《台灣另類牧師．醫師─謝緯》

 | | | 轉寄

2-01謝緯ê青年時期

作者 陳金興 2011.07.10

謝緯雖然經過一場大病，但是並無影響伊 ê 求學過程。13 歲小學畢業 hit 年，伊 kap 大兄同齊考入去「台中州立台中第一中等學校」(台中一中)。彼時學校規定所有 ê 學生 lóng tio̍h toà 學寮，謝緯 kap 大兄 toà 仝一間寢室，另外一位高 in 一屆 ê 學長， koh 平平是故鄉南投 ê 朋友吳坤淵 toà tī in 對面。

1931 年 ê 時 ，in ê 小弟謝綸 mā 考入去台中一中， chit sî-chūn 包括經、緯、綸三 ê 兄弟同齊 tī 同一間學校度過快樂 ê 中學生活。每年四月是新學年 ê 開始， in lóng tio̍h 換寢室住， chit 種制度 thang hō͘ 學生之間增加 koh-khah 廣闊 ê 交誼。謝緯 tī 學校 ê 生活真規律，每工早起 8 點離開宿舍去上課，下課了後就到網球場 phah 網球一點鐘。運動了後，大約 4 點 goā 就直接轉去宿舍複習功課。

除了拜六或是禮拜日出外去買日常用品以外，平常時 tō 無 tī goā-kháu lōa-lōa-sô。謝緯 kap 大兄、小弟每禮拜日攏到台中柳原教會做禮拜，伊同時參加聖歌隊， koh tī 教會司琴，並擔任主日學教員。彼時柳原教會 ê 牧師是劉振芳。










●柳原教會

林川明 tī 1929 年到 1934 年擔任南投教會傳道師， tī 伊任期 ê 中間，伊有成立「教會青年會」（YMCA）(註)， 同時 koh 組織聖歌隊。謝緯 tī 中學 kap 讀神學院 ê 時期 mā 參加過南投教會 ê YMCA。










謝緯 kā教會當做家己 ê 厝仝款，除了參加定期聚會以外， koh 常常去教會參加靈修、讀書 kap 康樂等種種 ê 活動。林川明 tī 南投教會 ê 時， tú 當謝緯 ê 青年時期，兩人時常互談，交換意見，林川明 ē- sái 講是謝緯請益 ê 對象。

為 tio̍h 量早培養謝緯犧牲服務 ê 精神，林川明利用工作有 khàng-phāng ê 時， tō 帶 tio̍h 謝緯到山頂，去探訪散赤 ê 會友，藉這個機會訓練伊刻苦耐勞 ê 能力，以及培養關懷基層弱勢 ê 情懷。謝緯知影家己將來 oē 做牧師，所以伊常常 kap 林川明討論做牧師 ê 相關問題。 Chit 時，伊開始產生一種 kap 一般做牧師無仝 ê 想法，伊認為傳福音無應該 kan-ta tī 禮拜堂內底講道，是tio̍ h 進入社會，接觸 koh-khah chē ê 人群， mā 就是 beh hō͘ 教會 kap 社會相結合。因為 chit 種理念之產生，確立了伊「自由自在 ê 傳道方式」─ 自由傳道。



(註)
Tī 1932 年所創設 ê「台灣基督教青年會聯盟」，英文名為 “YMCA”。但是外國宣教師並無 kā 它稱做 “YMCA”，是用 “ Yo͘ng People's Society ” 替代，thang 直接翻譯做「青年會」抑是「青年社」，表示當時 ê 教會青年會並 m̄ 是國際性 ê「基督教青年會」( Yo͘ng Men's Christian Association，YMCA )組織，只是長老教會中 ê 青年團體，但是以「青年會(YMCA)」為名舉辦各種活動。為 tio̍h beh 整合全省教會青年，有 tī 1949 年 5 月 3 日正式成立了無分南北 ê 「台灣教會青年團契」（Tâi-ôan Kàu-hōe Chheng-liân Thoân-Khè 簡稱T.K.C.）總會。




●1945 年所成立 ê「台北市中華基督教青年會」是台灣 siōng 早 ê「基督教青年會」(YMCA)。