《BONG報bong2選》

 | | | 轉寄

保惜台灣母語是咱ê基本人權 ──2007推展母語傑出貢獻tio̍h獎感言

作者 陳豐惠 2009.01.11

歡喜得tio̍h前輩ê推薦，koh-khah歡喜thang tī上有台灣主體意識ê杜部長任內接受教育部對個人投入推展台灣母語事工ê肯定。

Tiāⁿ有人問我講「是按怎beh行入台灣語文運動ê路？」、「專職做這途，kám有法度生活？」……無m̄-tio̍h，十五冬來確實經過chē-chē考驗，有chiâⁿ chē艱苦心ê代誌，長期tī收入無穩定ê狀態，有時mā會厭懶iah餒志；M̄-koh便若想起台灣母語傳承ê氣絲仔ná來ná弱ê危機，想起台灣語文運動前輩過去感心ê phah拚，想起中國千百粒飛彈相準台灣koh不時tī國際社會抵制咱台灣ê困境，保衛台灣kap顧守咱語言文化ê勇氣就走出來a！

人生在世beh追求甚麼？存在ê意義是甚麼？初代來台灣ê外國傳道師，可比：巴克禮、馬雅各、甘為霖、蘭大弼、馬偕牧師等等，對台灣ê教育、醫療kap語言文化ê行做有真大ê影響，in lóng是值得我學習ê對象；外國人to有án-ne ê疼心a，看tio̍h阿母台灣ê語言文化失落，我kám thang假影目暗臭耳？

Chē-chē人講：「語言若亡，文化就滅」，m̄-nā án-ne──「若無文字，語言早慢會斷種」；Che是我投入台灣母語語文運動ê基本點，台灣母語bē-sái kan-taⁿ停tī口語流傳ê層面，tiāⁿ-tio̍h ài推動讀kap寫ê事工，文字化ná普遍，會曉讀、寫ê人口ná chē，台灣母語chiah有真正ê活路。

今仔日khiā tī chia，其實反應出基層台灣人民對土地文化保護傳承ê意志。個人受tio̍h肯定，事實ài感謝chē-chē前輩kap有志；代先tio̍h感謝白話字啟蒙老師──我ê阿公陳水鏡kap高雄德生教會朱文泰長老，感謝我ê阿公阿媽、父母kap教會hō͘我細漢有自然學習台語ê環境，koh kā我養飼kap栽培。Mā ài感謝台北義光教會兄姊tī我tú到台北參與社會運動時期ê支援kap照顧，感謝【台文通訊】創辦人鄭良光信任我，hō͘我處理台灣總連絡ê khang-khòe，開始台語文事工ê第一步；感謝陳明仁、廖瑞銘、張復聚等老戰友，有恁做夥phah拚chiah會得催生李江却台語文教基金會；感謝基金會董事長林皙陽翁仔某對台語文運動ê奉獻，感謝基金會所有董事、同工kap【台文通訊】【台文BONG報】支持者長期sio thīn、sio kēng，感謝基金會主任朱素枝姊久年ê付出kap協助。

保惜台灣母語是咱ê基本人權，咱koh繼續拚落去，台灣母語總有一工會出頭天。