《BONG報bong2選》

 | | | 轉寄

土地公kap土地婆ê故事

作者 吳美臻 2008.12.14

今á日是土地公ê生日，小朋友，我相信恁一定有看過土地公。每一冬土地公過生日這工，大家lóng會去土地公廟拜拜。小朋友上愛去土地公廟前ê空地thit-thô 。所以咱會tàng講土地公雖然是小神，m̄-koh i soah kap咱上親，上得著大家ê疼thàng。

差不多所有ê土地公ê神像lóng 是大kho͘大kho͘ ê老阿公，有長長ê白嘴鬚，臉紅kì-kì，有笑bi-bi ê笑容，看起來使人感覺chiok親切ê，chiok想beh入去kā伊拜拜。

M̄-koh因為土地公是每一個所在保庇大家ê神明，所以各地ê土地公lóng有無仝款ê故事，chit-má我就kā恁講其中ê一個民間傳奇故事。

古早時chūn，有一個收帳官，叫做張福德，他非常愛護老百姓，若有人納錢納bē出--來，他就會h³伊欠，若是真正無法度納錢，伊就會the̍h錢出來替伊納，若是看tio̍h老百姓有困難，伊lóng會想chiok chē辦法去幫贊。每一工，伊lóng sì-kè teh替老百姓ê tāi-chì leh無閒。

尾--á，張福德死了後，新ê收帳官chiok pháiⁿ--ê，時常逼老百姓納錢，koh kā大家苦毒，大家lóng感覺chiok痛苦，有人tòng-bē-tiâu，就講：「若是張老爺koh 有tī--leh，m̄知影有jōa好。」大家chiok感恩過去張老爺照顧、疼惜老百姓ê日子，所以大家lóng想beh替伊起一間廟hō͘老百姓會tàng時常受到伊ê保庇kap照顧。In就tī 田園中chhōe一個風景chiok súi ê好所在，替張福德kap伊ê夫人起一間細細ê廟，尊稱伊「福德正神」，這就是土地公廟ê由來。

老百姓時常去「土地公廟」拜拜，求土地公保庇大家平安大賺錢，當in看著土地公ê神像時，就親像看著張福德在生ê時替老百姓服務ê情形仝款。
M̄-koh恁kám知影，是án-chóaⁿ taⁿ-á有土地公，無土地婆？原來土地公ta̍k工lóng笑bi-bi，chiok好笑神，土地婆chiok自私--ê，ta̍k工lóng chhiah-pê-pê。

有一工，一個穿破衫ê散赤人來土地公廟拜拜，伊講：「是án-chóaⁿ我lóng bē好額，beh食一頓飯mā食bē飽，求恁賜hō͘我一寡金銀財寶。」

土地公看伊chiok可憐--ê，想beh hō͘伊一寡金銀財寶，m̄-koh土地婆soah開嘴講：「Bē-sái，若每一個散赤人lóng求咱hō͘伊金銀財寶，án-ni咱ê財產lóng分了了，到時chūn，咱查某囝嫁翁就會連扛轎á lóng請不起，bē-sái，bē-sái！」
土地婆chhiah-pê-pê無愛hō͘土地公賜金銀財寶hō͘散赤人，土地公無法度只好對散赤人講：「你tńg--去，只要你認真phah拚做khang-khòe，我就會tī暗中保庇你得著財富，你免煩惱。」

Koh有一pái，有一對翁á某來拜拜，求土地公hō͘ in福氣，會tàng一世人lóng得著榮華富貴。」

土地婆馬上講：「Bē-sái，若每一個人lóng來求咱hō͘ in福氣，án-ni咱家己就lóng無chhun--落-來ê福氣á，bē-sái，bē-sái！」

土地婆chhiah-pê-pê，無愛對每一個人好，土地公無法度只好對hit對翁á某講：「恁tńg--去，只要恁誠心做善事，我就會tī暗中保庇恁得著應該得--著ê福氣。」從今以後，大家lóng知影土地公ê仁慈kap土地婆ê自私，所以lóng去土地公廟拜拜，拜土地公，無人beh拜土地婆。

小朋友，妳若是有看著風景chiok súi ê田園有土地公廟，會記--leh，停落來拜拜，求伊保庇hō͘你gâu讀書，無的確，小小ê土地公會開嘴kā你講：「只要你認真讀書，我就會tī暗中保庇你變成上有路用ê人」。