《台灣之愛：盧俊義牧會筆記》

| | | 轉寄

無見笑感ê人

作者 盧俊義...台語翻譯: Chuniok 2005.08.28

這是幾年前發生tī農村小鎮菜市場外路邊菜販一角ê情景︰ 一位打扮了真體面ê婦女，透早六點gōa搭計程車到菜市場買菜。計程車停靠tī路邊teh等待，chit位婦女行到路邊菜攤去要買菜，賣菜村婦一看就明白這是外地來ê，因為bē有當地人透早穿kah chiah-nih入時ê模樣來市場。Tùi án-ne，關心ê話語隨口而出問講︰「咱tùi toh位來？」

婦人回答講︰「tùi台北。」 菜販︰「來探監mah？判jōa久ah？」 婦人︰「六年lah。」 菜販︰「ai-oh，真可憐oh，怎樣會判chiah-nih重？可憐oh。」

菜販婦人一聽tio̍h是「六年」，就以非常同情ê語調，一再「可憐oh」傳達伊hit-ê同情不已ê慰問。 婦人︰「bē lah，會和lah，一世人也thàn bē-tio̍h chiah-nih chē錢，算會和lah﹗」

菜販一聽，面色頓時一沉，原本和善ê語句開始變調，本來坐tī小椅條頂，隨時khiā起來，行到另一位菜販姊妹邊，用斜斜ê眼角看hit位打扮入時tùi台北遠遠來此地買菜、準備帶tńg去外役監獄附設ê懇親宿舍，為入獄服刑ê丈夫加菜ê時髦婦女，一面附tī hit位菜販姊妹耳邊講話，附近幾個菜販也過來交頭接耳嘀咕幾句。無人chhap chit位打扮入時ê婦女，á伊一看幾nā位菜販圍teh同齊講話，lóng無人過來kā伊招呼，koh看tio̍h有人用斜斜ê眼光看伊，就心內有數離開路邊攤販區，行入菜市場內去。

刑法判六年，其實，只要tī監獄中無犯甚麼大差錯，大概關leh三年半或是四年就ē-tàng假釋出獄。在chit-ê看起來受過高等教育ê入時婦女來講，也可能對伊kap先生來講，是án-ne想ê︰用chiah-nih短ê時間，ē-tàng大báu一大筆錢財，為甚麼boài neh？又有甚麼「不合算」ê neh？當然「算會和」，而且是非常「算會和lah」﹗

賣菜ê村婦無受過高等教育，但in知影努力做工耕種，即使非常辛苦，特別是tī chit-ê重科技、輕農業ê時代，beh靠賣菜來維持家計都真困難，尤其是tī chit種寒風刺骨ê冬天裡，iáu-beh tī天色未光chìn前就tio̍h起床，趕緊到菜圃摘菜、洗菜，裝起lih竹籃á用腳踏車載到菜市場路邊去佔一個好位á販賣。每pái落雨天來臨，in iáu-kú án-ne，絕對無缺席。無時間想tio̍h iáu-teh睏眠中ê gín-á棉被是m̄是有kah好勢，也無心神去看gín-á是m̄是起床吃過早餐去學校，或有穿夠額ê衫褲thang溫暖身體，in第一個想tio̍h ê，就是趕緊將菜賣完，加thàn kóa零用ê，好khah早tńg去厝裡，雖然物質生活是khah嫌匱乏kóa，卻ē-tàng活得有尊嚴，án-ne就夠loh﹗因為這畢竟是靠家己辛苦努力所得tio̍h ê，卻m̄是偷the̍h、貪污、欺騙奪取不該得tio̍h ê。

但chit位tui3xx來大都會、外表看起來高貴ê婦女，先生原本有高階職位chiah有機會貪污chit一大筆不義之財，否則小小低階公務人員是摸bē-tio̍h甚麼大錢ê。á beh有高階職位，m̄-nā ài有多層考試過關取得學歷文憑，也需要有過一段職場經歷，有時甚至iáu需要後台靠山提拔成為親信，chiah會有機會爬(peh)上重要職務，並掌握批示核准重要案件ê職責，來方便污錢圖利家己，收贓取款。

可惜ê是，一個人受過ê教育jú高，卻無顧是非曲直，而且將一個人最基本ê見笑感lóng hông閹去，貪到án-ne ê心境，這chiah是敗壞社會秩序ê主要因素，chit種人有一天iáu是會自食惡果ê，而且會遺禍到下一代子孫。使徒保羅講︰「因為貪財是萬惡ê根源；有人siàu想錢財過頭，soah受迷惑來離開信仰，靈魂來歷盡千辛萬苦。」（紅皮聖經提摩太前書六︰10）Chit句話確實是真可信ê。（華文原載於自由時報2003年12月28日第15頁）

盧俊義牧師的個人網站。