《赤崁樓ê情phoe》

 | | | 轉寄

Chhùi Kô͘kô͘ ê Chhunthiⁿ ——Suliām thâu chi̍t pún sichi̍p 《Niû’á Tāu ê Chhunthiⁿ》

作者 Koa Pek'êng 2021.06.13



Cha̍p-jī goe̍h sngléng thiⁿ
Chiamchiam ê hong
Siā lo̍h sihsih chùn
Mā siā nńg chho͘ióng ê kutba̍k
Pái‧ leh pái‧ leh chhê‧ leh chhê‧ leh
Tòe bē tio̍h lí
Kiông koh ū la̍t ê ūnkha

Siàuliām lí chhiò’iông ê jia̍ttō͘
Kiantēng ê koasiaⁿ

Chi̍t tiuⁿ o͘ló͘bo̍kchè ê
Lēnghû’á
Kankan’á chhiò ê bīnkheng
Khui chhùi
Kā goán ê bāng
Suh ta

Góa kiukiu un tī thihthang lāi
Àm’àm’á suliām lí ê miâ,
"Niû’á tāu ê chhunthiⁿ
Niû’á tāu ê……"
Jú liām jú nńg
Jú nńg jú po̍h

Jia̍t kún ê chhiò’iông kiatpeng
Kiantēng ê koasiaⁿ kian tēng

Thàu tiongtàu ê cha̍p-jī goe̍h thiⁿ
Nâ kah hoán o͘
Thiⁿténg bóe chi̍t tah hibî ê khangchhùi
Tiāmtiām sak lo̍h chi̍t lia̍p
Chhunthiⁿ
Chhùi kah iûⁿ kô͘kô͘

——2009 nî siá tī tē gō͘ pái kásek pok hôe kehtńgkang
Chù, tē it pún sichi̍p 《 Niû’á Tāu ê Chhunthiⁿ 》2007/8 chhutpán