《台灣另類牧師．醫師─謝緯》

 | | | 轉寄

8-02 烏腳病患ê福音

作者 陳金興 2012.01.08

王金河(左)kap謝緯仝年 (1916) 出世，1941年tùi東京醫學專門學校畢業，是謝緯ê學長。

但是，自學校畢業了後，就各奔前程，無koh聯絡。當in sûi-lâng tńg來到台灣將近20年了後，因為同齊幫贊烏腳病患chiah koh作伙。1944年，王金河tńg來到窮赤koh偏僻ê故鄉北門開設「金河診所」，伊是一ê基督徒醫生，mā是北門鄉當地唯一ê醫生。


1960年3月27日，日本神學大學教授法蘭克林博士 (Dr. Franklin) 由台南神學院吳振坤教授陪同，來到北門關心烏腳病患者。Hit工，王金河帶法蘭克林去看一位名叫王營ê患者，伊m̄-nā chheⁿ-mê，koh做過乞丐。當時伊kah一領破糊糊ê棉被，倒tī厝內臭giâ-giâ ê大廳裡。王金河掀開王營ê棉被，發現有幾nā百隻ê礐仔蟲(ha̍k-á-thâng蛆) tī伊hit支已經孵膿(pū-lâng) ê腳指頭kap小腿teh sô teh nǹg ，王營是痛到haiⁿ bē soah 。

親目看著chit-ê情景ê法蘭克林，離開王營ê khiā家就問王金河，對tī chit種症頭，政府是m̄是有甚麼機構teh照顧？北門嶼 教會本身對烏腳病患是m̄是有甚麼措施？王金河ìn伊講，當時政府有委託台灣大學teh做研究，台大病院提供六床免費病床來醫治烏腳病；講到北門嶼教會，因為是舊年9月chiah設立ê，iáu屬起步階段，所以對tī烏腳病患mā iáu boē開始關懷。法蘭克林聽完，吐chi̍t-ē氣，講：「台灣ê教會kah-ná iáu teh睏。若是主耶穌chit時來到台灣，伊一定會先來chia看顧、安慰chiah-ê烏腳病患ê。」

Tī實地了解狀況ê法蘭克林，tńg去了後tō隨時寫一份報告書，講述伊親目看tio̍h烏腳病患時ê心中感觸，以及伊對tī chit種怪病tī當地seⁿ-thoàⁿ 想欲處理ê建議，並將chit份文件分別寄hō͘伊認bat ê朋友kap各慈善機構，將chit ê消息傳播出去，來chhoē求奧援。

Tī台灣各地已經從事社會慈善事業真多年ê孫理蓮，知影了後，tī 4月初7隨時kap台灣大學醫學院教授董大成、張凱賢等人前往北門關心，這是王金河第一pái見tio̍h孫理蓮。王金河帶孫理蓮一陣人到烏腳病患ê厝內探訪，深入了解病患ê症狀以及生活狀況了後，孫理蓮對王金河講：「你是基督徒，mā是醫生，你認定有需要toà院治療ê烏腳病患，我lóng 欲收容，送in到大病院醫治、手術、裝義肢，等復建了後，koh再kā in送tńg來，一切lóng免費。」

王金河心內teh想，ná 有chiah-ni̍h好khang ê代誌？雖然伊有kā孫理蓮soeh-ló͘-la̍t，但伊並無kā chit件代誌khǹg tī心上。M̄-kú ，一禮拜後，真正照所講ê，孫理蓮將烏腳病患者王營、王品、洪水龍kap洪掌四人送往屏東基督教病院治療。

話講倒轉來，chit種當患者病情惡化需要toà院治療ê時，tio̍h ài往南送到屏東醫治，á是北送彰化基督教病院就診較適當實在tio̍h ài考慮，因為兩地m̄-nā路途攏真遙遠，患者koh可能會因為延誤就醫來喪命。因此，孫理蓮心中出現了欲按怎進一步幫助烏腳病患ê念頭，烏腳病患者ê醫治，總算顯露出一道希望ê曙光。