《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第七章

作者 巴克禮普世版小組 2016.06.26

Be̍k-ki-sé-tek Chè-si
1 Chit-ê Be̍k-ki-sé-tek sī Sat-léng-ông, mā sī chì-koân Siōng-Chú ê chè-si. A-pek-la̍h-hán thâi-iâⁿ lia̍t-ông tńg-lâi ê sî, Be̍k-ki-sé-tek ū khì kā i gêng-chiap koh kā i chiok-hok. 2 A-pek-la̍h-hán ū chiong it-chhè só͘ tit-tio̍h ê cha̍p-hun chi-it hō͘ i. (Be̍k-ki-sé-tek chit-ê miâ ê ì-sù sī "chèng-gī ê ông", i koh sī Sat-léng-ông, chit-ê miâ mā ū " pêng-an-ông" ê ì-sù.) 3 Bô Be̍k-ki-sé-tek ê cho̍k-phó͘ thang chai i ê pē-bú sī sím-mi̍h-lâng, mā bô chhut-sì kah sí-bông ê kì-chài. I kah Siōng-Chú ê Kiáⁿ kāng-khoán, kú-tn̂g teh chò chè-si. 4 Lín khòaⁿ, chit-ê lâng ū jōa-ni̍h úi-tāi! Liân lán ê sian-chó͘ A-pek-la̍h-hán to tio̍h chiong só͘ tit-tio̍h siōng-téng ê mi̍h thiu cha̍p-hun chi-it hiàn hō͘ i. 5 Hiah-ê tam-tng chè-si-chit ê Lī-bī ê kiáⁿ-sun, sui-jiân kah Í-sek-lia̍t jîn-bîn lóng sī A-pek-la̍h-hán ê kiáⁿ-sun, pêⁿ-pêⁿ sī hiaⁿ-tī, iáu-koh tio̍h hōng bēng-lēng chiàu lu̍t-hoat tùi jîn-bîn cheng-siu in siu-ji̍p ê cha̍p-hun chi-it. 6 Be̍k-ki-sé-tek m̄-sī sio̍k Lī-bī ê sè-hē, m̄-koh i ū tùi A-pek-la̍h-hán the̍h cha̍p-hun chi-it, koh kā tit-tio̍h Siōng-Chú èng-ín ê A-pek-la̍h-hán chiok-hok. 7 Sī-sè siū sī-tōa ê chiok-hok sī lí-só͘ tong-jiân. 8 Hiah-ê cheng-siu cha̍p-hun chi-it ê lóng sī ē sí ê lâng, m̄-koh kāng-khoán ū siu cha̍p-hun chi-it ê Be̍k-ki-sé-tek, Sèng-keng chèng-si̍t i iáu oa̍h-teh. 9 Án-ne lán mā thang kóng, liân kā jîn-bîn cheng-siu cha̍p-hun chi-it ê Lī-bī mā bat thong-kòe A-pek-la̍h-hán lâi la̍p cha̍p-hun chi-it. 10 In-ūi Be̍k-ki-sé-tek gêng-chiap A-pek-la̍h-hán ê sî, Lī-bī iáu-bōe chhut-sì, m̄-koh lán thang kóng i sī tī in chó͘-sian A-pek-la̍h-hán ê seng-khu lāi-bīn. 11 Í-sek-lia̍t-lâng ê lu̍t-hoat sī kin-kì Lī-bī-cho̍k ê chè-si chè-tō͘ pan-pò͘. Nā tùi chit-ê chè-tō͘ ē-tàng hō͘ lâng tit-tio̍h oân-choân, chiū m̄-bián lēng-gōa koh siat-li̍p chi̍t-ê Be̍k-ki-sé-tek hē-thóng ê chè-si, che m̄-sī chiàu A-lûn hē-thóng siat-li̍p-.ê. 12 Chè-si chè-tō͘ kì-jiân ū kái-piàn, lu̍t-hoat mā tio̍h kái-piàn. 13 In-ūi chiah-ê tāi-chì só͘ chí Hit-ūi sī sio̍k tī pa̍t-ê chi-cho̍k, in m̄-bat ū-lâng tī chè-tôaⁿ chêng sū-hōng. 14 Lán ê Chú bêng-bêng sī Iû-tāi chi-cho̍k ê kiáⁿ-sun. Koan-hē chit-ê chi-cho̍k, Mô͘-se m̄-bat thê-khí chè-si ê chit-hūn.

Lēng-gōa Chi̍t-ūi Chhin-chhiūⁿ Be̍k-ki-sé-tek ê Chè-si
15 Taⁿ góa teh kóng ê tāi-chì koh-khah bêng-hián, in-ūi lēng-gōa chi̍t-ūi chhin-chhiūⁿ Be̍k-ki-sé-tek ê chè-si í-keng chhut-hiān. 16 Chit-ūi chè-si m̄-sī kin-kì lâng ê kui-chek á-sī tiâu-lē lâi siat-li̍p, sī chiàu bē húi-hoāi ê oa̍h-miā ê koân-lêng. 17 In-ūi Sèng-keng ū án-ne chò-chèng kóng: Chiàu Be̍k-ki-sé-tek ê pâi-pan sūn-sī, Lí éng-oán chò chè-si.( chù: SPh 110:4) 18 Kū ê tiâu-lē in-ūi bô la̍t koh bô lō͘-ēng, soah siū hùi-tû. 19 Mô͘-se ê lu̍t-hoat bô hoat-tō͘ sêng-choân pòaⁿ-hāng tāi-chì. Lēng-gōa chi̍t hong-bīn, koh-khah hó ê ǹg-bāng í-keng chún-pī hó-sè, hō͘ lán thang thong-kòe I lâi chhin-kīn Siōng-Chú. 20 Chit-hāng tāi-chì mā ū Siōng-Chú ê chiù-chōa lâi siat-li̍p. Lī-bī hē-thóng ê chè-si siat-li̍p bô thong-kòe chiù-chōa. 21 Chí-ū chit-ê Iâ-so͘ siū siat-li̍p chò chè-si ū keng-kòe chiù-chōa. Kā I siat-li̍p ê Siōng-Chú ū tùi I kóng: Chú kì-jiân chiù-chōa, bē kái-piàn sim-ì, Lí éng-oán chò chè-si.( chù: SPh 110:4) 22 Chiū-sī in-ūi chit-ê chha-pia̍t, Iâ-so͘ chiâⁿ-chò koh-khah hó ê bêng-iok pó-chèng-jîn. 23 Lēng-gōa ū chi̍t-ê chha-pia̍t: Lī-bī hē-thóng chò chè-si ê lâng chin-chē, in-ūi sí-bông ê chó͘-tòng soah bē-tàng kú-tn̂g chò chè-si. 24 Chí-ū Iâ-so͘ m̄-bián chiong chè-si ê chit kau hō͘ pa̍t-lâng, in-ūi I éng-oán oa̍h-teh. 25 Só͘-í thong-kòe Iâ-so͘ lâi-kàu Siōng-Chú bīn-chêng ê lâng, I put-sî to ē-tàng kā in chín-kiù, in-ūi I éng-oán oa̍h-teh lâi thè in tùi Siōng-Chú kî-kiû. 26 Chit-chióng ê chè-si-tiúⁿ tú ha̍h lán ê su-iàu. I sī sèng-kiat, bô chò pháiⁿ, bô lah-sap, tùi chōe-jîn tiong-kan hun-pia̍t chhut-lâi, pī ko-seng kàu pí thiⁿ khah koân. 27 I m̄ bián chhin-chhiūⁿ kî-tha ê tōa-chè-si, tio̍h ta̍k-ji̍t tāi-seng ūi-tio̍h ka-kī ê chōe, āu-lâi koh ūi-tio̍h jîn-bîn ê chōe hiàn-chè. I hiàn pún-sin chò chè, chi̍t-pái chiū oân-sêng. 28 Mô͘-se ê lu̍t-hoat siat-li̍p bô oân-choân ê lâng chò chè-si-tiúⁿ, m̄-koh ū lu̍t-hoat liáu-āu, Siōng-Chú ēng chiù-chōa lâi siat-li̍p I ê Kiáⁿ éng-oán chò oân-choân ê chè-si-tiúⁿ.