《台灣另類牧師．醫師─謝緯》

 | | | 轉寄

3-02 Tī 神學院 ê 生活點滴

作者 陳金興 2011.07.31

當時學校 ê 學生人數大約有四十名左右(註1)， 教授 mā 無 chē (註2)， 因此，老師 kap 學生做夥湊陣（tàu-tīn）攏真和睦。謝緯時常 tī 下課了後就到滿雄才牧師 ê 宿舍，研究音樂、練習鋼琴、小提琴， koh-khah 將才華伸長到作曲方面。伊 mā tī 每禮拜三暗時 kap 滿牧師娘學習聲樂。伊真愛聲樂，伊認為 tī 悲傷抑是孤單 ê 時,唱歌 ē-tàng hō͘ 情緒放輕鬆，得 tio̍h 內心 ê 清靜，慢慢仔 kā 世俗 ê 各種下賤現實 ê 一面 pàng bē-kì。 Tùi 文學 iau kú 思思念念 ê 伊，有 tang 時-á 會作詩、寫小說。 Tùi中學時期就養成每工運動慣勢 ê 謝緯， bat tī 長榮中學、長榮女中 kap 台南神學院聯合運動會比賽 ê 時，得 tio̍h 賽跑 (cháu-pio) 冠軍。




● 台南神學院音樂會




謝緯 ê 其他興趣 iáu 包括行圍棋 kap 看電影，有時 mā 會 sio-chio (呼朋引伴) 到台南東市場 ê「盛埸」(sakariba,さかりば)擔頭-á（tàⁿ-thâu-á），或是附近夜市-á 請同窗食魚丸湯、燒肉粽、擔 á 麵…等。謝緯積極、活潑 ê 個性，不時參加校內外各種聚會 kap 活動。

1937 年謝緯 tī 神學校四年級 ê 時， mā bat 擔任學生會會長。鍾子時牧師當年 tú 進入台南神學校讀書 ê 第一工， tī 校門口看 tio̍h 一位身穿黑色學生服，腳穿棕櫚 (soaⁿ-chang) 做 ê 木屐、頭毛蓬鬆 ê 青年，楊作舟 kā 伊講， hit-ê 就是 ùi 南投來 ê 謝緯， in 謝家是望族。

Chit 一年 ê 七月初三到初五，謝緯組隊去 peh 新高山(玉山)。 Kap 伊做夥去 ê 同伴有神學校教授黃主義牧師、學生蘇振聲、鍾子時，加上新樓病院 ê 醫師黃永昌、許寸金 kap 汪藥劑師等人。 In 順續去阿里山， koh 再循 (sûn) tio̍h 東埔、水里落山，來到南投大同病院，接受謝家款待、 tī hia 過暝， hit chi̍t 暗 in 一陣人 mā 參加謝家 ê 家庭禮拜。隔轉工，鍾子時 in beh 離開轉去 ê 時，謝緯問伊：「身軀是 m̄ 是 iáu 有錢？出門在外 bē-tàng 欠 (khiàm) 所費。」隨時 tùi 橐袋仔(lak-tē-á) 底 jîm 出銀票hō͘ 鍾子時。同年(siâng-nî)，伊 oan-ná 受邀請擔任賴炳炯牧師結婚時 ê 子婿伴(男儐相)。

............................................................................................................


(註1)
1931 年至 1938 年（謝緯畢業）同時在學 ê 前後期學生有 40 人。以入學年分計算，1931 年 13 名（劉華義、蘇天明、歐進安、羅約伯、陳光輝、許贊育、廖間淑、楊招鑑、蕭朝金、潘純榮、許乃萱、邱天登、翁西庚）；1932 年 4 名（何榮如、賴炳烔、廖三炮、許溢超）；1933 年 5 名（吳德元、林和引、鍾茂成、康嘉音、汪煥文）；1934 年 5 名（黃東識、謝緯、施錫圭、賴喜華）；1935 年 4 名（高約拿、楊作舟、金進安、李連登）；1936 年 5 名（姚正道、陳約翰、楊信得、許德謙、蘇振聲）；1937 年 4 名（周金耀、呂春長、鍾子時、戴明傳）。《台南神學院校友名錄》，2001 年 6月， 第 11 頁。

(註2)
除了雄滿才院長之外，iáu 有巴克禮牧師、武田公平牧師、高金聲牧師、楊士養牧師、黃俟命牧師、黃主義牧師等。