《BONG報bong2選》

 | | | 轉寄

「忘年會」kap「尾牙」是m̄是仝款？

作者 清水信一 2008.01.20

日本kap臺灣lóng有慶祝新年ê慣勢，所以這兩個國家ê人lóng歡喜迎接新年。雖然日本kap臺灣m̄是仝款ê國家，m̄-koh國民lóng有期待新年ê心情，所以無論是過年前 iah是過年後ê時chūn lóng有真chē差不多仝款ê活動。

日本用新曆過節日，所以一月初一是日本ê新年。因為有「忘年會(Bounenkai)」，每年一下到十二月，上班族ê生活就變真無閒。「忘年會」是一種宴會，辦這種宴會ê宗旨是「『忘掉』這一年ê辛苦煩惱 kap 用快樂ê心情迎接新ê一年」。

聽著這個話ê時chūn，真chē臺灣人是m̄是感覺日本ê「忘年會」 kap 臺灣ê「尾牙」差不多仝款ê慣勢？ Tio̍h！「忘年會」kap「尾牙」lóng是一種宴會，辦這種宴會ê宗旨也是差不多仝款ê。

臺灣ê「尾牙」是tī 農曆過年前辦ê，tī仝一間公司上班ê人家tàu-tīn參加這個宴會，互相感謝同事ê幫忙iah是安慰這一年ê勞苦。聽到這階段ê時chūn，大部分ê日本人是m̄是感覺「忘年會」kap「尾牙」親像是仝款ê tāi-chì？M̄-tio̍h！看起來，日本ê「忘年會」 kap 臺灣ê「尾牙」無jōa大ê差別，m̄-koh這兩個國家ê過年活動有khah大ê差別，就是主辦ê辦法 kap 參加人ê感覺lóng無仝款。

因為臺灣ê「尾牙」是公司ê頭家主辦ê,所以頭家lóng付所有ê費用，參加ê人無需要出錢。M̄-koh日本ê「忘年會」是基本上參加ê人互相舉辦ê，所以大家分擔「忘年會」ê費用。

臺灣ê「尾牙」是一年只有舉辦一kái ê，m̄-koh日本ê「忘年會」無一定只辦一回，有ê公司辦真chē回。比如全公司辦一回、公司內底ê每個部門辦一回、仝款ê年度進公司ê人做夥辦一回、 kap有關係ê公司做夥辦一回等等。

對臺灣人來講，「尾牙」是非常期待ê活動，是無？ M̄-koh，對日本人來講，「忘年會」無一定是歡迎ê活動。因為參加宴會ê人lóng需要lim酒，特別是參加公司ê活動就無法度拒絕lim酒，所以無歡喜lim酒ê人感覺年尾是非常辛苦ê時chūn。


(作者是日本人，台灣大學語文中心學生)