《台灣之愛：盧俊義牧會筆記》

| | | 轉寄

齊來推動「少一道菜、加一份愛」活動

作者 盧俊義 2006.04.30

伊朗tī本月廿六日清早發生芮氏六點三強烈地震，造成死亡人數保守估計將超過四萬人，傷者koh-khah是無法度估計。國際社會救援ê工作已經展開，chit項救助ê工作，連kap伊朗有敵對狀態、而且本身也chiah發生震災甚重無久ê土耳其國也派救難隊伍前往協助，ē-tàng想像會tio̍h今á日ê世界已經無koh是只顧自身國家利益而已，當見tio̍h敵方天災突發時，也會想tio̍h先kā in救助，因為chit種ê做法tú好ē-tàng舒緩雙方緊張ê氣氛，並且iáu ē-tàng因此得tio̍h修好ê機會。咱國家kap伊朗並無正式邦交，甚至tī一九八○年何梅尼教長取得政權了後，兩國之間ê外交關係就一直處tī真低潮ê狀態下，如今也回應伊朗政府對國際社會ê呼求kā in救助災難，咱政府已經派遣一支救援單位前往參與救難ê工作，這是真值得欣慰ê一件事。

但我認為án-ne iáu無夠，咱全國人民應該有koh-khah積極ê動作參與國際社會救難工作，這m̄-nā是最基本ê人道行為，也是身為國際社會一份子應該有ê認識kap良知。

元月廿二日是農曆新正年頭初一，元月廿一日就是除夕，依照咱台灣社會ê習俗，hit工是全家大小團聚ê日子，當日暗時lóng會食頓佳餚準備過一個快樂ê年，而且眾長輩lóng會準備紅包為子孫teh年。

為tio̍h食chit頓除夕ê過年飯，早tī一個月chìn前，就有真chē超商、便利商店，甚至大飯店lóng已經推出「送佳餚到府上」ê菜單，有kóa大飯店tùi除夕到年節初三、四，餐桌而且早就hông訂滿，有kóa khah高級ê飯店á而且tùi除夕到初五，無論是午餐、晚餐lóng連續滿場，等等chiah-ê lóng teh講明咱社會tī物質生活上確實到了富裕á而且「滿溢」ê狀態。因此，如果咱ē-tàng利用chit-ê機會來響應聯合國呼籲世界各國hō͘ in伊朗人道ê救助，咱全國人民來進行除夕夜kap過年期間，齊來推動「少一項菜、加一份愛」ê活動，hō͘伊朗chit-ê tú-teh苦難中ê國家，hō͘ in ê人民也能因此感受tio̍h咱台灣人民溫暖ê愛，he將是一件非常有意義ê事。

另一方面，咱也ē-tàng利用chit-ê機會教導咱ê gín-á，將長輩所hō͘ in ê teh年錢the̍h出一點點a2a2做為賑災之用，án-ne m̄-nā會hō͘ in學習tio̍h關懷苦難者ê需要，也會tùi chia學習tio̍h「愛人如己」ê生命教育之意義，這是非常有意義ê一件事。我想起德蕾莎修女出名ê一句話︰「伸出你ê手，做你ê手所能做ê事。」咱減食一項菜，對全家ê聚餐ē有任何損失，反卻是有益健康；tùi teh年錢中捐出一點點á零用錢，也bē影響到子孫過年ê氣氛，顛倒會hō͘ in心靈koh-khah豐富，這實在是咱「少開嘴」、「伸出手」就做會得到、也是最簡單ê事ah﹗

一個人無論jōa-nih-á富有，如果欠缺對苦難者一份同情心，chit種物質上ê富有，相對ê就是心靈上ê sàn-chhiah。Á如果一個人tī物質生活上雖然sàn-chhiah，卻對人類社會ê苦難有豐富ê同情心，chit-ê人ê心靈一定真豐富。

有愛，就是偉大。真實ê愛，並無大或小之分，也無貴kap賤之別。因為上帝並m̄是看奉獻數字ê chē少，卻是看人ê內心是m̄是甘願。有愛ê所在，就會有上帝ê祝福，這祝福m̄-nā會臨到咱所關心濟助ê對象身上，也會hō͘咱因此受惠，因為上帝就是愛ê上帝。

真期待大家會來參與chit件有意義ê善事，我深信當你kā gín-á或孫子講，今年少食一項菜ê原因，是為tio̍h beh濟助tú-teh苦難中ê伊朗人民時，我相信in一定會接受；á當你tī教導你ê kiáⁿ孫怎樣將teh年錢捐出一點點á來做賑災之用時，我相信in必定也會樂意來有所行動kap回應。Koh-khah重要ê，你tī kiáⁿ孫ê心目中，將因chit種ê教導來 hō͘你得tio̍h koh-khah chē ê敬重，因為tī你心中有豐富ê愛。
（原載tī自由時報2004年1月4日第15頁）

盧俊義牧師的個人網站。