《台灣之愛：盧俊義牧會筆記》

| | | 轉寄

講福音看傳道者kap教會

作者 盧俊義 2007.04.22

　　「牧師，你只要kā咱家己ê教會chhòa好，就好lah。外面ê tāi-chì mài插siuⁿ-chē。」

　　「牧師，禮拜日講道，mài講hiah-ni̍h chē聖經ê故事，ke講kóa有趣味ê故事，ta̍k家khah bōe tuh-ku，mā khah 記ē tiâu。」

　　「牧師，會友禮拜日ē-tàng來禮拜已經bē-bái lah，mài一直ài in來參加查經班、祈禱會lah。」

　　「牧師，只要kā長執抓hō͘ tiāu，牧會就真容易lah。chit-má牧師續聘，iā m̄免開信徒大會，tio̍h m̄ tio̍h？」

　　類似以上hit款ê話，tùi我tī神學院到教會去實習ê時，就一再tī長執、信徒之間聽tio̍h人án-ne傳講。

　　一九七四年出來牧會了後，除了tī台東關山教會真少聽tio̍h之外，tùi嘉義西門到chit-má咱台北東門教會，我lóng一再聽tio̍h，而且不時聽tio̍h。

　　我清楚知影，傳道者若是tī總會、中會ê事務siuⁿ-chē，想beh認真牧養教會就真困難。所以，當我擔任東部中會議長、傳道部長ê時，教會ê牧養事工差不多就停落來。因為除了固定開中委會以外，iáu-beh開北大執委會、總會ê總委會，以及負責hō͘總會銓衡擔當ê khang-khōe；另外，中會內各部門ê協調事工，以及一kóa教會、機構發生ê問題mā需要幫忙處理。有時chun差不多是每一ê禮拜lóng tio̍h-ài出外開會、處理教會事務等等，tī hit段時間，東部交通相當無方便，出去一chōa，一工ê時間就án-ne白白過去，特別是去處理其他教會所發生ê長執kap傳道者之間ê糾紛ê時，kan-ta會感覺真pháiⁿ處理、困惱有chhun，見證不足。有ê中會雖然設有專用事務所，有ê中會甚至有專任幹事teh辦理中會事務，但是做議長iáu是每一ê禮拜lóng tio̍h設法去巡視一chōa，聽事務所同工處理tāi-chì ê頭kap尾。

　　這就是我一再強調傳道者應該退出總會、中會所附設ê教育、醫療機構，或者其他事工機構ê原因，因為chiah-ê機構lóng有所謂「校牧」、「院牧」部門，聘有專任傳道者，有關信仰ê tāi-chì，就交hō͘ in處理應該bōe bái，án-ne，chiah-ê專任牧者mā thang直接擔起責任，tī工作ê認知上mā khah有擔當。蘭大衛醫師父子掌管彰基ê時代，當時ê院牧部主任，是ē-táng直接參與董事會ê決策，tī院內受tio̍h極大ê尊崇，地位無輸院長，án-ne ê院牧，對院方執行ê事務，所講ê話真有份量。但是後來ê院長，雖然mā是出自牧家ê gín-á，卻m̄是án-ne想，in tī觀念上一直認為病院ê牧師，lóng是醫生teh「飼」in，心態上一直是認為傳道者tī醫院是「bē曉生卵ê雞」，tùi án-ne，院牧tī hit ê院長ê時代，連出聲lóng m̄敢，甚至iáu tio̍h tòe院長ê理念行。我負責公報ê時代，為tio̍h beh了解為siáⁿ-mi̍h彰基hō͘衛生署評鑑降級ê tāi-chì，親自去採訪hit位院長，伊就用真自高ê態度回應我講：「lín傳道者tī病院只是浪費者！」我當時一聽確實是gông-gia̍h loh。過幾分鐘chiah醒悟過來。我直接tńg去公報社，伊驚我將對話ê情形照實寫出來，就koh khà電話來kā我講情，開嘴就是「俊義哥ah」，hō͘我感覺kui身軀lóng起雞母皮，真無爽快。Tī hit位院長ê時代，iáu bat計畫禮拜日lóng tio̍h繼續門診，我聽tio̍h chit-ê消息了後，第一ê反應就是直接向伊做牧師ê老父報告。伊聽tio̍h了後，氣kah差不多抓狂。後來，我就聽tio̍h講取消chi̍t ê計畫。其中一ê原因是院牧部kap院內有真chē tī家己教會有擔任長執ê醫務人員，起真大反彈。

　　傳道者有專業教育、醫療背景ê無chē，差不多ē-sái講是鳳毛麟爪（hōng-mo͘-lîn-kak）。但是tī信徒當中有真chē chit種ê專業者，應該hō͘ in去做董、理監事chiah-tio̍h。án-ne，in mā-thang透過信仰告白，料理教會chiah-ê機構ê事務，koh配合機構當中ê專任傳道者，應該就ē-tàng loh。Thián開早期咱長老教會ê醫療院所歷史，就是生做án-ne。Kap今á日tī chiah-ê機構當中，有真chē傳道者擔任董、理監事，確實真無仝款。

　　做一ê長執，應該是鼓勵傳道者行到教會外面去接觸無仝ê對象，chiah有機會傳福音hō͘ koh-khah chē人聽，m̄是一直要求傳道者kan-ta顧家己ê教會，chit款ê觀念kap心態並無正確。比如講，我tī嘉義西門ê時代，有一位長老tī學校教冊，伊就kā伊仝款tī教育界食頭路ê朋友講，thang邀請我去學校kap學生演講。了後，學校koh安排我kap全校老師演講，續落來，嘉義市、縣ê學校老師就互相紹介起來，就án-ne，一間一間學校來邀請我，lóng無停，到落尾有兩間學校kui-khì邀請我去做類似「專任」ê老師，包括有嘉義國中kap玉山國中，每一ê禮拜lóng有固定時間去為學生上課，mā開放hō͘老師聽。雖然教會ê少年團契人數並無因為án-ne增加，但是這至少是一種傳福音ê機會，長執並無反對，而且是鼓勵有chhun。

　　我一直認為教會是一ê學習聖經話語、教育信徒ê所在，若是傳福音應該是往教會外面去傳chiah-tio̍h。所以講，到教會來聚會，無學習聖經ê話語，án-ne是beh學習siaⁿ-mi̍h neh？咱ê東門學苑當初開辦ê時，就是執守chit-ê理念，希望用聖經作基礎，配合tio̍h歷史、文化，hō͘聖經ê信息ē-tàng kap chit塊土地ê人文密切結連作伙。當初，咱有一ê共識：只要是外面就ē-tàng學習tio̍h ê，比如講各種才藝，lóng bōe出現tī東門學苑ê課程當中。會án-ne設計，當然kap咱教會ê環境有關係。Ná親像我tī台東關山牧會ê時，會設計「社區衛生健康教育」ê活動，原因就是當地ê醫療資源真欠缺，教會開辦chit種ê事工，對當地社區ê人民、學校lóng是一項真重要ê服務。這就是為怎樣後來有真chē社區ê人會向教會奉獻ê原因。

　　Tī關山，我開辦托兒所，tī嘉義西門我bat試過透過舉辦「老人營」ê活動，計畫開辦「托老所」，可惜後來無成功。現此時，我就開始teh構思怎樣tī教育館起造完成、啟用了後，推動兒童「安親」活動ê事工。chiah-ê事工lóng是kap咱教會目前ê環境有密切關係。

　　若是一ê傳道者tī主日講道，無講聖經，kan-ta ē曉講真chē「有趣味」ê故事，我真正m̄知hit種教會，伊存在ê意義到底是siaⁿ-mi̍h？來教會無講聖經，án-ne，iáu有siaⁿ-mi̍h比聖經koh khah重要？講聖經，就算真無聊也tio̍h講，就算講ā，會友有真chē人tuh-ku，mā是beh講，而且是beh繼續講。聖經ê話本來就真oh聽，想beh聽ê mā無chē，但是這卻是教會存在siōng基本ê要件ah！傳道者beh án-chiáⁿ將聖經中ê信息傳達出去，這是一項需要好好學習ê功課，但chit份心志若是無堅持hō͘ tiâu，就是têng-tâⁿ。

　　我真注意tī結婚kap告別禮拜ê時，傳道者án-chóaⁿ傳達聖經信息ê chit件tāi-chì。每pái看tio̍h傳道者選用聖經經節，講道ê內容soah kap聖經ê教示lóng無關係，我就ē真艱苦。因為he是真無應該ê tāi-chì，he已經無算是講道loh。無論是婚事á是喪事，lóng是禮拜，禮拜就是beh傳講聖經ê信息，chit點是siōng基本ê。何況tī chit兩種場合，非基督徒參加ê比率相當高，koh-khah應該好好把握機會，將聖經ê教示傳達出來。

　　怎樣kā聖經ê信息正確傳達出來，這是傳道者真重要ê功課，但是要求傳道者tī主日禮拜中mài講siuⁿ-chē聖經ê教示，ái ke講「有趣味」ê故事，he絕對m̄是正確ê態度。若是chit種ê要求是tùi長執ê嘴講出來，án-ne就koh-khah離譜loh。

　　仝款ê，一間教會ê長執，若是一再希望傳道者到伊ê厝去lim茶、開講，續來，希望傳道者tī討論教會事工，或者是有重要議案要討論chìn前，ē-tàng先去kap伊「溝通」，chit種ê長執除了加速傳道者獻身使命感ê墮落之外，對栽培傳道者kap教會ê未來一點á幫助mā無。因為有chit種心態ê長老、執事，無形中是teh塑造傳道者一ê têng-tâⁿ ê認ba̍t：chit間教會就是聽chit種長執ê。

　　傳道者獻身是為tio̍h傳道，m̄是為tio̍h beh討好長執，卻是為tio̍h beh傳講聖經ê信息，引chhōa koh-khah chē人來認ba̍t耶穌，並且信耶穌就是生命ê救主。我真感念使徒保羅ê chit段話：

　　「實際上，上主信任阮，將福音託重阮，所以阮就照上主ài阮講ê來講。阮無想boeh買人ê歡心，就是boeh hō͘考驗阮ê心ê上主滿意。因為lín知影阮m̄-bat對lín用phô͘-tháⁿ ê話，也m̄-bat用花言巧語來掩蓋貪心──這上主ē-tàng kā阮做證！阮無論對lín á是對別人，lóng m̄-bat對人求名譽。」（帖撒路尼迦前書二：4—6）

　　我一再用chit段話來提醒家己，並且堅持chit種ê理念：傳道者ài有骨氣。一ê傳道者若無戀棧ê心思，就bōe受限制tī一kóa kan-ta注重人際關係ê長執、信徒。傳道者m̄-nā需要有堅定ê獻身使命感，對傳福音mā需要有清楚ê異象，chit兩項缺一不可，chit句話mā是我tī今年正月初八tī台灣神學院為學生上課所講ê。

盧俊義牧師的個人網站。