《台灣另類牧師．醫師─謝緯》

 | | | 轉寄

4-01 Tī東京ê親族兄弟情

作者 陳金興 2011.08.21

1938年1月，神學院iáu-boē畢業，謝緯就寫一封航空批hō͘ 當時teh東京讀日本齒科醫專ê台中一中室友陳柑菓。Tùi án-ne，陳柑菓照約束ê時間，前往車站接謝緯kap謝綸到伊稅厝ê所在。當時，只要捐款就ē-tàng m̄免考試入學，但是謝緯無想beh án-ne，伊beh遵照一般程序參加考試，因為伊深信上帝會帶領伊所beh行ê路，m̄管成功á 是失敗。

3月中到東京ê謝緯，對tī真久無接觸ê數學khah pháiⁿ 應付，所以決定beh補習一年chiah koh再參加考試。謝緯kap謝綸兩兄弟就先tī「東京城北預備學校」補習功課。隔轉年，謝緯順利考tiâu設tī新宿區ê「東京醫學專門學校」(今東京醫科大學)；謝綸因為細漢ê時聽力受損，依照規定bē-tàng報考醫專，也考入去「名古屋藥學專門學校」就讀。兩兄弟chū 按呢tī 無仝所在讀書(chheh)。


照咱所知，謝緯ê外公吳葛以多產出名(共十六位子女)，家族龐大(toā-bong)，後代子孫繁多(hoân-to)，到日本進修是吳家ê傳統。而且，chiah-ê gín-á無論先來後到，為tio̍h tī生活上ē-tàng互相照應，lóng會相招toà-tī仝一位或附近地區，這mā成做吳家後代ê 不成文規定。因此，謝緯tī日本ê時有真chē表兄弟姐妹mā tī hia求學，後來伊mā搬去kap 伊ê表兄弟作伙toà。

根據謝緯ê表小弟劉瑞騰醫師回憶(hoê-e̍k)講，當in tī東京讀書(chheh)ê時，前後大概搬五擺厝，就是渋谷、中野、代代木、大久保及下北澤等所在。Kap謝緯toà作伙ê，除了劉瑞騰以外，其他ê表兄弟iáu包括劉俊雄(劉瑞騰胞兄)、吳晨鐘、吳雅儀、汪煥文及楊東傑(楊瓊英胞弟)等人。謝緯延續謝家ê慣例，每工暗時聚集眾表兄弟舉行家庭禮拜，而且家己彈風琴，或獨唱或kap大家同齊吟唱聖詩。課餘(khò-î)，謝緯時常kap劉俊雄、汪煥文行圍棋。

因為iáu有真chē親戚beh tùi台灣來讀書，為tio̍h方便照顧三頓kap khiā起，楊瓊英ê老母特別tùi台南請一位婦仁人前來下北澤煮飯。Chit位婦仁人年歲約50歲，無結婚，koh吃素(chia̍h-chhài)，in lóng稱呼伊「葉官」(hio̍h koaⁿ)。Tú 到日本ê時，葉官ê日語m̄是真圝轉 (liàn-tńg)，mā無厝邊kap伊講台語，koh加上m̄-bat字，性地koh龜怪，hō͘ 伊tùi án-ne感覺真孤單。但是，謝緯對葉官真好，常常陪伊開講，所以葉官mā kā謝緯tòng-choè家己ê gín-á仝款看待。

謝緯到日本讀書ê時已經23歲，平平tī東京ê chiah-ê表兄弟中間，屬謝緯年紀siōng大，是這陣表兄弟中ê領導者、保護者。當chit幾個少年人作伙，有tâng-sî會吵架(oan-ke)、相罵(sio-mē)，伊tiāⁿ-tiāⁿ mā擔任和解者ê角色，時常用當年tī台南神學院，院長滿雄才ê話苦勸in講：「人kap人中間，tio̍h kap音樂仝款和諧(hô-hâi)，以和為貴。」謝緯每禮拜日tō 到東京台灣教會做禮拜，kap當時ê牧師郭馬西（1891-1966）熟識。