《台灣另類牧師．醫師─謝緯》

 | | | 轉寄

9-02 謝緯創辦二基病院

作者 2012.02.26

中中醫療團tī台中kap彰化沿海地區巡迴醫療3年了後，謝緯選定二林鎮來創設基督教病院，伊ê目的是為tio̍h：(1) 需要一个固定ê所在，提供hō͘ 巡迴醫療團所需要ê物件；(2) 沿海地區ê病症需要進一步ê研究kap治療。

二林鎮，tī彰化縣西南方，東接埤頭鄉，西連芳苑鄉，南鄰大城鄉，北以舊濁水溪為界，連接埔鹽、溪湖二鄉鎮。當初beh創辦病院ê時chūn，謝緯認為，只要ē-tàng服務病患，tī彰化沿海ê任何一個地點lóng ē-tàng，最後以鹿港kap二林兩个所在進行評估kap考慮。最後選擇二林ê原因有二項：第一，鹿港鎮離彰化市khah近，病人beh到彰化基督教病院就醫比較khah方便（約8公里）。二林離彰化市khah遠（約40公里），路途遙遠，交通又不便。同時，若tī二林設病院，iáu ē-tàng照顧tio̍h濁水溪沿岸ê埤頭、溪州，甚至雲林縣ê西螺、虎尾ê病人。第二，因為二林基督長老教會非常積極支持chit間病院ê興建。

定案了後，逐項籌備工作陸續展開，tāi先，二林教會以及附近ê竹塘、大城、芳苑等教會，共同捐地1000坪、病房一棟、工程費80萬元。看tio̍h chit種情形，謝緯ê信心大增。德國ê朋友Miss Else Schroeder kap「西德基督教婦女祈禱會」mā前後捐助新台幣共80萬元；台中中會所屬ê教會kap醫療團團員mā為建院經費奉獻。

經過醫療團ê籌設之下，1964年11月初3 tī當時人口數5萬6千goā人ê二林鎮成立「基督教沿海巡迴醫療病院」。謝緯tī中中醫療團ê時chūn，是醫生輪流一禮拜去巡迴義診一pái。但是，現在既然已經有定點ê病院，為tio̍h hō͘ 經營ē-tàng量早穩定發展，需要有全職ê醫生chiah ē-sái-tit。Tùi án-ne，謝緯就邀請年紀已經72歲ê丈人楊雲龍醫師，將伊ê醫師籍由台南市soá到彰化縣，來申請病院營業執照，並由他暫時擔任二林基督教病院院長；林庚申醫師擔任第一任董事長。




謝緯tī開幕hit工ê日記上，感謝祈禱講： 上帝ah！過去阮tùi信仰出發來組成ê醫療團，現在koh tùi信仰來起造這間病院，了後koh ài tùi信仰來經營這間病院，ǹg望祢來引chhoā，照顧這間病院……。












這是第一間由台灣人所獨力創辦ê教會病院，是台灣人ê驕傲，mā顯出台灣人ê尊嚴。院內醫生除了林庚申以外，iáu包括陳黃義平、蔡陽昆、陳曜煊、黃明輝、侯安息kap謝緯等。

治療小兒痲痺症mā是二林基督教病院ê工作重點，因此，tī該病院中mā附設「小兒麻痺診療中心」。創立之初，彰化基督教病院bat協助部份ê醫療工作。初期因為病房不足，toà院患者只好kap小兒麻痺ê病童，同齊借toà tī醫療團禮拜堂內面。為tio̍h按呢，病院加起二樓ê病房，thang容納三十五張病床。1967年起開始辦理彰化縣貧民診療，1968年承辦公保醫療業務。「台中中會醫療服務團」tī 1968年mā算完成了階段性ê醫療宣教使命。

為tio̍h推廣二林基督教病院院務，1969年到1971年間，台北馬偕紀念病院每禮拜週三到週六，派主治醫師級以上醫師一名前往二林協助，並代為訓練病院ê醫生。日後重整二基病院ê吳震春醫師，當時亦是前來協助ê其中一名。