《BONG報bong2選》

 | | | 轉寄

Siá hō͘ lāu-su ê phoe

作者 蔡氏清水 2008.02.10

Lāu-su, lí hó !

Chiok-kú bô kā Lāu-su chhéng-an, chin pháiⁿ-sè! Lāu-su iáu-sī khah bô-êng, koh sî-siông ū bûn-chiuⁿ teh tâu-kó?

Tāi-seng, chin kám-siā Lāu-su tùi goán Mah-mah ê koan-sim, tān-sī Lāu-su kám chai-iáⁿ? Tng góa tńg-khì Oa̍t-lâm ê lō͘-téng, goán Mah-mah... í-keng... óng-seng! Thiaⁿ-tio̍h chit-ê siau-sit ê sî-chūn, góa kui sin-khu lóng gōng khì, ba̍k-sái it-ti̍t lâu, góa chin kiaⁿ-hiâⁿ, góa ê sim-chōng chi̍t-chūn, chi̍t-chūn thiàu siuⁿ kín, ná-chún ū lâng ēng chhiú chiok tōa-la̍t--ê teh chūn hō͘ ta, chiok thiàⁿ, chiok thiàⁿ !

Kàu chit-má, í-keng kúi-nā-kò-goe̍h lah, tān-sī góa iáu-sī bô hoat-tō͘ siong-sìn che sī sū-si̍t, nah-ē án-ne? Góa it-ti̍t chin chū-chek, jú siūⁿ jú siong-sim, jú m̄-kam. Tī ka-têng lāi-té, góa sī siāng tōa-hàn, koh kè chiok hn̄g, chiok hn̄g ê só͘-chāi, Mah-mah phòa-pīⁿ ê sî, bô hoat-tō͘ chiàu-kò͘, chi̍t-tiám iú-hàu lóng bô, góa chin-chiàⁿ chiok put-hàu ê cha-bó͘-kiáⁿ. Goán Mah-mah ê lī-khui, tùi góa choân-ke, te̍k-pia̍t sī góa ka-kī lâi kóng sī chi̍t-hāng ke̍k-tōa ê táⁿ-kek kap sún-sit, mā-sī éng-oán ê thiàⁿ. Góa chin hi-bāng che kan-na sī “ ok-bāng” ! ! !

Kòe lâi Tâi-oân chit-tōaⁿ sî-kan, góa ê seng-oa̍h chin ut-chut, chi̍t-bīn, góa ài lâu tī Oa̍t-lâm pôe-phōaⁿ góa ê Pa-pa, góa ê sió-mōe, lâu tī koh ū góa chhin-ài ê Má-mah hêng-iáⁿ ê kí-liām ê só͘-chāi; chi̍t-bīn góa su-iàu kóaⁿ-kín tńg lâi chia pôe-phōaⁿ góa ê sian-siⁿ hām gín-á, tī chia ū góa ê “ chiong-lâi”. Chit nn̄g ê só͘-chāi, nn̄g ê ka-têng, tùi góa lâi kóng, lóng chin tiōng-iàu, góa lóng ài-hō͘ kap tin-kùi .Ka-kī ê sian-siⁿ, chhin-chiâⁿ, pêng-iú...lóng an-ùi góa:M̄-thang kòe-thâu siong-sim, ài bīn-tùi jîn-seng só͘ kóng ê “seng. lī. sí. pia̍t.” ê sū-si̍t, góa chiah-ni̍h siong-sim tō pháiⁿ seng-thé, goán Mah-mah “chāi thian chi lêng” nā chai-iáⁿ, i ē m̄-kam... ...Che góa lóng ū thiaⁿ tio̍h, lóng bat chiah-ê tō-lí, tān-sī góa iáu-sī chiok pi-ai. Chit-má, tī chia nā khòaⁿ-tio̍h siáⁿ-mih só͘-chāi ū pān song-sū, góa tō siūⁿ-tio̍h ka-kī ê ka-têng tú tio̍h ê pi-ai, góa koh ē lâu ba̍k-sái, koh kan-khó͘. Góa mā kám-kak chin pháiⁿ-sè, in-ùi, kā Lāu-su kóng chit-ê tāi-chì hō͘ lí siū-tio̍h ka-kī ê bó-chhin ( Iah-sī, Lāu-su sī cha-po͘ ê, pí góa lú-sèng khah kian-kiông, khah khòaⁿ ē khui ? ). Che mā-sī chiok kú góa bô kap Lāu-su liân-lo̍k ê goân-in!

Góa iáu-bōe ū hoat-tō͘ hui-ho̍k í-chêng ê seng-oa̍h, iû-kî sī ha̍k-si̍p. Góa chit-má Tâi-gí ê têng-tō͘, koh bô pān-hoat chiong sim-lāi ê ōe, oân-choân kóng hō͘ Lāu-su thiaⁿ, tān-sī, góa chin-chiàⁿ chiok siong-sim...

Chòe-āu, kèng-chiok Lāu-su sin-thé kiān-khong, bān-sū jû-ì .

Ha̍k-seng Chhòa sī Chheng-chúi Kèng-siōng

(作者是越南人)