趕緊去就任。Chit時ê謝緯，心中pi̍k-pho̍k-thiàu，他想beh chhoē理由推辭chit項職務。因為若現在接落副議長ê工作，就下一屆他一定tio̍h擔任議長，若按呢，他就會koh-khah無閒，致使影響tio̍h他ê醫療宣教事工。因此，第二工他用書面ê方式，說明他bô-ài去就任ê理由kap決心，並委託南投教會林釙壽長老將批信帶去總會。

M̄-koh，hit工beh暗á，他ê大姐謝瓊、林釙壽長老、鍾子時牧師以及孫鴻沂牧師娘lóng khà電話hō͘ 謝緯，勸他應該顧到台中中會ê「面子」，tio̍h去就任總會副議長ê職務。隔工，謝緯去二林看診ê時chūn，koh接tio̍h孫鴻沂牧師ê電話，孫牧師一直拜託他去就任。經過kúi-nā pái ê推辭，結局ke̍h bē kòe眾人ê好意kap熱情，謝緯只好答應接落chit份職務。

Chit-ê時chūn，雖然已經妥協，但是他心中實在是無比ê滾絞：「我無歡喜做ê代誌，kah-ná一步一步teh踏入去，這m̄知是上帝ê旨意，抑是我家己ê軟chiáⁿ。我感覺beh講 “ No.” 真困難。」


● 第15屆總會議長黃加盛(右)、副議長謝緯(中)、書記高俊明(左)。

就tī謝緯ê副議長任期屆滿chìn前二禮拜，包括台中中會ê議長、總幹事以及真chē牧師就開始「勸進」他競選總會議長ê動作。但是，謝緯koh再詳細考慮了後，他感覺應該對上帝忠實chiah-tio̍h，因為家己無感覺有chit份負擔，他所想ê，是他ê醫療傳道使命，所以無想beh擔任下一屆議長。

Chit ê消息chi̍t-ē傳出來，包括中會議長、牧師，南投縣長林洋港lóng去拜訪謝緯。甚至，連國民黨中央黨部mā透過縣黨部主任秘書，來苦勸謝緯出任總會議長。1969年2月3日，謝緯雖然koh一pái「thiau-kò͘-ì」缺席總會會議，但是，他猶原被推選做台灣基督長老教會總會第16屆議長。Chit層事hō͘ 他躊躇真久，心中開始有真大ê爭戰，對牽手講：「In一直叫我去，beh按怎khah好？」楊瓊英對他講，既然去hō͘ 人選tâu，就應該去就任。所以，雖然m̄是出tī本身ê意願，謝緯為tio̍h beh hō͘ 代誌「khah圓滿khah好」，tùi án-ne，他路尾亦是去赴任總會議長─謝緯thang講是去hō͘ 人強sak出來ê。