《台灣另類牧師．醫師─謝緯》

 | | | 轉寄

序四： 推薦一本平凡ê好書

作者 陳金興 2011.06.05

Tú-á於四十年前（1970），咱失去一位受尊稱做「台灣史懷哲」ê謝緯牧師/醫師。伊為著實現基督ê真愛，不但做傳福音救人靈魂ê牧師，且(koh)用雙手醫治眾人肉體ê病痛，學基督ê謙卑屈低家己，甘願做一個「戇人」（gōng-lâng），無做收入飽tīⁿ人人所欣羨ê 開業醫師，反轉義務去為弱勢之山地原住民、為貧苦ê沿海居民、為臭到無人敢倚，連親人也無愛去插(chhap) ê烏腳病患者開刀來南北奔波，無顧家己身體ê勞苦。因為伊認為富裕ê物質生活會使人bē記得有貧苦ê人於身邊——伊講「做義工就是付學費來學習實行聖經ê教示」。最後甚至為著in犧牲性命來殉道、殉職，盡忠到死。

這本書ê作者陳金興老師，生長於南投，自細漢就受謝家關懷照顧，由(tùi)所聽所看，使伊ê心得著真大ê啟發，感受著謝緯牧師/醫師這位「偉大ê戇人」ê言行，確實是咱這些做後代者(ê)——尤其是「現代化醫師」所欠缺，所應該學習ê風範，就也學做「戇人」，無嫌艱難與辛苦向多方面收集有關資料，費心整理，用樸素淺顯通俗快明，無加裝飾(chng-thāⁿ) ê文筆，將謝緯ê「歷史」、心路歷程、奉獻生涯等等，緩緩仔(ûn-ûn-á)寫出來，忠實交代於大家面前，使你讀起來一定bē感覺無味，會使你一直看落去。相信會激勵你ê心志得著奮發，用謝緯做模樣，實踐無加附帶條件ê真愛，使咱這个地緊緊親像天。

順此，以本文紀念謝緯牧師/醫師蒙召歸天四十週年。



南投基督長老教會 名譽長老
林榮章
2010年5月