《台文通讯精选》

 | | | 转寄

文旦柚芳

作者 张秀满 2006.12.31

三月转去台湾，郑雅怡老师邀请陈雷先生kap我去真理大学kap台语系ê学生座谈。我虽然答应，心内想麻豆ê真理大学是beh按怎去？真tú好，tī成功大学ê海内外台文工作座谈会，tú着真理大学ê校牧也是台语系ê系主任黄辉爵牧师，伊讲你坐电车来『隆田』，我来车头接你。

去台南车头买车票，发现这个我熟sāi ê火车头，已经加真现代化，买车票mā无需要排列，kap台北ê捷运仝款，钱lok入去，票tō家己走出来。电车？原来tō是古早ê普通车。

电车经过『大桥』、『永康』、『新市』、『善化』、『拔林』，一站过一站，我ê记池mā一层过一层。读高中ê时，通学生in ta̍k日tō是坐这款ê普通车，tùi无仝ê所在赶来台南读册。Hit阵真欣羡in m̄免参加升降旗，有时mā听in讲一kóa车顶ê心适代，通车虽然辛苦，mā有in ê甜甘。记持tō犹bē回倒转来，『隆田』已经到ah！

落车头，随感受着这个所在ê朴实，kap都市比起来加真开阔，草地厝kap现代ê西方建筑lām做伙，che是现代ê台湾庄脚。

黄牧师驶车来接我，伊先chhōa我去农会ê福利社食碗粿。食了，阮tō向北势寮ê真理大学驶。车驶到半路，黄牧师突然kā车停落来。伊讲你kā窗á ká落来，鼻看有啥物味？我kā窗á ká落来，一阵一阵ê清芳，一直入来。这款ê芳相信任何名牌ê芳水拢tòe bē着，是啥物ná chiah-nih芳？黄牧师讲che是柚á花ê芳味，chit-má是柚á开花ê季节。我心内想，若准我身边有一支kan-á，敢会tàng kā这个芳té转来Toronto？

车驶过柚á园，koh看着ê是一片一片ê水窟á。有一阵（tīn)一阵ê白鹅，tī水面顶泅来泅去，这个画面ê后壁有几nā栋新式ê建筑，tō是真理大学麻豆分校。

Kap台语系ê学生座谈真趣味，in问为啥物恁beh办『台文通讯』？写台文ê经过？当in知影陈雷是『麻豆』出身ê台文作家，真受鼓励。问陈雷真理大学这片地过去是啥物？陈雷回答讲是灌肚peh á、掠蟋蟀á ê好所在。

座谈会了，黄牧师chhōa阮参观真理大学ê『台湾文学资料馆』。这个文学馆是1997年tī『淡水』校区设立，2002年才迁来『麻豆』。伊ê外表虽然无『国家台湾文学馆』ê súi，m̄-koh内容真丰富。有三个展示室，第一展示室，典藏作家ê手稿kap原迹。第二展示室典藏日本时代ê文献，包括完整ê战前杂志『文艺台湾』、『民俗台湾』，kap一kóa重要ê日文着作。第三展示室是民国时代ê文献，包括作家ê作品、文艺杂志、每一届『台湾文学牛津奖』得主ê专柜、乡土文学、母语刊物，有『台文通讯』一~十二期ê合订本，亦有陈雷ê册。另外koh有西川满先生、郭荣桔先生、杨逸舟先生ê纪念文库kap吴进义先生、张良泽先生个人收集ê文库。In亦定期出版『台湾文学评论季刊』。

无来参观，m̄知影真理大学ê文学馆有chiah-nih丰富ê收藏。看了，hō͘阮真感动，beh离开进前，文学馆ê负责人the̍h毛笔kap纸来，希望阮会tàng留一句话hō͘ in。陈雷先生写『真理大学台湾文学资料馆文旦柚芳』。